ເປີດໂຄງການ ເສັ້ນທາງມໍລະດົກວຽງຈັນ ສົ່ງເສີມການທ່ອງທ່ຽວ ຢູ່ ນວ

ທ່ານ ນີນ ເລໂອນາກ ອຸປະທູດສະຫະພາບເອີຣົບ ປະຈຳ ລາວ, ພ້ອມດ້ວຍຜູ້ຕາງໜ້າຈາກ ສະຖານທູດຕ່າງປະເທດ ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ, ທ່ານ ພະຂັນໄຊ ສີຄັນໄຊ ຫົວໜ້າກົມມໍລະດົກ ກະຊວງ ຖວທ ໃຫ້ຮູ້ວ່າ: ໂຄງການ “ເສັ້ນທາງມໍລະດົກວຽງຈັນ” ເປັນກິດຈະກຳໜຶ່ງທີ່ຈັດຂຶ້ນ ເພື່ອສົ່ງເສີມການທ່ອງທ່ຽວ ຢູ່ນະຄອນຫຼວງວຽງຈັນ (ນວ) ຜ່ານການເຂົ້າເຖິງສະຖານທີ່ທ່ອງທ່ຽວ ແລະ ບັນດາອາຄານເຮືອນເກົ່າ ອັນມີຄຸນຄ່າສູງ ທີ່ເປັນເອກະລັກ ຢູ່ໃຈກາງນະຄອນຫຼວງວຽງຈັນ ທີ່ກວມເອົາລັດສະໝີ 2 ກິໂລແມັດ ໂດຍມີຈຸດໃຈກາງຈາກສວນສາທາລະນະນໍ້າພຸ (ບ້ານຊຽງຍືນ). ໂຄງການດັ່ງກ່າວ, ເປັນການສ້າງເງື່ອນໄຂໃຫ້ແກ່ນັກທ່ອງທ່ຽວ ໄດ້ມີທາງເລືອກໃນການທ່ອງທ່ຽວເພີ່ມຫຼາຍຂຶ້ນ ໂດຍສາມາດໄປທ່ຽວຊົມບັນດາອາຄານເກົ່າແກ່ ໄປຄຽງຄູ່ກັບບັນດາແຫຼ່ງທ່ອງທ່ຽວ ທາງວັດທະນະທຳ ແລະ ປະຫວັດສາດ ອື່ນໆ ທີ່ມີຢູ່ໃນນະຄອນຫຼວງວຽງຈັນ ຊຶ່ງບັນດາອາຄານເຮືອນເກົ່າແກ່ທີ່ຖືກຄັດເລືອກ ບັນຈຸເຂົ້າໃນໂຄງການນີ້ມີທັງໝົດ 69 ອາຄານ, ໃນນັ້ນ, ມີອາຄານລາວບູຮານ, ອາຄານແບບອານານິຄົມ ແລະ ອາຄານທີ່ມີທ່າແຮງ ທີ່ສາມາດນໍາໃຊ້ເຂົ້າໃນດ້ານການທ່ອງທ່ຽວ.
ໂຄງການດັ່ງກ່າວ, ແນໃສ່ເຮັດໃຫ້ສັງຄົມ ແລະ ບຸກຄົນທົ່ວໄປ ໄດ້ຮັບຮູ້, ເຂົ້າໃຈ ແລະ ເຫັນໄດ້ຄຸນຄ່າ ຄວາມໝາຍຄວາມສໍາຄັນ ຂອງອາຄານເກົ່າແກ່ທີ່ມີຢູ່ໃນໃຈກາງນະຄອນຫຼວງວຽງຈັນ ໃຫ້ຫຼາຍຂຶ້ນ ທັງເປັນການສະແດງໃຫ້ເຫັນເຖິງຄວາມງົດງາມມົນສະເໜ່ ແລະ ຈຸດພິເສດ ຂອງບັນດາອາຄານເກົ່າແກ່ ເຫຼົ່ານັ້ນ ທີ່ມີເອກະລັກ ຂອງຄວາມແຕກຕ່າງກັນຕາມແຕ່ລະຍຸກສະໄໝ ທີ່ຕິດພັນກັບປະຫວັດຄວາມເປັນມາ ແຫ່ງການຂະຫຍາຍຕົວຂອງຕົວເມືອງວຽງຈັນ ແລະ ຕິດພັນກັບແບບແຜນການດໍາລົງຊີວິດ, ຮີດຄອງປະເພນີ ຂອງຊາວນະຄອນຫຼວງວຽງຈັນ ນັບຕັ້ງແຕ່ອະດີດຈົນເຖິງປັດຈຸບັນ. ນອກນັ້ນ, ຍັງເປັນການປະກອບສວນເຂົ້າໃນການຄຸ້ມຄອງ, ອະນຸລັກ, ປົກປັກຮັກສາ ມໍລະດົກອັນຊົງຄຸນຄ່າຂອງຊາດ ໃຫ້ມີຄວາມຍືນຍົງສືບຕໍ່ໄປ.
