ເປີດກິດຈະກໍາການປຸກລະດົມຂົນຂວາຍປ້ອງກັນການຄ້າມະນຸດ

ພິທີເປີດກິດຈະກໍາຄັ້ງນີ້ ໄດ້ຮວບຮວມເອົາຕົວແທນຈາກລັດຖະບານ ສປປ ລາວ, ອົງການສະຫະປະຊາຊາດ, ຄູ່ຮ່ວມພັດທະນາ, ອົງການຈັດຕັ້ງທາງສັງຄົມ, ນັກຮຽນ-ນັກສຶກສາ, ສື່ມວນຊົນ ແລະ ຂະ ແໜງການທູດ. ງານດັ່ງກ່າວໄດ້ສະທ້ອນໃຫ້ເຫັນເຖິງຄວາມມຸ່ງໝັ້ນຮ່ວມກັນໃນການເພີ່ມທະວີການປ້ອງກັນ, ການປົກປ້ອງຜູ້ຖືກເຄາະຮ້າຍ ແລະ ຜູ້ລອດຊີວິດ, ພ້ອມທັງເພີ່ມທະວີຄວາມຮ່ວມມືເພື່ອແກ້ໄຂບັນຫາການຄ້າມະນຸດ. ນອກຈາກນີ້, ຍັງໄດ້ຮັບຮູ້ເຖິງຄວາມເອົາໃຈໃສ່ຢ່າງຕໍ່ເນື່ອງຂອງລັດຖະບານ ໃນການຕ້ານການຄ້າມະນຸດ, ການຫຼອກລວງທາງອອນລາຍ ແລະ ອາຊະຍາກໍາທີ່ກ່ຽວຂ້ອງ ດ້ວຍການເພີ່ມທະວີການຈັດກິດຈະກໍາພາຍໃນປະເທດ ແລະ ຄວາມຮ່ວມມືໃນລະດັບພາກພື້ນ.

ການຄ້າມະນຸດເພື່ອບັງຄັບໃຫ້ກໍ່ອາຊະຍາກໍາຢູ່ສູນສະແກັມ ໄດ້ກາຍເປັນຮູບແບບການຄ້າມະນຸດທີ່ຂະຫຍາຍໂຕໄວທີ່ສຸດຮູບແບບໜຶ່ງ. ກຸ່ມອາຊະຍາກຳທີ່ມີການຈັດຕັ້ງ ໄດ້ນໍາໃຊ້ເຕັກໂນໂລຊີດິຈິຕອນ, ສື່ສັງຄົມອອນລາຍ ແລະ ໂຄສະນາຮັບສະໝັກວຽກປອມ ເພື່ອລໍ້ລວງປະຊາຊົນດ້ວຍຄໍາສັນຍາຕ່າງໆ ກ່ຽວກັບການເຮັດວຽກ. ຜູ້ເຄາະຮ້າຍຫຼາຍຄົນຖືກຄ້າມະນຸດໄປຍັງສູນສະແກັມ, ບ່ອນທີ່ພວກເຂົາຕ້ອງພົບເຈີກັບການຂົ່ມຂູ່, ຄວາມຮຸນແຮງ, ການບັງຄັບໃຊ້ແຮງງານ ແລະ ການລະເມີດສິດທິມະນຸດຢ່າງຮຸນແຮງອື່ນໆ.

ເນື່ອງຈາກວ່າ ເຍົາວະຊົນ ແລະ ໄວໜຸ່ມ ແມ່ນກຸ່ມທີ່ອາດຕົກເປັນເປົ້າໝາຍຂອງການຮັບສະໝັກວຽກຫຼອກລວງທາງອອນລາຍ, ຈຶ່ງເຮັດໃຫ້ການສ້າງຄວາມຮັບຮູ້ຕັ້ງແຕ່ຕົ້ນເປັນເຄື່ອງມືທີ່ສໍາຄັນໃນວຽກງານການປ້ອງກັນ. ໃນລະຫວ່າງພິທີເປີດ, ນັກຮຽນ-ນັກສຶກສາໄດ້ເຂົ້າຮ່ວມກິດຈະກໍາຮຽນຮູ້ແບບມີສ່ວນຮ່ວມ ຊຶ່ງນໍາພາໂດຍ UNODC, IOM, UNV ແລະ UNICEF ກ່ຽວກັບການຄ້າມະນຸດເພື່ອບັງຄັບໃຫ້ກໍ່ອາຊະຍາກໍາ, ການບັງຄັບໃຊ້ແຮງງານ ແລະ ການແຕ່ງງານແອບແຝງ/ການບັງຄັບແຕ່ງງານ.

