ເມືອງສີງປາຖະກະຖາວັນສ້າງຕັ້ງກອງເຍົາວະຊົນທັນວາ ຄົບຮອບ 70 ປີ

ໃນພິທີ, ທ່ານ ກຽດແກ້ວ ປີນແສນອີນ ກໍາມະການພັກເມືອງ ຄະນະບໍລິຫານງານຊາວໜຸມ່ແຂວງ ເລຂາຄະນະບໍລິຫານຊາວໜຸ່ມເມືອງສີງໄດ້ເລົ່າຄືນມູນເຊື້ອມູນເຊື້ອແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວຂອງກອງເຍົາວະຊົນທັນວານັບແຕ່ຊຸມປີ 1930 ຂອງສະຕະວັດນີ້ເປັນຕົ້ນມາ, ຊາວໜຸ່ມຮຸ່ນທຳອິດຂອງລາວເຮົາໄດ້ດຳເນີນການຂົນຂວາຍມະຫາຊົນທາງລັບ, ເປັນຜູ້ນຳໜ້າຢູ່ໃນຂະບວນການຕໍ່ສູ້ປະຕິວັດຂອງທຸກຊັ້ນຄົນທີ່ຮັກຊາດຕ້ານແອກປົກຄອງຂອງພວກລ່າເມືອງຂຶ້ນຝຣັ່ງ ແລະ ພວກຟາຊິດຍີ່ປຸ່ນ, ໂດຍບໍ່ຢ້ານກົວຕໍ່ການບີບບັງຄັບ ແລະ ການປາບປາມອັນປ່າເຖື່ອນໃດໆຂອງສັດຕູ ໃນເດືອນ ສິງຫາ 1945, ເມື່ອໂອກາດດີມາເຖິງຊາວໜຸ່ມໄດ້ເປັນກຳລັງປະຈັນບານໃນການລຸກຮື້ຂຶ້ນພ້ອມກັນ ຂອງປວງຊົນທັງຊາດ, ຢຶດອຳນາດຈາກພວກຟາຊິຍີ່ປຸ່ນ ແລະ ໄດ້ປະກາດປະເທດລາວເປັນເອກະລາດແລະ ພັກປະຊາຊົນລາວ ໄດ້ຕົກລົງປ່ຽນຊື່ຈາກ ກອງທະຫານນ້ອຍ 48 ມາເປັນ: ກອງເຍົາວະຊົນ 12 ຕຸລາ ໃນວັນທີ 2 ທັນວາ 1955 ແລະມາເຖິງວັນທີ 25 ພຶດສະພາ 1960 ເພື່ອປັບປຸງການຈັດຕັ້ງ ໃສ່ຊື່ວ່າ:“ກອງເຍົາວະຊົນນໍາໜ້າລາວຮັກຊາດ. ຮອດເດືອນເມສາ 1983 ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດຄັ້ງທີ I ໄດ້ໄຂຂຶ້ນຢ່າງເປັນທາງການ. ກອງປະຊຸມຄັ້ງນີ້, ໄດ້ຮັບຮອງເອົາວັນທີ 2 ທັນວາ 1955 ເປັນວັນສ້າງຕັ້ງກອງເຍົາວະຊົນຢ່າງເປັນທາງການ ແລະ ໄດ້ປ່ຽນຊື່ຈາກ ກອງເຍົາວະຊົນນໍາໜ້າລາວຮັກຊາດ ມາເປັນກອງເຍົາວະຊົນ 2 ທັນວາ ແລະ ວັນທີ 23-25 ມິຖຸນາ 2006 ກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດຄັ້ງທີ V ໄດ້ໄຂຂຶ້ນຢ່າງເປັນທາງການ, ກອງປະຊຸມຍັງໄດ້ຮັບຮອງເອົາກາໝາຍເຍົາວະຊົນຮູບແບບໃໝ່ ແລະ ປ່ຽນຊື່ການຈັດຕັ້ງກອງເຍົາວະຊົນ ຈາກກອງເຍົາວະຊົນ 2 ທັນວາ ມາເປັນ ກອງເຍົາວະຊົນທັນວາ ຈົນເຖິງປັດຈຸບັນ, ພ້ອມທັງເຮັດພາລະກິດ ສຶກສາອົບຮົມນ້ອງນ້ອຍຕາມຄຳສອນ 6 ຮັກ 3 ຊັງ ແລະ ຂໍ້ແຂ່ງຂັນ 3 ດີ 4 ຮູ້ ຢູ່ບັນດາໂຮງຮຽນທັງພາກລັດ ແລະ ເອກະຊົນ ເພື່ອສ້າງໃຫ້ເຍົາວະຊົນ - ອະນຸຊົນ ເຕີບໃຫຍ່ຂະຫຍາຍຕົວຮອບດ້ານຕາມແນວທາງນະໂຍບາຍຂອງພັກ-ລັດ. ແນ່ໃສ່ການພັດທະນາເດັກໃຫ້ກາຍເປັນຊັບພະຍາກອນມະນຸດທີ່ມີຄຸນນະພາບ, ມີຄວາມຮັບຜິດຊອບສູງ, ມີຄວາມຮູ້, ຄວາມສາມາດ ເພື່ອເຮັດໜ້າທີ່ຜູ້ສືບທອດປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດ.

(ຂ່າວ: ອັກສອນ)