ຈໍານວນປະຊາກອນສາຍພັນສັດປ່າທີ່ມີຄວາມໂດດເດັ່ນຂອງອາຟຣິກາໄດ້ແກ່: ສັດລ້ຽງລູກດ້ວຍນົມ, ສັດເລືອຄານ, ປາ, ສັດເຄິ່ງບົກເຄິ່ງນ້ຳ ແລະ ນົກ ຫຼຸດລົງ 76% ໃນໄລະ 50 ກວ່າປີທີ່ຜ່ານມາ.
ບົດລາຍງານສິ່ງມີຊີວິດໂລກ ປີ 2024 ຂອງກອງທຶນ WWF-Kenya ລະບຸວ່າ: ຈໍານວນປະຊາກອນສັດປ່າໃນອາຟຣິກາທີ່ຫຼຸດລົງໃນໄລຍະປີ 1970-2020 ມີສາເຫດຫຼັກຈາກການສູນເສຍ ແລະ ການເຊື່ອມໂຊມຂອງແຫຼ່ງບ່ອນຢູ່ອາໄສ, ການສະແຫວງຫາຜົນປະໂຫຍດເກີນຄວນ, ການປ່ຽນແປງຂອງສະພາບດິນຟ້າອາກາດ, ມົນລະພິດ ແລະ ພະຍາດ.
ທ່າອ່ຽງດັ່ງກ່າວຕອກຢ້ຳຄວາມຈຳເປັນອັນຮີບດ່ວນຂອງການປະຕິບັດງານທີ່ເລັ່ງສ້າງການປ່ຽນແປງ ເພື່ອຄຸ້ມຄອງລະບົບນິເວດທາງທຳມະຊາດຂອງອາຟຣິກາ ແລະ ການດຳລົງຊີວິດທີ່ອາໄສສັດປ່າ.
ບົດລາຍງານສະບັບນີ້, ຍັງເປີດເຜີຍທ່າອ່ຽງຄວາມຫຼາກຫຼາຍທາງຊີວະພາບທົ່ວໂລກ ແລະ ສຸຂະ ພາບຂອງໂລກທີ່ອ້າງອີງເຖິງວິທະຍາສາດທີ່ຄອບຄຸມຮອບດ້ານໃນພາບລວມ, ໂດຍລະບົບນິເວດນ້ຳຈືດຊຸດໂຊມຫຼາຍທີ່ສຸດເຖິງ 85%, ຕາມມາດ້ວຍລະບົບນິເວດເທິງບົກຊຸດໂຊມລົງ 69% ແລະ ລະບົບນິເວດທາງທະເລຊຸດໂຊມລົງ 56%.
ການຫຼຸດລົງຢ່າງໄວວາຂອງຈຳນວນປະຊາກອນສັດປ່າ ບົ່ງບອກເຖິງຄວາມສ່ຽງສູນພັນທີ່ອາດສັ່ນຄອນສະຖຽນລະພາບຂອງລະບົບນິເວດຕ່າງໆ ແລະ ຂັດຂວາງຊຸມຊົນໃນອາຟຣິກາຈາກແຫຼ່ງທຳມາຫາກິນຫຼັກ. ຖ້າຫາກວ່າກຸ່ມປະເທດອາຟຣິກກາບັນລຸເປົ້າໝາຍດ້ານທຳມະຊາດ, ສະພາບດິນຟ້າອາກາດ ແລະ ການພັດທະນາທີ່ຍືນຍົງ ຈະສາມາດປີ້ນກັບການຫຼຸດລົງຂອງຈຳນວນປະຊາກອນສັດປ່າໄດ້ດີຍິ່ງຂຶ້ນ.
ບົດລາຍງານເນັ້ນໜັກວ່າ: ການຮັກສາສະຖຽນລະພາບຂອງຈຳນວນປະຊາກອນສັດປ່າໃນອາຟຣິກາ ຕ້ອງອາໄສການປ່ຽນແປງຮູບແບບການຜະລິດ ແລະ ການບໍລິໂພກ, ນອກເໜືອຈາກການລົງທຶນດ້ານການອະນຸລັກທີ່ນຳໂດຍຊຸມຊົນ, ຄະນະລັດຖະບານ, ອຸດສາຫະກຳ ແລະ ຫຸ້ນສ່ວນຂອງທະວິພາຄີຂອງອາຟຣິກາຄວນຂະຫຍາຍການຄຸ້ມຄອງລະບົບນິເວດເທິງບົກ ແລະ ທາງທະເລ ເພື່ອຊ່ວຍໃຫ້ສາຍພັນສັດປ່າທີ່ມີຄວາມໂດດເດັ່ນຈະເລີນເຕີບໂຕ.
ທ່ານ ໂມຮາເໝັດ ອາເວີ ຫົວໜ້າກອງທຶນ WWF-Kenya ກ່າວວ່າ: ການຟື້ນຟູທຳມະຊາດ, ການເພີ່ມຄວາມເຂັ້ມງວດຂອງການແກ້ໄຂວິດການສະພາບດິນຟ້າອາກາດ ແລະ ການໃຊ້ຄວາມຫຼາກຫຼາຍທາງຊີວະພາບຢ່າງຍືນຍົງ ຈະເປັນກຸນແຈສຳຄັນໃນການຫຼຸດການສູນເສຍສັດປ່າຂອງອາຟຣິກາ, ໂດຍແນວທາງແບບທາງສັງຄົມ ເນັ້ນລະດົມຊັບພະຍາກອນ ແລະ ພະລັງຂອງຊຸມຊົນ ຈະຊ່ວຍຫຼີກລ່ຽງການສູນເສຍ ຫຼື ການສູນພັນຂອງສາຍພັນສັດປ່າຫາຍາກ.
ທ່ານ ແຈັກສັນ ຄິປລາແກດ ຫົວໜ້າໂຄງການອະນຸລັກປະຈຳກອງທຶນ WWF-Kenya ກ່າວວ່າ: ສາຍພັນສັດປ່າທີ່ມີຄວາມໂດດເດັ່ນເຊັ່ນ: ສິງໂຕອາຟຣິກກາ, ຊ້າງອາຟຣິກາ ແລະ ແຮດດຳ ຕົກຢູ່ພາຍໃຕ້ໄພຄຸກຄາມ, ສ່ວນມາດຕະການອະນຸທີ່ເຂັ້ມງວດຈະຊ່ວຍຮັກສາສະຖຽນລະພາບຂອງຈຳນວນປະຊາກອນສັດປ່າ.
ຄໍາເຫັນ