ໂດຍ: ບຸນຕອມ
ທ່ານ ຈັນເພັງ ສຸດທິວົງ ຮອງປະທານ ສນຊ ໄດ້ລາຍງານຕໍ່ກອງປະຊຸມຄະນະປະຈຳສູນກາງແນວສ້າງຊາດ (ສນຊ) ເປີດກ້ວາງຄັ້ງທີ 2 ສະໄໝທີ XI ວ່າ: ພາຍຫຼັງທີ່ມີມະຕິສະບັບເລກທີ 55/ຄປຈ ວ່າດ້ວຍການສ້າງລາຍຮັບເພີ່ມຂອງແນວລາວສ້າງຊາດໃນໄລຍະໃໝ່ ຊຶ່ງຫ້ອງການ ສນຊ ໄດ້ນຳສົ່ງມະຕິສະບັບດັ່ງກ່າວ ໃຫ້ແນວລາວສ້າງຊາດບັນດາແຂວງ ເພື່ອຄົ້ນຄວ້າຜັນຂະຫຍາຍເຂົ້າໃນແຜນວຽກຂອງຕົນເອງ ຊຶ່ງກໍມີຫຼາຍແຂວງ ໄດ້ມີການຈັດຕັ້ງເຊື່ອມຊຶມໃຫ້ກໍາມະການແນວ, ທີ່ປຶກສາ ແລະ ຄູ່ຮ່ວມງານຂັ້ນຂອງຕົນ ມີບາງແຂວງ ໄດ້ມີການຄົ້ນຄວ້າກິດຈະການຕ່າງໆເພື່ອຈະສ້າງເປັນກອງທຶນສາມັກຄີ ແລະ ພັດທະນາ ແນວລາວສ້າງຊາດ ໃນຕໍ່ໜ້າ.
ຄະນະຮັບຜິດຊອບດັ່ງກ່າວກໍໄດ້ສືບຕໍ່ຄົ້ນຄວ້າຮ່າງດຳລັດ ຂອງລັດຖະບານ ວ່າດ້ວຍການສ້າງລາຍຮັບເພີ່ມ ຂອງແນວລາວສ້າງຊາດ ໃນໄລຍະໃໝ່ ແລະ ປັດຈຸບັນພວມປະສານສົມທົບພາກສ່ວນກ່ຽວຂ້ອງຕາມລະບຽບເຊັ່ນ: ກະຊວງການເງິນ, ກະຊວງຍຸຕິທໍາ ແລະ ກະຊວງພາຍໃນ. ເພື່ອຜັນຂະຫຍາຍມະຕິ 55/ຄປຈ ໃນພາກປະຕິບັດຕົວຈິງ ພວກເຮົາໄດ້ມີການຄົ້ນຄວ້າ ແລະ ກະກຽມດຳເນີນໂຄງການທົດລອງສ້າງລາຍຮັບເພີ່ມຈຳນວນໜຶ່ງ ເປັນຕົ້ນແມ່ນ: 1. ໂຄງການສິນເຊື່ອກາກບອນ, ການເຮັດນາປຽກສະຫຼັບແຫ້ງ ໝາຍວ່າຈະດໍາເນີນໃນພື້ນທີ່ມີຊົນລະປະທານ ແລະ ສາມາດເຮັດນາແຊງໃນລະດູແລ້ງ. ພ້ອມນັ້ນ, ຄະນະຮັບຜິດຊອບໂຄງການສິນເຊື່ອກາກບອນ ສນຊ ຈະໄດ້ລົງໄປປຶກສາຫາລື ແລະ ເຜີຍແຜ່ເນື້ອໃນຈິດໃຈຂອງໂຄງການກັບແນວລາວສ້າງຊາດແຂວງ, ພະແນກການກ່ຽວຂ້ອງຂອງແຂວງ ຢູ່ 2 ແຂວງ ຄື: ແຂວງຄຳມ່ວນ ຈະລົງຢູ່ເມືອງໜອງບົກ ແລະ ແຂວງສະຫວັນນະເຂດ ຈະລົງຢູ່ເມືອງໄຊບູລີ ຍ້ອນວ່າ 2 ເມືອງດັ່ງກ່າວ ມີເງື່ອນໄຂທີ່ເໝາະແກ່ການສ້າງໂຄງການທົດລອງ ຍ້ອນມີລະບົບຊົນລະປະທານ ແລະ ຈະເລີ່ມຈັດຕັ້ງປະຕິບັດໂຄງການຕົວຈິງ ໃນທ້າຍເດືອນ 12/2023 ເປັນຕົ້ນໄປ ແລະ ຄາດວ່າໂຄງການດັ່ງກ່າວຈະນໍາເອົາຜົນປະໂຫຍດມາສູ່ປະຊາຊົນ; 2. ໂຄງການຮ່ວມມືລະຫວ່າງ ສນຊ ກັບ ກຸ່ມບໍລິສັດ ພົງສະຫວັນ ຈຳກັດ ໂຄງການນີ້ແມ່ນແນໃສ່ແກ້ໄຂຄວາມທຸກຍາກຂອງປະຊາຊົນຕິດພັນກັບການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ.
