ຜ່ານຮ່າງດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກອງທັບປະຊາຊົນລາວ

ໃນກອງປະຊຸມ, ສະຫາຍ ພັນເອກ ພັນສະໄໝ ວິໄລ ຮອງຫົວໜ້າກົມກົດໝາຍ ກົມໃຫຍ່ການເມືອງກອງທັບ ໄດ້ລາຍງານຈຸດປະສົງຂອງການປັບປຸງດຳລັດ ຍ້ອນການເຕີບໃຫຍ່ຂະຫຍາຍຕົວຂອງກອງທັບປະຊາ ຊົນລາວ ເປັນຕົ້ນການປັບປຸງສ້າງຕັ້ງກົມກອງເຫຼົ່າຮົບທີ່ຈັດຕັ້ງໃນປັດຈຸບັນ ຊຶ່ງດໍາລັດບໍ່ໄດ້ກຳນົດໄວ້, ການກໍານົດເນື້ອໃນບາງມາດຕາຂອງດໍາລັດຍັງບໍ່ຄົບຖ້ວນກັບກົດໝາຍ ແລະ ນິຕິກຳທີ່ກ່ຽວຂ້ອງ ເປັນຕົ້ນໂຄງປະກອບ (ໂຄ່ງຮ່າງຂອງດໍາລັດ ຍັງບໍ່ສອດຄ່ອງກັບຄໍາແນະນໍາຂອງກະຊວງພາຍໃນ ກ່ຽວກັບການສ້າງນິຕິກໍາ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງບັນດາກະຊວງ), ໜ້າທີ່, ຂອບເຂດສິດ ແລະ ໂຄງປະກອບການຈັດຕັ້ງ ຍັງບໍ່ທັນກຳນົດໃຫ້ລະອຽດ ແລະ ສອດຄ່ອງກັບກົດໝາຍ ວ່າດ້ວຍການປ້ອງກັນຊາດ, ກົດໝາຍ ວ່າດ້ວຍນາຍທະຫານກອງທັບປະຊາຊົນລາວ, ກົດໝາຍ ວ່າດ້ວຍລັດຖະບານ ແລະ ນິຕິກຳອື່ນໆທີ່ກ່ຽວຂ້ອງ. ນອກນີ້, ຍັງມີບັນຫາອື່ນໆ ທີ່ຕິດພັນກັບວຽກງານປ້ອງກັນຊາດ. ຈາກເຫດຜົນດັ່ງກ່າວ, ຈຶ່ງເຫັນວ່າມີຄວາມຈໍາເປັນຕ້ອງໄດ້ປັບປຸງດຳລັດສະບັບດັ່ງກ່າວນີ້ໃຫ້ມີເນື້ອໃນລະອຽດ, ຄົບຖ້ວນ ແລະ ສົມບູນຍິ່ງຂຶ້ນ. ຊຶ່ງຮ່າງດໍາລັດ ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງກະຊວງປ້ອງກັນປະເທດ (ສະບັບປັບປຸງ) ປະກອບມີ 5 ໝວດ, 13 ມາດຕາ. ໃນນີ້, ໄດ້ຕັດອອກ 2 ໝວດ ແລະ 1 ມາດຕາ, ປັບປຸງ 11 ມາດຕາ, ໂຮມເຂົ້າກັນ 2 ມາດຕາ, ຮັກສາເດີມ 1 ມາດຕາ, ເພີ່ມໃໝ່ 1 ມາດຕາ. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພາກັນຄົ້ນຄວ້າ ແລະ ປະ ກອບຄຳຄິດເຫັນຢ່າງກົງໄປກົງມາໃສ່ຮ່າງດໍາລັດ ເພື່ອເຮັດໃຫ້ມີຄວາມສົມບູນ ແລະ ຄົບຖ້ວນຂຶ້ນຕື່ມ.

ໂອກາດນີ້, ສະຫາຍ ພົນໂທ ວົງສອນ ອິນປານພິມ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດ ຊອບ ທີ່ໄດ້ພ້ອມກັນເອົາໃຈໃສ່ຄົ້ນຄວ້າ, ປະກອບຄໍາເຫັນໃສ່ຮ່າງດຳລັດ ວ່າດ້ວຍການຈັດຕັ້ງ ແລະ ການເຄື່ອນ ໄຫວຂອງກະຊວງປ້ອງກັນປະເທດ (ສະບັບປັບປຸງ), ຜ່ານການຄົ້ນຄວ້າ ແລະ ປຶກສາຫາລືກັນຢ່າງກົງໄປກົງມາ ຄະນະຮັບຜິດຊອບໄດ້ມີຄວາມເປັນເອກະພາບສູງ ຕໍ່ບັນດາເນື້ອໃນທີ່ເຫັນວ່າຄວນໄດ້ປັບປຸງຄືນໃໝ່ ເພື່ອເຮັດໃຫ້ຮ່າງດຳລັດສະບັບນີ້ ມີເນື້ອໃນສົມບູນຄົບຖ້ວນຂຶ້ນຕື່ມ, ຊຶ່ງໄດ້ສະແດງເຖິງຄວາມເອົາໃຈໃສ່ ແລະ ຮັບຜິດຊອບສູງຕໍ່ໜ້າທີ່ການເມືອງຂອງຄະນະຮັບຜິດຊອບຊີ້ນຳລວມ ກໍຄືອະນຸກຳມະການເນື້ອໃນປັບປຸງຮ່າງດໍາລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງປ້ອງກັນປະເທດ (ສະບັບປັບປຸງ). ການປັບປຸງຄັ້ງນີ້, ເຫັນວ່າມີຄວາມຈະແຈ້ງ, ຮັດກຸມ, ຊັດເຈນ, ເຂົ້າໃຈງ່າຍ ແລະ ສອດຄ່ອງກັບວຽກງານຕົວຈິງຂອງກະຊວງປ້ອງກັນປະເທດ.

ຂ່າວ: ເກດແກ້ວ