ຜະລິດຕະພັນເຜົ່າມົ້ງຮ່ວມວາງສະແດງໃນງານນິເທດສະການ “ຄຸນຄ່າພູມປັນຍາລາວ” ຄັ້ງທີ 1

ທ່ານ ລີປໍ ທໍ່ຕູ້ລີ ຫົວໜ້າພະແນກສະຖາບັນຄົ້ນຄວ້າ ວັດທະນະທຳ ສະຖາບັນວິທະຍາສາດ ເສດຖະກິດ ແລະ ສັງຄົມແຫ່ງຊາດ ໃຫ້ສຳພາດຕໍ່ຜູ້ຂຽນຫວ່າງມໍ່ໆມານີ້ວ່າ: ໃນໂອກາດເຂົ້າຮ່ວມງານ ນິເທດສະການ “ຄຸນຄ່າພູມປັນຍາລາວ” ຄັ້ງທີ 1 ໄດ້ນໍາເອົາຜະລິດຕະພັນພູມປັນຍາຂອງຊົນເຜົ່າມົ້ງມາວາງສະແດງ ປະກອບມີ: ເຄື່ອງດົນຕີ, ເຄື່ອງນຸ່ງ, ປຶ້ມ, ສະໝຸນໄພ ແລະ ຜະລິດຕະພັນຫັດຖະກຳຕ່າງໆ. ໜຶ່ງໃນຜະລິດຕະພັນສໍາຄັນທີ່ນໍາມາສະແດງແມ່ນ ແຄນມົ້ງ ຊຶ່ງເປັນເຄື່ອງດົນຕີພື້ນເມືອງ ທີ່ສືບທອດກັນມາແຕ່ດຶກດຳບັນ ແລະ ມີຄວາມສໍາຄັນຕໍ່ ສິລະປະວັນນະຄະດີ ແລະ ວິຖີຊີວິດຂອງຊົນເຜົ່າມົ້ງ.

ນອກຈາກແຄນແລ້ວ ຊົນເຜົ່າມົ້ງ ຍັງມີເຄື່ອງດົນຕີພື້ນເມືອງອື່ນໆເຊັ່ນ: ປີ່ ແລະ ຂຸ່ຍ ແຕ່ໃນງານຄັ້ງນີ້ ໄດ້ນໍາເອົາແຄນມາສະແດງເປັນຫຼັກ. ສໍາລັບດ້ານເຄື່ອງນຸ່ງໄດ້ນໍາເອົາຊຸດປະຈຳເຜົ່າມົ້ງມາວາງສະແດງທັງຊຸດຜູ້ຍິງ ແລະ ຊຸດຜູ້ຊາຍ ໃນນັ້ນ ມີຊຸດຂອງມົ້ງຂຽວ ຊຶ່ງປະກອບມີ: ກະໂປ່ງ, ເສື້ອ, ໝວກ ແລະ ເຄື່ອງປະດັບອື່ນໆ. ສ່ວນຊຸດຜູ້ຊາຍປະກອບມີ, ໂສ້ງ, ເສື້ອ ແລະ ຜ້າແພ, ເຄື່ອງນຸ່ງຂອງມົ້ງຂາວ, ມົ້ງດຳ ແລະ ມົ້ງລາຍ. ເຄື່ອງນຸ່ງມົ້ງແຕ່ລະກຸ່ມມີຮູບແບບ-ລວດລາຍ ແລະ ສີມືທີ່ເປັນເອກະລັກສະເພາະຂອງຕົນ.

ໃນປັດຈຸບັນເຄື່ອງນຸ່ງທີ່ນໍາມາຕັດໃສ່ໃນຊີວິດປະຈຳວັນ ແລະ ນໍາມາຈັດສະແດງຍັງຄົງເນັ້ນໃສ່ຮູບແບບຂອງມົ້ງລາຍ, ມົ້ງຂຽວ, ມົ້ງຂາວ ແລະ ມົ້ງດໍາ. ນອກຈາກ ສິນຄ້າຫັດຖະກຳ ແລະ ເຄື່ອງນຸ່ງແລ້ວ ພາຍໃນຮ້ານສະແດງ ຍັງມີປື້ມທີ່ຮວບຮວມຂໍ້ມູນກ່ຽວກັບ ບັນດາວິລະຊົນແຫ່ງຊາດ, ນັກຮົບແຂ່ງຂັນ, ນັກປະຕິວັດອາວຸໂສ ແລະ ພະນັກງານບຳນານ ລວມເຖິງປື້ມຄົ້ນຄວ້າກ່ຽວກັບບັນດາຊົນເຜົ່າໃນ ສປປ ລາວ. ເຖິງວ່າ ປຶ້ມຄົນຄວ້າກ່ຽວກັບບັນດາຊົນເຜົ່າໃນ ສປປ ລາວ ເຫຼົ່ານີ້ ເປັນຜົນງານຈາກການຄົ້ນຄວ້າ ຂອງນັກປັນຍາຊົນ, ນັກວິທະຍາສາດ ແລະ ນັກຄົ້ນຄວ້າຂອງສະຖາບັນ. ປັດຈຸບັນ ສະຖາບັນມີຜົນງານປຶ້ມຄົ້ນຄວ້າກ່ຽວກັບຫຼາຍຊົນເຜົ່າເຊັ່ນ: ຕະໂອ້ຍ, ຕຣຽງ, ຕຣີ, ໄທແດງ, ໄທດຳ ແລະ ມົ້ງ ເປັນຕົ້ນ, ພ້ອມນີ້ ຍັງໄດ້ນໍາເອົາພູມປັນຍາການແພດພື້ນເມືອງມາວາງສະແດງ ເຊັ່ນ: ຂີງດຳ, ພືດສະໝຸນໄພ, ນໍ້າເຜິ້ງ ແລະ ຜະລິດຕະພັນອື່ນໆ ທີ່ເປັນພູມປັນຍາຂອງທ້ອງຖິ່ນ.

ທ່ານ ລີປໍ ທໍ່ຕູ້ລີ ກ່າວຕື່ມວ່າ: ຂ້າພະເຈົ້າຮູ້ສຶກ ດີໃຈທີ່ໄດ້ມີໂອກາດນໍາເອົາຜົນງານ ແລະ ຜະລິດຕະພັນພູມປັນຍາມາຮ່ວມວາງສະແດງ ເພາະເປັນເວທີສໍາຄັນ ໃນການແລກປ່ຽນ-ເຜີຍແຜ່ ແລະ ປະຊາສຳພັນຄຸນຄ່າຂອງພູມປັນຍາທ້ອງຖິ່ນ ໃຫ້ເປັນທີ່ຮັບຮູ້ຫຼາຍຂຶ້ນ, ການນໍາເອົາຜະລິດຕະພັນເຫຼົ່ານີ້ ມາຮ່ວມງານ ນອກຈາກຈະເປັນການເຜີຍແຜ່ພູມປັນຍາ ຂອງຊົນເຜົ່າມົ້ງແລ້ວ ຍັງເປີດໂອກາດໃຫ້ບັນດາຊົນເຜົ່າອື່ນໆໄດ້ແລກປ່ຽນ-ຮຽນຮູ້ ແລະ ເຫັນເຖິງຄຸນຄ່າຂອງມໍລະດົກພູມປັນຍາທີ່ມີຢູ່ໃນ ສປປ ລາວ ອີກດ້ວຍ.