ເປີດໄຟສີຟ້າປະຕູໄຊ ສະຫຼອງວັນເດັກໂລກ

ຄະນະກຳມະການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ)ຮ່ວມກັບອົງການອຸຍນີເຊັບປະຈຳລາວ ໄດ້ຈັດພິທີເປີດໄຟສີຟ້າປະຕູໄຊ ເພື່ອສະເຫຼີມສະຫຼອງຄົບຮອບ 34 ປີ ຂອງສົນທິສັນຍາ ວ່າດ້ວຍສິດທິເດັກ ຫຼື ວັນເດັກໂລກ (20 ພະຈິກ 1989-20 ພະຈິກ 2023) ຂຶ້ນໃນຕອນຄໍ່າວັນທີ 20 ພະຈິກ ນີ້ທີ່ອານຸສາວະລີປະຕູໄຊ ນະຄອນຫຼວງວຽງຈັນ ໂດຍໃຫ້ກຽດກົດປຸ່ມເປີດໄຟຂອງທ່ານ ນາງອາລີ ວົງໜໍ່ບຸນທໍາ ປະທານສູນກາງສະຫະພັນແມ່ຍິງລາວ ຮອງປະທານຜູ້ປະຈຳການ ຄຊກມດ, ທ່ານນາງ ເພຍ ເຣເບລໂລ ບຣິດໂຕ ຜູ້ຕາງໜ້າອົງການອຸຍນີເຊັບປະຈຳລາວ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ປະທານຄະນະກຳມະການເພື່ອຄວາມກ້າວໜ້າແມ່ ແລະ ເດັກ (ຄກມດ) ນະຄອນຫຼວງວຽງຈັນ, ມີອົງການຈັດຕັ້ງສາກົນ, ຄູ-ອາຈານ, ນັກຮຽນພ້ອມດ້ວຍແຂກຖືກເຊີນ,ຊາວນະຄອນຫຼວງວຽງຈັນເຂົ້າຮ່ວມ.
ທ່ານນາງ ອາລີ ວົງໜໍ່ບຸນທໍາ ກ່າວວ່າ: ພິທີເປີດໄຟສີຟ້າທີ່ປະຕູໄຊໃນຄັ້ງນີ້ເພື່ອເປັນສັນຍາລັກເຖິງສິດທິເດັກ ຮ່ວມກັບບັນດາປະຊາຊາດໃນທົ່ວໂລກ ເພື່ອສະເຫຼີມສະຫຼອງວັນຄົບຮອບ 34 ປີຂອງສົນທິສັນຍາ ວ່າດ້ວຍສິດທິເດັກ (ວັນເດັກໂລກ) ແລະ ໂອກາດສະເຫຼີມສະຫຼອງຄົບຮອບ 50 ປີແຫ່ງການພົວພັນຮ່ວມມື ລະຫວ່າງລັດຖະບານແຫ່ງ ສປປ ລາວ ແລະ ອົງການອຸຍນີເຊັບປະຈຳລາວ ພາຍໃຕ້ຄໍາຂັວນທີ່ວ່າ: ການລົງທຶນໃນອະນາຄົດ ຄືການລົງທຶນໃສ່ເດັກ (Investing in Our Future means Investing in Our Children). ໃນນັ້ນ, ຍັງເປັນການປູກຈິດສໍານຶກ, ປຸກລະດົມສັງຄົມ ແລະ ທຸກຄົນເຂົ້າຮ່ວມ, ລົງທຶນໃສ່ເດັກ, ສົ່ງເສີມສິດທິເດັກ, ສ້າງຄວາມເຂັ້ມແຂງ, ສົ່ງເສີມສິດທິເດັກ ແລະ ຄວາມເປັນຢູ່ທີ່ດີສໍາລັບເດັກ. ຄຽງຄູ່ກັບກິດຈະກໍາຄັ້ງນີ້, ຄຊກມດ ຍັງມີຫຼາຍໆກິດຈະກຳ ຮ່ວມມືກັບບັນດາ ຄກມດ ກະຊວງ/ອົງການ, ແຂວງ, ຄູ່ຮ່ວມພັດທະນາ ແລະ ພາກທຸລະກິດເອກະຊົນລວມທັງຄູ-ອາຈານ ແລະ ນ້ອງໆທີ່ເປັນຕົວແທນເດັກຫຼາຍກຸ່ມຄື: ເດັກໃນຕົວເມືອງ, ເດັກຊົນນະບົດ, ເດັກຊົນເຜົ່າ ແລະ ເດັກພິການ ຊຶ່ງກິດຈະກຳທັງໝົດລວມມີ: ການປະກວດຮູບແຕ້ມຂອງເດັກ, ກອງປະຊຸມຕົວແທນເດັກ ໃນຫົວຂໍ້ທີ່ກ່ຽວຂ້ອງກັບເດັກໃນ 3 ຫົວຂໍ້ຄື: ຜົນກະທົບຕໍ່ເດັກຈາກການປ່ຽນແປງດິນຟ້າອາກາດ ແລະ ໄພພິບັດ, ການແຕ່ງດອງແຕ່ອາຍຸຍັງນ້ອຍ ແລະ ການຖືພາຂອງເດັກ, ເດັກກັບສື່ສັງຄົມອອນລາຍ. ນອກນັ້ນ, ຍັງໄດ້ຈັດກອງປະຊຸມລະດັບສູງ ເພື່ອທົວທວນການຈັດຕັ້ງປະຕິບັດວຽກສິດທິເດັກຢູ່ ສປປ ລາວ. ໃນນັ້ນ, ກອງປະຊຸມດັ່ງກ່າວໄດ້ມີການທົບທວນຄວາມໝາຍໝັ້ນຂອງລັດຖະບານ, ທ່ານຮອງເຈົ້າແຂວງທົ່ວປະເທດ, ບັນດາຄູ່ຮ່ວມພັດທະນາ, ພາກເອກະຊົນ ແລະ ອົງການຈັດຕັ້ງທາງສັງຄົມ/ອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ; ການສຳພາດທັດສະນະ ແລະ ຄວາມຄິດເຫັນຂອງການນໍາລະດັບສູງ ແລະ ຕົວແທນເດັກ.
ທ່ານ ນາງ ເພຍ ເຣເບລໂລ ບຣິດໂຕ ກ່າວວ່າ: ວັນເດັກໂລກ ເປັນສັນຍາລັກຂອງຄໍາໝັ້ນສັນຍາທົ່ວໂລກທີ່ມີຕໍ່ເດັກນ້ອຍ ແລະ ເປັນສັນຍາລັກຂອງຜົນສຳເລັດໃນການປະຕິບັດສິດທິເດັກຢ່າງແທ້ຈິງ. ພວກເຮົາສະເຫຼີມສະຫຼອງ 5 ທົດສະວັດຂອງການອຸທິດຕົນຂອງອົງການ UNICEF ຢູ່ໃນ ສປປ ລາວ ເປັນພະຍານເຖິງການຮ່ວມມືທີ່ຍືນຍົງ, ຄວາມຍືດຍຸ່ນ, ແລະ ຄວາມຫວັງ. ໃນໄລຍະ 50 ປີຜ່ານມາໄດ້ເຫັນການປ່ຽນແປງຊີວິດການເປັນຢູ່ຂອງເດັກນ້ອຍໃນ ສປປ ລາວ ເຂົາເຈົ້າມີສຸຂະພາບທີ່ດີຂຶ້ນ, ການເຂົ້າເຖິງການສຶກສາ ແລະ ການເລີ່ມຕົ້ນຊີວິດອັນດີງາມກວ່າເກົ່າ. ໃນຂະນະສະທ້ອນເຖິງຄວາມສຳຄັນຂອງການຮ່ວມມືໃນຮອບເຄິ່ງສະຕະວັດ ກັບລັດຖະບານ ສປປ ລາວ, ຮັບຮູ້ ແລະ ເຫັນໄດ້ເຖິງບົດບາດອັນສຳຄັນຂອງບັນດາຄູ່ຮ່ວມມື, ຄູ່ຮ່ວມພັດທະນາ, ບັນດາຄູ່ຮ່ວມມືຂອງສະຫະປະຊາຊາດ ສປຊ ແລະ ອື່ນໆ.
(ຂ່າວ-ພາບ: ວັນເພັງ)