ເພື່ອໃຫ້ສາມາດຮັບປະກັນໄດ້ ການບໍລິໂພກພາຍໃນ ແລະ ເປັນສິນຄ້າ ສົ່ງອອກຈໍານວນໜຶ່ງ, ຕ້ອງສູ້ຊົນຜະລິດເຂົ້າ ເປືອກລວມ ໃຫ້ໄດ້ 3,843,530 ລ້ານໂຕນ;ໃນນັ້ນ, ສູ້ຊົນເກັບກ່ຽວເຂົ້ານາປີ ໃຫ້ໄດ້ 3,237,800 ໂຕນ, ເຂົ້ານາແຊງ 425,130 ໂຕນ ແລະ ເຂົ້າໄຮ່ 180,600 ໂຕນ ໂດຍສຸມໃສ່ 10 ແຂວງເປົ້າໝາຍຂອງໂຄງການຄໍ້າປະກັນສະບຽງອາຫານຫຼາຍແຫ່ງ, ໂດຍສະເພາະແມ່ນ ແຂວງຄໍາມ່ວນ, ສະຫວັນນະເຂດ, ສາລະວັນ ແລະ ແຂວງຈໍາປາສັກ ແມ່ນເລັ່ງໃສ່ຜະລິດ ເພື່ອສະໜອງໃຫ້ບັນດາແຂວງພາກກາງ ແລະ ພາກໃຕ້ ແລະ ເປັນສິນຄ້າສົ່ງອອກ; ສໍາລັບ ແຂວງໄຊຍະບູລີ, ຫຼວງນໍ້າທາ ແລະ ແຂວງບໍ່ແກ້ວ ແມ່ນເລັ່ງໃສ່ ຜະລິດເຂົ້າ ເພື່ອສະໜອງໃຫ້ບັນດາແຂວງພາກເໜືອ; ສໍາລັບ ນະຄອນຫຼວງວຽງຈັນ, ແຂວງວຽງຈັນ ແລະ ແຂວງບໍລິຄໍາໄຊ ແມ່ນເລັ່ງໃສ່ຜະລິດ ເພື່ອສະໜອງໃຫ້ ນະຄອນຫຼວງວຽງຈັນ ແລະ ບັນດາແຂວງພາກເໜືອຈໍານວນໜຶ່ງ ລວມທັງເພື່ອເປັນສິນຄ້າສົ່ງອອກ.
ການຜະລິດພືດສະບຽງອາຫານ ແມ່ນສູ້ຊົນຜະລິດໃຫ້ໄດ້ທັງໝົດ 290,900 ເຮັກຕາ, ຜົນຜະລິດ 2,598,770 ໂຕນ; ໃນນັ້ນ, ສາລີຫວານ ໃຫ້ໄດ້ 30,620 ເຮັກຕາ ຜົນຜະລິດ 177,090 ໂຕນ, ເຜືອກມັນ 19,460 ເຮັກຕາ ຜົນຜະລິດ 265,030 ໂຕນ,ພືດຜັກ ໃຫ້ໄດ້ 179,830 ເຮັກຕາ ຜົນຜະລິດ 1,535,200 ໂຕນ ແລະ ໝາກໄມ້ 60,990 ເຮັກຕາຜົນຜະລິດ 621,450 ໂຕນ ໂດຍສຸມໃສ່ ບັນດາແຂວງ ທີ່ມີທ່າແຮງທາງດ້ານການຜະລິດ ແລະ ການເຂົ້າເຖິງຕະຫຼາດ ໃນການຈໍາໜ່າຍຜົນຜະລິດ.
