ພະນະທ່ານນາຍົກລັດຖະມົນຕີ ສໍາເລັດການຢ້ຽມຢາມ ສະຫະພັນ ຣັດເຊຍ

ຈຸດປະສົງ ຂອງການຢ້ຽມຢາມຄັ້ງນີ້ ແມ່ນເພື່ອສືບຕໍ່ຮັດແໜ້ນ, ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມມາແຕ່ດົນນານ ໃນທຸກຂົງເຂດວຽກງານ ລະຫວ່າງ ລັດຖະບານ ກໍຄື ປະຊາຊົນ ລາວ ແລະ ຣັດເຊຍ, ພ້ອມທັງ ຜັນຂະຫຍາຍຜົນການພົບປະສອງຝ່າຍ ລະຫວ່າງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ພະນະທ່ານ ວະລາດີເມຍ ປູຕິນ ປະທານາທິບໍດີ ແຫ່ງ ສ ຣັດເຊຍ ຕະຫຼອດໄລຍະຜ່ານມາ.

ໃນໂອກາດການຢ້ຽມຢາມຄັ້ງນີ້, ສອງຝ່າຍ ໄດ້ທົບທວນຄືນ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດໃນໄລຍະຜ່ານມາ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງບົນພື້ນຖານຄວາມໄວ້ເນື້ອເຊື່ອໃຈ, ການສະໜັບສະໜູນຊຶ່ງກັນ ແລະ ກັນ ແລະ ການຈັດຕັ້ງປະຕິບັດ ຖະແຫຼງການ ວ່າດ້ວຍ ການເປັນຄູ່ຮ່ວມມືຍຸດທະສາດ ໃນພາກພື້ນ ອາຊີ-ປາຊີຟິກ ລະຫວ່າງ ສປປ ລາວ ແລະ ສ ຣັດເຊຍ.ນອກຈາກນັ້ນ, ສອງຝ່າຍ ໄດ້ປຶກສາຫາລື ກ່ຽວກັບການຮ່ວມມືທາງດ້ານການເມືອງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະກິດ, ການຄ້າ, ການລົງທຶນ, ດ້ານພະລັງງານ, ການຂົນສົ່ງ, ການສຶກສາ, ຂໍ້ມູນຂ່າວສານເຕັກໂນໂລຊີ ແລະ ການສື່ສານ, ສາທາລະນະສຸກ, ການທ່ອງທ່ຽວ ແລະ ອື່ນໆຊຶ່ງສອງປະເທດ ມີຜົນປະໂຫຍດຮ່ວມກັນ, ລວມທັງການກຳນົດທິດທາງແຜນການຮ່ວມມືໃນອະນາຄົດ ເພື່ອຮັດແໜ້ນການພົວພັນການຮ່ວມມື ທີ່ມີມາແລ້ວນັ້ນ ໃຫ້ກ້າວເຂົ້າສູ່ລວງເລິກ ແລະ ເປັນຮູບປະທໍາຍິ່ງຂຶ້ນ.

ພະນະທ່ານ ສອນໄຊ ສີພັນດອນ ໄດ້ສະແດງຄວາມຂອບໃຈ ລັດຖະບານ ແລະ ປະຊາຊົນຣັດເຊຍ ຕໍ່ການຊ່ວຍເຫຼືອ ສປປ ລາວ ໃນໄລຍະຜ່ານມາ ໂດຍສະເພາະການພັດທະນາຊັບພະຍາກອນມະນຸດ ກໍຄື ການໃຫ້ທຶນການສຶກສາແກ່ນັກສຶກສາລາວໃນແຕ່ລະປີ, ການສ້າງຄວາມເຂັ້ມແຂງດ້ານບຸກຄະລາກອນໃນຂະແໜງການຕ່າງໆ. ພ້ອມດຽວກັນນີ້, ຍັງໄດ້ສະແດງຄວາມຊົມເຊີຍການຮ່ວມມືຢ່າງໃກ້ຊິດ ຂອງບັນດາພາກສ່ວນທີ່ກ່ຽວຂ້ອງຂອງສອງຝ່າຍເພື່ອສ້າງໂຮງຮຽນ ມິດຕະພາບ ລາວ-ຣັດເຊຍ ທີ່ນະຄອນຫຼວງວຽງຈັນ ໃນອະນາຄົດອັນໃກ້ນີ້.

ນອກຈາກການພົບປະສອງຝ່າຍ, ພະນະທ່ານ ສອນໄຊ ສີພັນດອນ ຍັງໄດ້ໄປຢ້ຽມຢາມ ສະຖານທີ່ສຳຄັນທາງປະຫວັດສາດ ແລະ ວັດທະນະທຳຂອງ ຣັດເຊຍ ເປັນຕົ້ນແມ່ນ ສວນໄຊຊະນະ, ສະໜາມແດງ ແລະ ອື່ນໆ. ໃນວາລະສຸດທ້າຍຂອງການຢ້ຽມຢາມ ສ ຣັດເຊຍ ຄັ້ງນີ້, ພະນະທ່ານ ສອນໄຊ ສີພັນດອນ ຍັງໄດ້ເຂົ້າຮ່ວມ ແລະ ກ່າວໃນງານພົບປະພາກທຸລະກິດ ລະຫວ່າງ ສປປ ລາວ ແລະ ສ ຣັດເຊຍ.

ການຢ້ຽມຢາມ ສຣັດເຊຍ ຂອງ ພະນະທ່ານ ສອນໄຊ ສີພັນດອນ ໃນຄັ້ງນີ້ ໄດ້ປະສົບຜົນສຳເລັດຕາມລະດັບຄາດໝາຍ, ພ້ອມທັງ ໄດ້ຮັບການຕ້ອນຮັບຢ່າງອົບອຸ່ນ ແລະ ດໍາເນີນໄປຢ່າງສົມກຽດແຕ່ຕົ້ນຈົນຈົບ. ພ້ອມກັນນັ້ນ, ການເດີນທາງຢ້ຽມຢາມ ສ ຣັດເຊຍ ໃນຄັ້ງນີ້ ຍັງໄດ້ປະກອບສ່ວນອັນສໍາຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອມາແຕ່ດົນນານ ລະຫວ່າງ ສອງລັດຖະບານ ແລະ ປະຊາຊົນສອງຊາດ ສປປ ລາວ ແລະ ສ ຣັດເຊຍ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

(ຂ່າວ: ກຕທ)