ທ່ານ ພະຂັນໄຊ ສີຄັນໄຊ ຍັງໄດ້ສະແດງຄວາມຫວັງວ່າ ໂຄງການນີ້, ຈະເປັນຈຸດເລີ່ມຕົ້ນ ແລະ ເປັນຕົວແບບໃນການປູກຈິດສຳນຶກ ໃຫ້ແກ່ສັງຄົມ ເຫັນໄດ້ຄວາມໝາຍຄວາມສໍາຄັນ ຂອງການອະນຸລັກ, ປົກປັກຮັກສາ ແລະ ເສີມຄຸນຄ່າຂອງອາຄານເກົ່າແກ່ ທີ່ເປັນມໍລະດົກຂອງຊາດ ໃຫ້ມີຄວາມຍືນຍົງ ແລະ ປະກອບສ່ວນເຂົ້າໃນການສ້າງສາພັດທະນາທາງດ້ານເສດຖະກິດຂອງຊາດ. ພ້ອມນັ້ນ, ຍັງເປັນການ ໂຄສະນາ-ເຜີຍແຜ່ ການອະນຸລັກ-ປົກປັກຮັກສາ ແລະ ເສີມຄຸນຄ່າຂອງອາຄານເກົ່າແກ່ ທີ່ເປັນມໍລະດົກ ອັນລໍ້າຄ່າຂອງຊາດ ໃຫ້ສາມາດກາຍເປັນທາງເລືອກໃນການທ່ອງທ່ຽວ ຢູ່ນະຄອນຫຼວງວຽງຈັນ ໃຫ້ຫຼາກຫຼາຍຍິ່ງຂຶ້ນ.
ທ່ານ ນີນ ເລໂອນາກ ກໍໄດ້ສະແດງຄວາມພາກພູມໃຈ ທີ່ໄດ້ເປັນສ່ວນໜຶ່ງ ໃນການສະໜັບສະ
ໜູນ ວຽກງານການທ່ອງທ່ຽວ ກໍຄືໂຄງການ “ເສັ້ນທາງມໍລະດົກວຽງຈັນ” ຊຶ່ງຈະເຮັດໃຫ້ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຫັນເຖິງວັດທະນະທຳ ແລະ ມໍລະດົກ ທີ່ເປັນປະຫວັດສາດ ຂອງຊາດລາວ ກໍຄື ຂອງນະຄອຫຼວງວຽງຈັນ. ພ້ອມທັງ ສະແດງຄວາມຂອບໃຈ ຕໍ່ພາກສ່ວນທີ່ກ່ຽວຂ້ອງ ທີ່ໄດ້ປະກອບສ່ວນຢ່າງຕັ້ງໜ້າ ເຮັດໃຫ້ໂຄງການດັ່ງກ່າວ, ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທຳ.
ໂອກາດດຽວກັນ ຍັງໄດ້ເປີດນຳໃຊ້ເວັບໄຊwww.vientianeheritage.com ເພື່ອອຳນວຍຄວາມສະດວກໃຫ້ກັບນັກທ່ອງທ່ຽວ ໃນການເຂົ້າເຖິງແຫຼ່ງຂໍ້ມູນຕ່າງໆ ກ່ຽວກັບໂຄງການ “ເສັ້ນທາງມໍລະດົກວຽງຈັນ”ອີກດ້ວຍ.
(ຂ່າວ-ພາບ: ທະນູທອງ - ຂັນໄຊ)