ໂດຍມີທ່ານ ນາງ ຊີຟ-ເລັງ ຊູອໍ ເອກອັກຄະລັດຖະທູດຝຣັ່ງປະຈໍາ ສປປ ລາວ, ທ່ານນາງ ປານີ ໄຊຍະວົງ ຜູ້ອໍານວຍການລາວແຟຊັ້ນວີກ ພ້ອມດ້ວຍບັນດານັກອອກແບບແຟຊັນທັງພາຍໃນ ແລະ ຕ່າງປະເທດ, ບໍລິສັດທີ່ໃຫ້ການສະໜັບສະໜູນເຂົ້າຮ່ວມ.
ໃນພິທີ, ທ່ານ ນາງ ຊີຟ-ເລັງ ຊູອໍກ່າວວ່າ: ປະເທດຝຣັ່ງ ເປັນປະເທດຊັ້ນນໍາຂອງໂລກດ້ານແຟຊັນ ແລະ ສິນຄ້າທີ່ມີຍີ່ຫໍ້,ເວົ້າສະເພາະປະເທດລາວ ກໍມີຄວາມອຸດົມສົມບູນດ້ານປະເພນີ, ການທັກແສ່ວທີ່ຍາວນານນັບເປັນພັນປີ ລວມທັງຄຸນນະພາບ ສີມືຫັດຖະກໍາຂອງລາວ. ເພື່ອໃຫ້ໄດ້ຮັບໝາກຜົນກວ່າເກົ່າ ຕ້ອງໄດ້ມີການແລກປ່ຽນ ໝາຍຄວາມວ່າ ປະເທດລາວເອງ ກໍຕ້ອງເສີມສ້າງຜົນງານການອອກແບບ ແລະ ຄວາມຮູ້ໃຫ້ແກ່ປະເທດຝຣັ່ງໄດ້ເຊັ່ນກັນ ເພື່ອເປັນການສະໜັບສະໜູນແນວຄວາມຄິດລິເລີ່ມຂອງລາວ. ຫົວຂໍ້ຂອງງານແຟຊັນວີກ ປີນີ້ ສອດຄ່ອງຢ່າງສົມບູນແບບກັບບຸລິມະສິດຂອງລາວ ໃນການສົ່ງເສີມການທ່ອງທ່ຽວແບບຍືນຍົງຂີ້ເຫຍື້ອເປັນສູນ (Zero Waste) ຊຶ່ງມີສອງຄວາມໝາຍ ໃນຄໍາດຽວ ນັ້ນກໍຄື “ຂີ້ເຫຍື້ອເປັນສູນ ແລະ ການຟຸ່ມເຟືອຍເປັນສູນ” ຊຶ່ງເປັນຄວາມປາຖະໜາຂອງສັງຄົມ ກໍຄື ຊາວໜຸ່ມ ພວກເຮົາຄວນທໍາການຜະລິດທີ່ດີກວ່າເກົ່າ ທີ່ສາມາດຫຼຸດຜ່ອນມົນລະພິດ ແລະ ຄວນບໍລິໂພກຢ່າງສົມເຫດສົມຜົນ.ຂະແໜງແຟຊັນ ແລະ ສິນຄ້າທີ່ມີຍີ່ຫໍ້ ຂອງປະເທດຝຣັ່ງສາມາດສ້າງວຽກເຮັດງານທໍາ ໄດ້ປະມານ 600,000ຕໍາແໜ່ງ ແລະ ສິນຄ້າທີ່ມີຍີ່ຫໍ້ກວມເອົາ 12% ຂອງການສົ່ງອອກ ສິນຄ້າທັງໝົດທີ່ມີມູນຄ່າສູງ 150ຕື້ເອີໂຣ. ຢູ່ປະເທດລາວຂະແໜງແຟຊັນ ກໍສາມາດປະກອບສ່ວນເຮັດໃຫ້ປະເທດລາວ ມີຈຸດດຶງດູດໃຈເຊັ່ນກັນ. ສະຖານທູດຝຣັ່ງມີຄວາມຍິນດີຈະສືບຕໍ່ສະໜັບສະໜູນ ການແລກປ່ຽນ ແລະ ການຮ່ວມມືຂະແໜງແຟຊັນລາວໃຫ້ເປັນທີ່ຍອມຮັບຂອງສາກົນ.
ທ່ານນາງ ປານີ ໄຊຍະວົງ ກ່າວວ່າ: ລາວແຟຊັນວີກ 2024 ເປັນປີທີ 11 ແຫ່ງການກໍ່ຕັ້ງແລະ ເປັນທີ່ຮູ້ກັນວ່າເປັນງານສະແດງອາພອນລະດັບສາກົນ ທີ່ມີບົດບາດ ແລະ ຄວາມໝາຍສໍາຄັນທີ່ສຸດຂອງລາວ. ສັບປະດາແຫ່ງການສະແດງອາພອນ ແລະ ສິລະປະການອອກແບບ ໄດ້ເລີ່ມຕົ້ນຂຶ້ນ ດ້ວຍການສະແດງອາພອນຈາກບັນດານັກອອກແບບທີ່ມີຊື່ສຽງຈາກລາວ ແລະຕ່າງປະເທດ ຊຶ່ງໄດ້ຈັດຂຶ້ນລະຫວ່າງວັນທີ 2-4 ຕຸລາ ນີ້ ແລະ ການວາງຂາຍສິນຄ້າຈາກບັນດານັກອອກແບບຕ່າງໆ ໃນລະຫວ່າງວັນທີ 1-6 ຕຸລາ ນີ້ ທີ່ສູການຄ້າພາກຊັນນະຄອນຫຼວງວຽງຈັນ.ທ່ານກ່າວຕື່ມວ່າ: ໜຶ່ງທົດສະຫວັດ ແຫ່ງການທຸ້ມເທ ທັງເຫື່ອແຮງ, ທຶນຮອນ ແລະ ສະຕິປັນຍາ ໃນການເສີມສ້າງ ແລະ ພັດທະນາວົງການແຟຊັ້ນຂອງລາວຈາກຈຸດເລີ່ມຕົ້ນທີ່ໜຸ່ມນ້ອຍ ທີ່ວົງການແຟຊັ້ນທົ່ວໄປໃນລາວ ຍັງບໍ່ໄດ້ຮັບການພັດທະນາ. ມາເຖິງປັດຈຸບັນ ລາວແຟຊັ້ນວີກ ໄດ້ນໍາເອົາວົງການແຟຊັ້ນຂອງລາວ ໄປຢູ່ໃນແຜນທີ່ຂອງແຟຊັ້ນຂອງໂລກ ດ້ວຍຄວາມສໍາເລັດຜົນ, ໄດ້ເຊື່ອມຕໍ່ໃຫ້ບັນດາຜູ້ຜະລິດແຜ່ນແພຂອງລາວ ແລະ ນັກອອກແບບລາວ ມີເຄື່ອຂາຍທຸລະກິດ ກັບເວທີສາກົນແລະ ທັງໄດ້ສ້າງຊັບພະຍາກອນ ບຸກຄົນ ທີ່ມີຄຸນນະພາບ ໃຫ້ແກ່ວົງການອອກແບບຂອງລາວ.
ຂ່າວ: ລາວແຟຊັນວີກ
ຄໍາເຫັນ