ສຳລັບການລ້ຽງສັດ ແລະ ປະມົງ ແມ່ນໃຫ້ສືບຕໍ່ເອົາໃຈໃສ່ຊຸກຍູ້ສົ່ງເສີມ ການລ້ຽງສັດ ແລະ ການປະມົງ ເພື່ອແນໃສ່ການສະໜອງຊີ້ນ, ໄຂ່ ແລະ ປາ ໃຫ້ພຽງພໍຢ່າງໜັກແໜ້ນ ໃນຂອບເຂດທົ່ວປະເທດ;ໃນນັ້ນ, ຈະຕ້ອງສົ່ງເສີມເຮັດໃຫ້ລະດັບການຂະຫຍາຍພັນຂອງຝູງສັດ ຢູ່ໃນລະດັບ 3.5% ຕໍ່ປີ (ຄວາຍ 1%, ງົວ 3%, ໝູ4%, ແກະ/ແບ້ 5% ແລະ ສັດປີກ 5%) ແລະ ການປະມົງ ຂະຫຍາຍຕົວ 4.3%.ເພື່ອຮັບປະກັນການສະໜອງອາຫານ ແລະ ໂພຊະນາການ ໃຫ້ພຽງພໍກັບຄວາມຕ້ອງການບໍລິໂພກພາຍໃນ ຢ່າງໜັກແໜ້ນ ຈະຕ້ອງສູ້ຊົນຊຸກຍູ້ການຜະລິດຊີ້ນ, ໄຂ່ ແລະ ປາ ໃຫ້ໄດ້ 577,000 ໂຕນ; ໃນນັ້ນ, ການຜະລິດຊີ້ນໃຫ້ໄດ້ໃນລະດັບ 284,600 ໂຕນ, ໄຂ່ 55,400 ໂຕນ ແລະ ປາ 237,000 ໂຕນ ເພື່ອຄໍ້າປະກັນເຮັດໃຫ້ອັດຕາການບໍລິໂພກຊີ້ນ, ໄຂ່ ແລະ ປາ ໂດຍສະເລ່ຍ ໃຫ້ໄດ້ 73 ກິໂລກຣາມ/ຄົນ/ປີ.
ບັນດາໂຕເລກຄາດໝາຍສູ້ຊົນຂ້າງເທິງນັ້ນ, ໄດ້ຖືກກຳນົດໃນແຜນການປີ 2025 ຂອງກະຊວງກະສິກຳ ແລະ ປ່າໄມ້ ຊຶ່ງພາກສ່ວນກ່ຽວຂ້ອງ ກຳລັງຈັດຕັ້ງປະຕິບັດ ສຸມໃສ່ການຜະລິດເພື່ອຄວາມໝັ້ນຄົງດ້ານສະບຽງອາຫານ; ເພື່ອໃຫ້ບັນລຸ ກໍມີຫຼາຍໜ້າວຽກທີ່ຕ້ອງໄດ້ສືບຕໍ່ ເປັນຕົ້ນແມ່ນການສືບຕໍ່ຄົ້ນຄວ້າກຳນົດນະໂຍບາຍ ກະຕຸກຊຸກຍູ້ການຜະລິດ ເຊັ່ນນະໂຍບາຍຕໍ່ຜູ້ປະກອບການທີ່ຜະລິດປັດໄຈການຜະລິດຝຸ່ນ, ປຸ໋ຍ, ອາຫານສັດ; ນະໂຍບາຍຕໍ່ຜູ້ນໍາໃຊ້ເຕັກໂນໂລຊີຂັ້ນສູງ, ນະວັດຕະກຳ ເຂົ້າໃນການຜະລິດສະບຽງອາຫານ ທີ່ມີຄຸນນະພາບສູງ; ພ້ອມທັງຜັນຂະຫຍາຍນະໂຍບາຍແຫ່ງຊາດ ວ່າດ້ວຍການປູກພືດ ແລະ ນະໂຍບາຍແຫ່ງຊາດ ວ່າດ້ວຍການລ້ຽງສັດ ແລະ ສັດນໍ້າ.
(ພາບປະກອບໂຫຼດຈາກອອນລາຍ)
ຄໍາເຫັນ