 |
ສະພາບນໍ້າຖ້ວມໃນຄັ້ງນີ້ໄດ້ສົ່ງຜົນກະທົບໂດຍກົງຕໍ່ 3 ຕາແສງ ຄື: ຕາແສງນາບໍ່, ຕາແສງນາໂຊກ ແລະ ຕາແສງພີດ, ລວມທັງໝົດ 17 ບ້ານ ປະກອບມີ: ບ້ານນາແດນ, ບ້ານໄຮ່, ໂພນແກ້ວ, ຫາດຊອນ, ແກ້ງມ່ວງ, ຈະກ້ວນ, ທ່າໂຈນ, ບ້ານເຕືອນ, ຫ້ວຍເຢັນ, ນາໂຊກ, ນາກະຕັງ, ໂພນແສດ, ຜາທຸງ, ໂຄກສະຫວ່າງ, ກວນພັນ, ບ້ານພີດ ແລະ ບ້ານໂພນສັງ. ໃນນີ້ ບ້ານທີ່ໄດ້ຮັບຜົນກະທົບໜັກແມ່ນບ້ານໂພນແສດ (ນໍ້າທີ່ໄຫຼເຂົ້າຖ້ວມທີ່ຢູ່ອາໄສຂອງປະຊາຊົນລະດັບນໍ້າສູງເຖິງ 100-150 ຊັງຕີແມັດ).
 |
ທົ່ວເມືອງຍົມມະລາດມີຈໍານວນຄອບຄົວທີ່ໄດ້ຮັບຜົນກະທົບລວມທັງໝົດ 1,122 ຄອບຄົວ, ເນື້ອທີ່ທຳການຜະລິດຖືກນ້ຳຖ້ວມ 2,053 ເຮັກຕາ, ລະບົບຄົມມະນາຄົມໄດ້ຮັບຄວາມເສຍຫາຍຢ່າງໜັກ, ເສັ້ນທາງຫຼາຍສາຍຖືກຕັດຂາດ ໂດຍສະເພາະເສັ້ນທາງບ້ານໄຮ່, ບ້ານໂພນແສດ, ບ້ານໂພນສັງ ເຮັດໃຫ້ລົດທຸກປະເພດບໍ່ສາມາດສັນຈອນໄປມາໄດ້. ນອກຈາກນີ້ ຍັງມີຂົວຖືກນໍ້າຖ້ວມ 2 ຈຸດ ແລະ ໂຮງຮຽນ 2 ແຫ່ງ (ໂຮງຮຽນປະຖົມບ້ານທ່າໂຈນ ແລະ ໂຮງຮຽນປະຖົມໂພນແສດ).
 |
ຄະນະກຳມະການຄຸ້ມຄອງໄພພິບັດເມືອງຍົມມະລາດ ໄດ້ລະດົມກຳລັງພົນກວ່າ 221 ຄົນ ຈາກພາກສ່ວນຕ່າງໆ ລົງປະຈຳການໃນແຕ່ລະຈຸດເພື່ອໃຫ້ການຊ່ວຍເຫຼືອສຸກເສີນ. ພ້ອມດຽວກັນນີ້ ຫຼາຍພາກສ່ວນທັງພາກລັດ ແລະ ເອກະຊົນ ໄດ້ໃຫ້ການສະໜັບສະໜູນງົບປະມານ, ເຄື່ອງອຸປະໂພກ-ບໍລິໂພກ ເພື່ອບັນເທົາທຸກໃຫ້ແກ່ປະຊາຊົນໃນເບື້ອງຕົ້ນ. ປັດຈຸບັນ ຄະນະກຳມະການຄຸ້ມຄອງໄພພິບັດຂັ້ນເມືອງ ຍັງສືບຕໍ່ຕິດຕາມສະພາບລະດັບນໍ້າຢ່າງໃກ້ຊິດ ເພື່ອກຽມພ້ອມຮັບມືກັບສະຖານະການດັ່ງກ່າວຢ່າງທັນການ.
ຕໍ່ກັບເຫດການໃນຄັ້ງນີ້, ໃນວັນທີ 11 ສິງຫາ 2026 ທ່ານ ໝັ້ນຍືນ ຄີນສະໝອນ ຮອງປະທານຄະນະກຳມະການປົກຄອງແຂວງຄໍາມ່ວນ ພ້ອມພະແນກການຂັ້ນແຂວງ ແລະ ຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ລົງຕິດຕາມພ້ອມທັງໄດ້ນໍາເອົາເຄື່ອງບໍລິໂພກ ນໍ້າດື່ມ ແລະ ອາຫານແຫ້ງ ຈໍານວນໜຶ່ງໄປມອບໃຫ້ແກ່ເມືອງຍົມມະລາດ ເພື່ອນໍາໄປແຈກຢາຍໃຫ້ແກ່ປະຊາຊົນ ຊຶ່ງຮັບໂດຍ ທ່ານ ເຫຼັງຄໍາ ໄຊຄໍາຜັນ ເລຂາພັກເມືອງ, ຫົວໜ້າຄະນະສະມາຊິກສະພາປະຊາຊົນ ປະຈໍາເຂດ້ລືອກຕັ້ງເມືອງຍົມມະລາດ. ພ້ອມດຽວກັນ ກໍໄດ້ລົງຕິດຕາມສະພາບນໍ້າຖ້ວມຢູ່ບ້ານໂພນແສດ ໂດຍໄດ້ນໍາເອົາເຄື່ອງບໍລິໂພກ ໄປມອບໃຫ້ແກ່ປະຊາຊົນ ເພື່ອສະແດງເຖິງຄວາມເປັນຫ່ວງເປັນໃຍ ແລະ ເປັນກຳລັງໃຈ ເພື່ອໃຫ້ປະຊາຊົນພ້ອມກັນສູ້ຊົນ ແລະ ກ້າວຜ່ານວິກິດການຄັ້ງນີ້ໄປໂດຍໄວ.
ຂ່າວ: ກອງຄໍາ
ຄໍາເຫັນ