ໃນພິທີເປີດ, ທ່ານ ບາໂຄເດຍ ເບີຄານອຝ (Mr. Bakhodir Burkhanov) ຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ ໄດ້ຮຽກຮ້ອງໃຫ້ມີວິທີການທີ່ຖືເອົາຜູ້ຖືກເຄາະຮ້າຍເປັນຈຸດໃຈກາງໃນການແກ້ໄຂບັນຫາການຄ້າມະນຸດເພື່ອບັງຄັບໃຫ້ກໍ່ອາຊະຍາກໍາ.

"ຜູ້ທີ່ຖືກຕົວະຍົວະ ຫຼື ຖືກບັງຄັບໃຫ້ເຂົ້າຮ່ວມໃນຂະບວນການຕົວະຍົວະຫຼອກລວງ ຕ້ອງໄດ້ຮັບຂໍ້ມູນ ແລະ ການປົກປ້ອງໃນຖານະຜູ້ຖືກເຄາະຮ້າຍຈາກການຄ້າມະນຸດ, ບໍ່ແມ່ນຖືກປະຕິບັດໃນຖານະຜູ້ກະທໍາຜິດທາງກົດໝາຍທີ່ພວກເຂົາຖືກບັງຄັບໃຫ້ເຮັດ. ພວກເຮົາສາມາດຊ່ວຍປ້ອງກັນບໍ່ໃຫ້ປະຊາຊົນຕົກເປັນຜູ້ຖືກເຄາະຮ້າຍຈາກອາຊະຍາກໍາເຫຼົ່ານີ້ໄດ້ ດ້ວຍການສ້າງຄວາມຮັບຮູ້, ການເພີ່ມທະວີການຮ່ວມມື ແລະ ການໃຫ້ຜູ້ລອດຊີວິດເປັນຈຸດໃຈກາງຂອງການຕອບຂອງພວກເຮົາ."

ທ່ານ ອາລົມລັງສີ ລາຊະວົງ ຮອງຫົວໜ້າກົມອົງການຈັດຕັ້ງສາກົນ ກະຊວງການຕ່າງປະເທດ ໄດ້ເນັ້ນໜັກເຖິງຄວາມສໍາຄັນຂອງການຮ່ວມມືຢ່າງຕໍ່ເນື່ອງ ແລະ ຄວາມພະຍາຍາມໃນການສ້າງຄວາມຮັບຮູ້ ເພື່ອເສີມສ້າງການປ້ອງກັນ ແລະ ການປົກປ້ອງເພື່ອສະກັດກັ້ນການຄ້າມະນຸດ.

ໃນພິທີປິດ, ທ່ານ ຣີເບັກກາ ມິລເລີ (Dr. Rebecca Miller) ຫົວໜ້າແຜນງານຂັ້ນພາກພື້ນ,ແຜນງານຕ້ານການຄ້າມະນຸດ ແລະ ການລັກລອບເອົາຄົນເຂົ້າເມືອງ ອົງການ UNODC, ໄດ້ເນັ້ນໜັກວ່າ ແຄັມເປນນີ້ເປັນຈຸດເລີ່ມຕົ້ນຂອງຄວາມພະຍາຍາມຢ່າງຕໍ່ເນື່ອງ ເພື່ອເຂົ້າເຖິງຊຸມຊົນທີ່ມີຄວາມສ່ຽງຫຼາຍທີ່ສຸດ.

"ກິດຈະກໍາການປຸກລະດົມຂົນຂວາຍຄັ້ງນີ້ ບໍ່ໄດ້ພຽງແຕ່ສ້າງຄວາມຮັບຮູ້ ແຕ່ມັນໄດ້ໃຫ້ຄວາມຮູ້ກັບປະຊາຊົນ ເພື່ອຮູ້ທັນຄວາມສ່ຽງກ່ອນທີ່ການກົດຂີ່ຂູດຮີດຈະເກີດຂຶ້ນ ຜົນໄດ້ຮັບທີ່ດີແມ່ນຂຶ້ນຢູ່ກັບການຮ່ວມມືຢ່າງຕໍ່ເນື່ອງ ລະຫວ່າງ ລັດຖະບານ, ຊຸມຊົນ, ຜູ້ລອດຊີວິດ, ອົງການຈັດຕັ້ງທາງສັງຄົມ, ສື່ມວນຊົນ ແລະ ພາກເອກະຊົນ." 

(ຂໍ້ມູນຂ່າວ: UNODC, ພາບ: ແສງຈັນ)