 |
ທ່ານ ນາງ ດາລາວອນ ກິດຕິພັນ ກ່າວວ່າ: ໂຄງການ "ກະເປົາແຫ່ງຄວາມຮັກສາກົນ" ເລີ່ມຕົ້ນຂຶ້ນໃນເດືອນກຸມພາປີ 2019 ພາຍໃຕ້ການຮ່ວມມືລະຫວ່າງ ມູນນິທິຈີນເພື່ອພັດທະນາຊົນນະບົດ ແລະ ມູນນິທິອາລີບາບາ (Alibaba Foundation) ໂດຍມີໄລຍະເວລາ 3 ປີ ເພື່ອສົ່ງມອບກະເປົາແຫ່ງຄວາມຮັກໃຫ້ນັກຮຽນຊັ້ນປະຖົມສຶກສາ ທີ່ກໍາລັງພົບຄວາມຫຍຸ້ງຍາກຈໍານວນ 1 ລ້ານຄົນ ເພື່ອປັບປຸງສະພາບການຮຽນ ແລະ ຊີວິດການເປັນຢູ່ຂັ້ນພື້ນຖານຂອງເດັກນ້ອຍ ຕາມແນວທາງນະໂຍບາຍ "ໜຶ່ງແລວ ໜຶ່ງເສັ້ນທາງ" ຂອງ ສປ ຈີນ. ນັບຕັ້ງແຕ່ປີ 2019 ເປັນຕົ້ນມາ, ໂຄງການດັ່ງກ່າວໄດ້ແຈກຢາຍກະເປົາໃຫ້ໂຮງຮຽນປະຖົມໃນ ສປປ ລາວ ແລ້ວຈໍານວນທັງໝົດ 143,552 ຊຸດ ໃຫ້ໂຮງຮຽນເປົ້າໝາຍ 1,413 ແຫ່ງ ກວມເອົາ 14 ແຂວງ ແລະ ນວ ລວມມີແຂວງວຽງຈັນ, ຫຼວງພະບາງ, ໄຊຍະບູລີ, ຊຽງຂວາງ, ບໍລິຄໍາໄຊ, ຄໍາມ່ວນ, ຈໍາປາສັກ, ຫຼວງນໍ້າທາ, ອຸດົມໄຊ, ສະຫວັນນະເຂດ, ສາລະວັນ, ໄຊສົມບູນ ແລະ ແຂວງຫົວພັນ.
 |
ສໍາລັບແຜນການໃນປີ 2026 ນີ້, ໂຄງການມີແຜນຈະແຈກຢາຍຖົງກິລາເພີ່ມເຕີມຈໍານວນ 1,000 ຊຸດ ໃນ ສປປ ລາວ ມູນຄ່າລວມ 1,000,000 ຢວນ ຊຶ່ງຈະເນັ້ນໃສ່ການແຈກຢາຍໃນພື້ນທີ່ ນວ, ແຂວງໄຊສົມບູນ ແລະ ແຂວງຫົວພັນ. ໂຄງການກະເປົາແຫ່ງຄວາມຮັກສາກົນ ບໍ່ໄດ້ເປັນພຽງແຕ່ການມອບສິ່ງຂອງ, ອຸປະກອນການຮຽນ ຫຼື ອຸປະກອນກິລາເທົ່ານັ້ນ, ກະເປົາແຕ່ລະໜ່ວຍແມ່ນບັນຈຸໄປດ້ວຍຄວາມຫ່ວງໃຍ ແລະ ນໍ້າໃຈອັນອົບອຸ່ນຈາກຜູ້ສະໜັບສະໜູນ. ມັນຄືເຄື່ອງມືໃນການສ້າງອະນາຄົດ, ເພີ່ມໂອກາດໃນການເຂົ້າເຖິງການສຶກສາທີ່ມີຄຸນນະພາບ ແລະ ເປັນກໍາລັງໃຈອັນຍິ່ງໃຫຍ່ໃຫ້ເດັກນ້ອຍນັກຮຽນ ເພື່ອໃຫ້ເຂົາເຈົ້າເຕີບໃຫຍ່ກາຍເປັນອະນາຄົດທີ່ດີຂອງຊາດ." ການເປີດໂຄງການໃນຄັ້ງນີ້, ຍັງເປັນການປະກອບສ່ວນອັນສໍາຄັນ ໃນການເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອລະຫວ່າງ ລາວ-ຈີນ, ເນື່ອງໃນໂອກາດສະເຫຼີມສະຫຼອງວັນສ້າງສາຍພົວພັນທາງການທູດ ລາວ-ຈີນ ຄົບຮອບ 65 ປີ ແລະ ເປັນນິມິດໝາຍອັນດີໃນການຜັນຂະຫຍາຍການສ້າງ "ຄູ່ຮ່ວມຊະຕາກຳ ລາວ-ຈີນ" ທີ່ເຂັ້ມແຂງ ແລະ ໜຽວແໜ້ນໃນທຸກສະພາບການຂອງຍຸກໃໝ່ ທີ່ຜູ້ນໍາສູງສຸດຂອງສອງປະ ເທດໄດ້ຮ່ວມກັນຖະແຫຼງການໃນວັນທີ 5 ມິຖຸນາ 2026 ທີ່ຜ່ານມາ.
 |
ຕອນທ້າຍພິທີ, ຕາງໜ້າຄະນະນໍາກະຊວງ ສສກ ໄດ້ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງສູງມາຍັງລັດຖະບານ ແລະ ປະຊາຊົນຈີນ, ສະຖານທູດ ສປ ຈີນ ປະຈໍາລາວ, ມູນນິທິຈີນເພື່ອພັດທະນາຊົນນະບົດ ແລະ ທຸກພາກສ່ວນທີ່ໄດ້ໃຫ້ການຊ່ວຍເຫຼືອ ໃນການພັດທະນາຂະແໜງການສຶກສາ, ວິທະຍາສາດ ແລະ ກິລາຂອງ ສປປ ລາວ ດ້ວຍດີຕະຫຼອດມາ ພ້ອມທັງປະກາດເປີດໂຄງການກະເປົາແຫ່ງຄວາມຮັກສາກົນ ປະຈໍາປີ 2026 ຢ່າງເປັນທາງການ.
ຂ່າວ-ພາບ: ບຸນຕອມ
ຄໍາເຫັນ