ໃນພິທີ, ຜູ້ຕາງໜ້າບໍລິສັດ ສັນຕິສຸກ ກໍ່ສ້າງ ຜູ້ຮັບເໝົາໂຄງການໄດ້ລາຍງານກ່ຽວກັບການປັບປຸງ-ຕໍ່ເຕີມ ຫ້ອງສຸກເສີນ-ມໍລະສຸມ ແລະ ກ່າວມອບໂຄງການ. ໂຄງການດັ່ງກ່າວ, ໄດ້ເລີ່ມລົງມືຈັດຕັ້ງປະຕິບັດ (ກໍ່ສ້າງ) ນັບແຕ່ວັນທີ 15 ມີນາ ຫາ ວັນທີ 23 ທັນວາ 2024 ໄດ້ສໍາເລັດ ລວມມູນຄ່າໂຄງການແມ່ນ 6.268 ຕື້ກີບ.
ທ່ານ ຈັນທະລາ ພາມີສິດ ຜູ້ອໍານວຍການໂຮງໝໍແຂວງໄດ້ລາຍງານກ່ຽວກັບຄວາມເປັນມາຂອງການປັບປຸງ, ຕໍ່ເຕີມຫ້ອງສຸກເສີນ-ມໍລະສຸມ. ສໍາລັບການແພດສຸກເສີນແມ່ນຂະແໜງການແພດໜຶ່ງທີ່ເປັນດ່ານໜ້າຂອງລະບົບການປິ່ນປົວ ແລະ ແກ້ໄຂອາການເຈັບເປັນໃນເບື້ອງຕົ້ນພາຍໃນ 24 ຊົ່ວໂມງທັງພະຍາດທົ່ວໄປ ແລະ ອຸປະຕິເຫດໃຫ້ບໍລິການໂດຍຫ້ອງສຸກເສີນ.
ກ່ອນການປັບປຸງຫ້ອງສຸກເສີນ-ມໍລະສຸມ ມີສະພາບທາງດ້ານໂຄງສ້າງ, ພື້ນທີ່ຮັບຮອງຂອງຄົນເຈັບມີໜ້ອຍຫຼາຍ, ຫ້ອງສຳລັບຄົນເຈັບສຸກເສີນມີພຽງແຕ່ 64 ຕາແມັດ ຊຶ່ງບັນຈຸຕຽງນອນໄດ້ພຽງ 5 ຕຽງ ແລະ 2 ຕຽງສຳລັບຫ້ອງຫຍິບບາດແຜ. ຈາກສະຖິຕິການບໍລິການຜ່ານມາເຫັນວ່າມີຄົນເຈັບທີ່ເຂົ້າມາຮັບການປິ່ນປົວຢູ່ຫ້ອງສຸກເສີນປະມານ 60-70 ກໍລະນີ ຕໍ່ ວັນທັງພະຍາດທົ່ວໄປ ແລະ ອຸປະຕິເຫດ, ຊຶ່ງເຮັດໃຫ້ເກີດຄວາມແອອັດຕ້ອງເສີມຕຽງໃນແຕ່ລະໄລຍະ ຫຼື ນອນຕິດຕາມຢູ່ຕຽງລໍຖ້າ. ນອກນັ້ນ, ລະບົບໂຄງສ້າງເກົ່າຍັງບໍ່ເອື້ອອຳນວຍຄວາມສະດວກ ແລະ ບໍ່ໄດ້ມາດຕະຖານຂອງລະບົບບໍລິການ ແລະ ຕິດຕາມຂອງວິຊາການ; ຫ້ອງແພດ-ພະຍາບານຢູ່ຫ່າງຈາກຄົນເຈັບເຮັດໃຫ້ການຕິດຕາມຂອງແພດໝໍພົບຄວາມຫຍຸ້ງຍາກ; ເຊັ່ນດ່ຽວກັບຫ້ອງມໍລະສຸມທີ່ມີເນື້ອທີ່ສຳລັບຕຽງນອນພຽງ 88 ຕາແມັດ, ບັນຈຸສູງສຸດ 8 ຕຽງ.
ພາຍຫຼັງການປັບປຸງ, ຫ້ອງສຸກເສີນມີເນື້ອທີ່ເພື່ມຂຶ້ນ, ຊຶ່ງສາມາດບັນຈຸຕຽງໄດ້ 15-20 ຕຽງ,ຫ້ອງມໍລະສຸມ ສາມາດບັນຈຸໄດ້ 14-20 ຕຽງ, ສ່ວນຫ້ອງສຸກເສີນປະກອບດ້ວຍ 8 ຫ້ອງ, ຊຶ່ງແຕ່ລະຫ້ອງປະກອບດ້ວຍເຄື່ອງອຳນວຍຄວາມສະດວກຄົບຊຸດເຊັ່ນ: ລະບົບທຳຄວາມເຢັນ, ລະບົບລະບາຍອາກາດ, ລະບົບນໍ້າອຸ່ນ, ຝາທຸກຫ້ອງຕິດຕັ້ງກາໂຣເຊຣາມິກທີ່ຊ່ວຍປ້ອງກັນການຕິດເຊື້ອ ແລະ ການເກີດເຊື້ອເຫັດ ແລະ ອື່ນໆ.
ສ່ວນມໍລະສຸມປະກອບດ້ວຍ 7 ຫ້ອງ, ແຕ່ລະຫ້ອງປະກອບດ້ວຍເຄື່ອງອຳນວຍຄວາມສະດວກຄົບຊຸດ, ປັດຈຸບັນຫ້ອງມໍລະສຸມ, ມີບຸກຄະລາກອນທາງດ້ານການແພດຄົບຊຸດ. ນອກຈາກການປັບປຸງທາງດ້ານໂຄງລ່າງແລ້ວທ່ານເຈົ້າແຂວງຍັງສືບຕໍ່ສະໜັບສະໜູນອຸປະກອນທີ່ຈໍາເປັນປະກອບເຂົ້າໃສ່ທັງສອງພາກສ່ວນນີ້ເປັນຕົ້ນ: ຕຽງນອນສໍາລັບສຸກເສີນ ແລະ ມໍລະສຸມທີ່ທັນສະໄໝຈໍານວນ 20 ໜ່ວຍ,ຕຽງນອນນໍາສົ່ງຄົນເຈັບ 6 ໜ່ວຍ ແລະ ລໍ້ພະຍາບານບໍລິການວິຊາການ 2 ໜ່ວຍລວມມູນຄ່າທັງໝົດ 380 ລ້ານກວ່າກີບ.
ໃນພິທີ, ໃຫ້ກຽດຕັດແຖບຜ້າເປີດນໍາໃຊ້ເປັນທາງການຂອງທ່ານບຸນໂຈນ ອຸບົນປະເສີດເຈົ້າແຂວງສະຫວັນນະເຂດ, ທ່ານ ແສງດາວ ສີດາໄລ ຫົວໜ້າພະແນກສາທາລະນະສຸກແຂວງ ແລະ ທ່ານ ຈັນທະລາ ພາມີສິດ ຜູ້ອໍານວຍການໂຮງໝໍແຂວງ, ມີບັນດາແຂກຖືກເຊີນເຂົ້າຮ່ວມ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