ເປີດນໍາໃຊ້ໂຮງແຮມ ຮໍລິເດ ອິນ ແອນ ສຫວີທສ໌ ວຽງຈັນ

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ແລະ ທ່ານ ເຈິນ ແທັງ ເໝີ້ນ ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ເຂົ້າຮ່ວມພິທີເປີດນໍາໃຊ້ ໂຮງແຮມ ຮໍລິເດ ອິນ ແອນ ສຫວີທສ໌ ວຽງຈັນ ໃນຕອນຄໍ່າວັນທີ 18 ຕຸລາຜ່ານມາ ທີ່ນະຄອນຄອນຫຼວງວຽງຈັນ (ນວ) ເນື່ອງໃນໂອກາດທີ່ ທ່ານ ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະ ເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ຫຼື AIPA-45 ຈັດຂຶ້ນໃນລະຫວ່າງວັນທີ 17-23 ຕຸລາ 2024 ນີ້.

ທ່ານ ພົຈວ ອຸດົມ ສີສົງຄາມ ຮອງຫົວໜ້າກົມໃຫຍ່ພະລາທິການ ກະຊວງປ້ອງກັນຄວາມສະຫງົບກ່າວວ່າ: ບໍລິສັດລົງທຶນ ແລະ ພັດທະນາວຽງຈັນ ຈໍາກັດ ເປັນວິສາຫະກິດຮ່ວມທຸລະກິດ ລະຫວ່າງ ກະຊວງປ້ອງກັນຄວາມສະຫງົບ ແລະ ບໍລິສັດລົງທຶນພັດທະນາ ການຜະລິດ ຮາລອງ ກຸ່ມບໍລິສັດບີມ (BIM Group) ເປັນຜູ້ລົງທຶນ. ໂຄງການກໍ່ສ້າງໂຮງແຮມ ຮໍລິເດ ອິນ ແອນ ສຫວີທສ໌ ວຽງຈັນ ເປັນໂຄງການທີ່ສຳຄັນ, ມີຂະໜາດໃຫຍ່ ແລະ ມີບົດບາດຕໍ່ກັບສາຍພົວພັນຮ່ວມມື ລະຫວ່າງ ສອງປະເທດ ລາວ-ຫວຽດນາມ, ເວົ້າສະເພາະແມ່ນ ການຮ່ວມມືທີ່ໜັກແໜ້ນ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ BIM Group ໄດ້ນໍາພາສ້າງໂຄງການໂຮງແຮມ 5 ດາວ ທີ່ມີມາດຖານ, ຄຸນນະພາບສູງຮັບໃຊ້ແກ່ສັງຄົມ ແລະ ຊຸກຍູ້ການຮ່ວມມືດ້ານເສດຖະກິດ, ວັດທະນະທໍາ ລະຫວ່າງ ສອງປະເທດ. ໂຮງແຮມແຫ່ງນີ້, ຕັ້ງຢູ່ຈຸດໃຈກາງຕົວເມືອງສີໂຄດຕະບອງ ເຂດຊຸມຊົນໃຈກາງເມືອງຂອງ ນວ ຊຶ່ງຈະໃຫ້ຄວາມສະດວກ, ບໍລິການທີ່ທັນສະໄໝ ໃຫ້ແກ່ແຂກທີ່ມາທ່ຽວ, ຢ້ຽມຢາມ ແລະ ເຮັດວຽກຢູ່ ສປປ ລາວ ເປັນການປະກອບສ່ວນໃຫ້ແກ່ການພັດທະນາເສດຖະກິດ ແລະ ການທ່ອງທ່ຽວຢູ່ ນວ.

ທ່ານ ດວນ ກ໊ວກ ຮຸຍ ຮອງປະທານບໍລິຫານ, ອຳນວຍການໃຫຍ່ກຸ່ມບໍລິສັດບີມ BIM Group, ໄດ້ແບ່ງປັນປະສົບການວ່າ: ໃນໄລຍະເວລາ 30 ປີທີ່ຜ່ານມາ, BIM Group ໄດ້ສຸ່ມກຳລັງໃສ່ໃນວຽກງານການສ້າງພັດທະນາຢ່າງບໍ່ຢຸດຢັ້ງ ເພື່ອສ້າງຄວາມເຊື່ອໝັ້ນ ແລະ ເປັນຈຸດຢືນໃຫ້ກັບຄູ່ຮ່ວມງານໃນການວາງແຜນຍຸດທະສາດການຕະຫຼາດ ຂອງກຸ່ມບໍລິຫານຄຸ້ມຄອງໂຮງແຮມທີ່ມີຊື່ສຽງລະດັບໂລກ; ພິເສດແມ່ນກຸ່ມບໍລິຫານ IHG Hotels & Resorts. ການປະສົບຜົນສຳເລັດຂອງ ໂຮງແຮມ Crowne Plaza Vientiane ເປັນໂຮງແຮມ 5 ດາວມາດຕະຖານສາກົນທຳອິດຢູ່ລາວ ແລະ ໄດ້ພິສູດໃຫ້ເຫັນເຖິງຄວາມສາມາດ ແລະ ການໃຫ້ຄຳໝັ້ນສັນຍາຂອງພວກເຮົາ ໃນການສ້າງພັດທະນາໂຄງການ ໃຫ້ໄດ້ຮັບໝາກຜົນ.

ໂຮງແຮມ ຮໍລິເດ ອິນ ແອນ ສຫວີທສ໌ ວຽງຈັນ ເປັນໂຄງການໜື່ງທີ່ຂຶ້ນກັບໂຄງການໂຮງແຮມ 5 ດາວຄົບວົງຈອນ-ສູນການຄ້າ ແລະ ຫ້ອງການໃຫ້ເຊົ່າເກຣດ A ໂດຍແມ່ນບໍລິສັດ BIM Group ແລະ ກະຊວງປ້ອງກັນຄວາມສະຫງົບ ຮ່ວມລົງທຶນພັດທະນາຂື້ນ, ເປັນໂຄງການແບບຢ່າງທີ່ພົ່ນເດັ່ນມີບົດບາດ ແລະ ຄວາມໝາຍສຳຄັນໃນສາຍພົວພັນຮ່ວມມື ລະຫວ່າງ ສອງປະເທດ ລາວ ແລະ ຫວຽດນາມ. ໂຄງການນີ້, ນຳໃຊ້ທຶນລົງທຶນທັງໝົດ 90.75 ລ້ານໂດລາ ຊຶ່ງໃນນັ້ນໄລຍະທີ 1 ໄດ້ເປີດນໍາໃຊ້ຢ່າງເປັນທາງການໃນປີ 2017 ລວມມີ: ໂຮງແຮມ 5 ດາວ ຄຣາວ ພລາຊ່າ ວຽງຈັນ ແລະ ອາຄານຫ້ອງການໃຫ້ເຊົ່າ ມີພື້ນທີ່ເຊົ່າ 6.000 ຕາແມັດ (ມ²); ໄລຍະທີ 2 ຂອງໂຄງການລວມມີ: ໂຮງແຮມ ຮໍລິເດ ອິນ ແອນ ສຫວີທສ໌ ວຽງຈັນ, ມີຫ້ອງປະຊຸມໃຫຍ່ ແລະ ອາຄານຫ້ອງການໃຫ້ເຊົ່າ - ສູນສັບພະສິນຄ້າເກຣດ A.

(ຂ່າວ-ພາບ: ສຸກສະຫວັນ)