ທ່ານກ່າວຕື່ມວ່າ: ຜ່ານການຈັດຕັ້ງປະຕິບັດໃນໄລຍະຜ່ານມາ ຈົນເຖິງປັດຈຸບັນ ກອງທຶນມີທັງໝົດ 38 ກອງທຶນ ຊຶ່ງຈັດຕັ້ງຂຶ້ນໃນ 10 ແຂວງ ຄື: ໄຊສົມບູນ; ໄຊຍະບູລີ; ຫົວພັນ; ນະຄອນຫຼວງວຽງຈັນ; ສະຫວັນນະເຂດ; ຄຳມ່ວນ; ຈຳປາສັກ; ເຊກອງ; ສາລະວັນ ແລະ ແຂວງອັດຕະປື. ໃນ 10 ແຂວງດັ່ງກ່າວ ແມ່ນໄດ້ມີກິດຈະກໍາດັ່ງນີ້: ແຂວງໄຊສົມບູນ: ໄດ້ສ້າງກອງທຶນ ແລະ ສ້າງສູນກະສິກຳຕົວແບບ ປັດຈຸບັນ ຢູ່ສູນໄດ້ທົດລອງປູກຜັກ-ໝາກໄມ້ໃນເຮືອນຮົ່ມ ເຊັ່ນ: ໝາກອາງຸ່ນ, ໝາກໂມ, ໝາກເມລອນ, ປູກເຂົ້າ ແລະ ອື່ນໆ; ສຳລັບດ້ານການລ້ຽງສັດ: ໄດ້ມີການລ້ຽງງົວພັນນົມ, ແບ້, ໝູປ່າ, ເປັນ, ໄກ່, ປາ ແລະ ອື່ນໆ ຢູ່ຈຸດສຸມ 516 ເມືອງລ້ອງຊານ, ແຂວງຫົວພັນ: ມີການສ້າງສູນເຕັກນິກກະສິກຳຢູ່ ບ້ານນາໄກ່ ແລະ ບ້ານວຽງໄຊ ເມືອງວຽງໄຊ ໄດ້ມີການທົດລອງປູກຕົ້ນໝາກ ມ່ວງ, ໝາກໄພ, ໝາກໝັ້ນຫວານ, ໝາກນາວ, ໝາກກ້ຽງໃຫຍ່ ແລະ ໄດ້ດຳເນີນໂຄງການກໍ່ສ້າງໂຮງແຮມເມືອງວຽງໄຊ ແລະ ອື່ນໆ, ແຂວງຄຳມ່ວນ: ກຳລັງສ້າງສູນພັດທະນາ ກະສິກຳທັນສະໄໝ ແບບຄົບວົງຈອນ ທີ່ບ້ານໂພນເຍຍນ້ອຍ ເມືອງທ່າແຂກ, ແຂວງສະຫວັນນະເຂດ: ສ້າງສູນທົດລອງຂອງກອງທຶນ ຢູ່ບ້ານລະຫານໍ້າ ເມືອງສອງຄອນ, ບ້ານຍາງຄໍ້າ ເມືອງໄຊບູລີ ແລະ ບ້ານດົງຄຳໝື່ນ ເມືອງຈຳພອນ ແລະ ຢູ່ເມືອງອື່ນໆອີກຈຳນວນໜຶ່ງ ຢູ່ແຂວງສະຫວັນນະເຂດນີ້ໄດ້ມີການເຮັດໂຄງການນາໄຮ່ໃຫຍ່, ໂຄງການຊົນລະປະທານຂະໜາດນ້ອຍໂຄງການຈົກໜອງໄວ້ລ້ຽງປາ ແລະ ອື່ນໆ, ນະຄອນຫຼວງວຽງຈັນ: ກອງທຶນ ບ້ານປາກແຖບ ເມືອງສັງທອງ ໄດ້ດຳເນີນການປູກພືດກະສິກຳເຊັ່ນ: ປູກຕົ້ນກ້ວຍ, ໝາກມັງກອນ, ໝາກເລັ່ນ ແລະ ອື່ນໆ; ແຂວງໄຊຍະບູລີ: ໄດ້ຈັດຕັ້ງກອງທຶນ ຢູ່ບ້ານ ນໍ້າຕວນ ເມືອງໄຊຍະບູລີ ແລະ ບ້ານນາບອນເມືອງ ແກ່ນທ້າວ, ດຳເນີນໂຄງການສົ່ງເສີມຜູ້ປະກອບການລ້ຽງສັດ ເຊັ່ນ: ການລ້ຽງໝູແບບຟາມ ແລະ ອື່ນໆ, ແຂວງຈຳປາສັກ: ດຳເນີນໂຄງການສົ່ງເສີມ ຜູ້ປະກອບການລ້ຽງສັດ ເຊັ່ນ: ລຽງໝູພັນ ແລະ ໄກ່ແບບຟາມ ແລະ ອື່ນໆ. ໃນການດຳເນີນໂຄງການຮ່ວມມືລະຫວ່າງ ສນຊ ກັບ ບໍລິສັດ ພົງສະຫວັນ ຈະມີການປັບປຸງດ້ານການຈັດຕັ້ງ, ບົດບັນທຶກຊ່ວຍຈຳເພື່ອໃຫ້ສອດຄ່ອງກັບສະພາບຕົວຈິງໃນປັດຈຸບັນ.
ຄໍາເຫັນ