 |
ທ່ານ ຄໍາພັນ ວັນທະນາ ຫົວໜ້າໂຄງການຂົນສົ່ງແບບຍືນຍົງໃນຕົວເມືອງ ນວ ກ່າວວ່າ: ໂດຍໄດ້ຮັບການມອບໝາຍຈາກກົມຂົນສົ່ງກະຊວງ ຍທຂ ຮັບຜິດຊອບພິທີເປີດບໍລິການແລ່ນທົດລອງລົດເມດ່ວນ BRT ໃນຄັ້ງນີ້, ລະບົບລົດເມດ່ວນ BRT ຢູ່ ນວ ໄດ້ຮັບການອອກແບບລະດັບສາກົນ ມີຈຸດປະສົງຍົກລະດັບຄຸນນະພາບລະບົບຂົນສົ່ງສາທາລະນະ ແນໃສ່ແກ້ໄຂບັນຫາການສັນຈອນແອອັດ, ອຸບັດເຫດຕາມທ້ອງຖະໜົນ ທັງເປັນການສົ່ງເສີມສະພາບແວດລ້ອມຕົວເມືອງຢູ່ ນວ. ສະນັ້ນ, ໃນປີ 2014 ລັດຖະບານຈຶ່ງໄດ້ຮັບຮອງເອົາໂຄງການຂົນສົ່ງແບບຍືນຍົງໃນຕົວເມືອງ ນວ ໂດຍໄດ້ຮັບທຶນກູ້ຢືມ ແລະ ຊ່ວຍເຫຼືອ ຈາກອົງການຈັດຕັ້ງສາກົນ ເພື່ອຈັດຕັ້ງປະຕິບັດໂຄງການ ການກໍ່ສ້າງພື້ນຖານໂຄງລ່າງສໍາລັບລົດເມດ່ວນ BRT, ການສະໜອງພາຫະນະອຸປະ ກອນ ລວມທັງລະບົບຄວບຄຸມບັນຊາ, ການແລ່ນລົດເມດ່ວນ BRT ໄດ້ເລີ່ມໃນຕົ້ນປີ 2024 ປັດຈຸບັນແມ່ນສຳເລັດ 100%. ເພື່ອຮັບປະກັນການບໍລິການເຕັມຮູບແບບໃນມໍ່ໆນີ້ ການນໍາ ນວ ແລະ ກະຊວງ ຍທຂ ຈຶ່ງເປັນເອກະພາບສູງ ເປີດບໍລິການແລ່ນທົດລອງລົດເມດ່ວນ BRT (ໂດຍບໍ່ເກັບເງິນ) ເປັນເວລາ 2 ເດືອນ (ວັນທີ 10 ມີນາ 2026 ຫາ ວັນທີ 9 ພຶດສະພາ 2026).
 |
1. ເວລາການໃຫ້ບໍລິການ: ວັນຈັນ-ວັນອາທິດ ເລີ່ມແຕ່ 6:00 ໂມງ ຫາ 22:00 ໂມງ ໃນຊົ່ວໂມງຮີບດ່ວນ ໃນເຊົ້າເວລາ 6:00ໂມງ - 9:00 ໂມງ, ຕອນແລງ ເວລາ 16:00ໂມງ - 18:00 ໂມງ ຄວາມຖີ່ຂອງຖ້ຽວລົດຈະຢຸດຮັບ-ສົ່ງຜູ້ໂດຍສານຢູ່ແຕ່ລະສະຖານີ ແມ່ນລະຫວ່າງ 6-7 ນາທີ ແລະ ໃນຊົ່ວໂມງປົກກະຕິ ຄວາມຖີ່ຂອງຖ້ຽວລົດ ຈະຢຸດຮັບ-ສົ່ງຜູ້ໂດຍສານ ຢູ່ແຕ່ລະສະຖານີແມ່ນ 10-15 ນາທີ ຜູ້ໃຫ້ບໍລິການໂດຍລັດວິສາຫະກິດລົດເມ ນວ ແລະ ບໍລິສັດ ເພັດອາລຸນ ຂົນສົ່ງສິນຄ້າ-ໂດຍສານ ທັງພາຍໃນ ແລະ ຕ່າງປະເທດ ຈຳກັດ; 2. ສາຍທາງ ແລະ ຈຸດສະຖານີ: ເລີ່ມຈາກສະຖານີດົງໂດກ (ໜ້າມະຫາວິທະຍາໄລແຫ່ງຊາດ (ມຊ) ຫາ ສະຖານີຕະຫຼາດເຊົ້າ ແລ່ນເຂົ້າ-ອອກຕົວເມືອງ ຊຶ່ງຈະຜ່ານທັງໝົດ 19 ສະຖານີ ຄື: ດົງໂດກ ມຊ > ເຮືອນພັກຊີເກມ > ຊ້າງຄູ້ > ສະພັງເມິກ > ທາງ 450 ປີ > ທະນາຄານສົ່ງເສີມກະສິກຳ > ທະນາຄານພົງສະຫວັນ > ພະຂາວ > ວິວມໍ > ໂຮງຮຽນ SOS > ຫໍພິພິຕະພັນໄກສອນ ພົມວິຫານ > ສູນ ICTC > ໂພນພະເນົາ > ໂພນເຄັງ > ຫໍພິພິທະພັນປ້ອງກັນຄວາມສະຫງົບ >ໂພນສະອາດ > ປະຕູໄຊ > ທາດຝຸ່ນ > ຕະຫຼາດເຊົ້າແລ່ນເຂົ້າມາ ແລະ ກໍແລ່ນວຽນກັບຄືນ. ກ່ຽວກັບຂໍ້ຫ້າມ ແລະ ຂໍ້ຍົກເວັ້ນ ການນໍາໃຊ້ເລນສະເພາະລົດເມ BRT
 |
- ໃນໄລຍະເວລາລົດເມດ່ວນ BRT ໃຫ້ບໍລິການ ຫ້າມຜູ້ຂັບຂີ່ຍານພາຫະນະປະເພດອື່ນໆ ຂັບຂີ່ເຂົ້າໃນເລນສະເພາະຂອງລົດເມດ່ວນ BRT ຜູ້ທີ່ລະເມີດ ຈະຖືຶກຕັກເຕືອນ ແລະ ປັບໃໝຕາມລະບຽບການ.
ຂໍ້ຍົກເວັ້ນສຳລັບຍານພາຫະນະທີ່ສາມາດເຂົ້າແລ່ນ ຫຼື ນໍາໃຊ້ເລນສະເພາະລົດເມດ່ວນ BRT ປະກອບມີ: ລົດສຸກເສີນໂຮງໝໍ (Ambulance) ລົດກູ້ໄພ, ລົດດັບເພີງ ແລະ ລົດຂະບວນທາງລັດຖະການ ທີ່ມີລົດຕໍາຫຼວດຈະລາຈອນນໍາທາງ ແລະ ລົດຂະບວນທາງການອື່ນໆ ທີ່ໄດ້ຖືກຮັບຮອງຢ່າງເປັນທາງການຂອງອົງການປົກຄອງ ນວ ໄດ້ຮັບຮອງເປັນແຕ່ລະກໍລະນີສະເພາະໃນໄລຍະເວລາທີ່ແນ່ນອນ ອະນຸຍາດໃຫ້ຜູ້ຂັບຂີ່ພາຫະນະປະເພດອື່ນໆ ທີ່ຈຳເປັນນຳໃຊ້ເລນລົດເມດ່ວນ BRT ໃນໄລຍະເວລາ 22:01-5:59 ໂມງ ຕ້ອງໃຫ້ຮັບປະກັນຄວາມປອດໄພ ຖ້າເກີດອຸບັດເຫດໃນຂອບເຂດສະຫງວນຂອງສະຖານີ BRT ເຮັດໃຫ້ຊັບສິນຂອງລັດເສຍຫາຍ, ຜູ້ກ່ຽວຈະຖືກປັບໄໝ 10% ຂອງມູນຄ່າທີ່ເສຍຫາຍ ແລະ ຮັບຜິດຊອບໃຊ້ແທນຕາມມູນຄ່າເປ່ເພເສຍຫາຍຕົວຈິງ.
 |
ດັ່ງນັ້ນ, ເຊີນຊວນມາຍັງທຸກພາກສ່ວນໃນສັງຄົມ, ພະນັກງານ-ລັດຖະກອນ, ທະຫານ, ຕຳຫຼວດ, ນັກທຸ ລະກິດ, ນັກຮຽນ, ນັກສຶກສາ ແລະ ປະຊາຊົນບັນດາເຜົ່າ, ພົນລະເມືອງລາວ, ຕ່າງດ້າວ ຜູ້ມາເຄື່ອນໄຫວດຳລົງຊີວິດຢູ່ ນວ ຫັນມານໍາໃຊ້ລົດຂົນສົ່ງສາທາລະນະໃນການເດີນທາງໃຫ້ຫຼາຍຂຶ້ນ ແລະ ເອົາໃຈໃສ່ເປັນພິເສດຕໍ່ບັນດາທິດທາງການສັນຈອນທີ່ໄດ້ຮັບຮອງຄືນໃໝ່ຈຳນວນໜຶ່ງຢູ່ໃນເຂດໃຈກາງຕົວເມືອງ ນວ.
ຂ່າວ: ວຽງຈັນໃໝ່
ຄໍາເຫັນ