ວັນທີ 1 ມີນາ ຜ່ານມານີ້, ບໍລິສັດເສັ້ນທາງລົດໄຟລາວຈີນໃຫ້ຮູ້ວ່າ: ເລີ່ມແຕ່ວັນທີ 20 ກຸມພາ 2024 ເປັນຕົ້ນມາ, ບໍລິສັດເສັ້ນທາງລົດໄຟລາວ-ຈີນ ທີ່ຮັບຜິດຊອບການເຄື່ອນໄຫວຂອງເສັ້ນທາງລົດໄຟຈີນ-ລາວຕອນໃນປະເທດລາວ ໄດ້ເປີດບໍລິການສົ່ງເຄື່ອງດ່ວນບົນເສັ້ນທາງລົດໄຟຈີນ-ລາວ ເປັນຄັ້ງທຳອິດ, ໂດຍສາມາດສົ່ງເຖິງທີ່ໃນມື້ດຽວ. ການບໍລິການນີ້ຈະຊຸກຍູ້ການພັດທະນາຂອງຂະແໜງການການຄ້າເອເລັກໂຕຣນິກຢູ່ປະເທດລາວ, ອຳນວຍຄວາມສະດວກໃຫ້ແກ່ຊີວິດການເປັນຢູ່ຂອງປະຊາຊົນລາວ ແລະ ການພັດທະນາເສດຖະກິດຂອງພາກພື້ນ.
ໃນຖານະເປັນພື້ນຖານໂຄງລ່າງອັນສຳຄັນທີ່ເຊື່ອມຕໍ່ປະເທດຈີນ ແລະ ປະເທດລາວ, ນັບແຕ່ການເປີດນຳໃຊ້ເປັນຕົ້ນມາ, ເສັ້ນທາງລົດໄຟຈີນ-ລາວໄດ້ປັບປຸງການບໍລິການຂອງຕົນຢ່າງບໍ່ຢຸດຢັ້ງ, ຊຸກຍູ້ການສັນຈອນໄປມາຂອງຜູ້ໂດຍສານ, ການຈໍລະຈອນສິນຄ້າ ແລະ ການແລກປ່ຽນຂໍ້ມູນຂ່າວສານຢ່າງມີປະສິດທິພາບສູງ, ໄດ້ເພີ່ມຄວາມມີຊີວິດຊີວາອັນໃໝ່ເຂົ້າໃນການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ.
ໃນດ້ານການຂົນສົ່ງສິນຄ້າ, ນັບແຕ່ການເປີດນຳໃຊ້ເປັນຕົ້ນມາ, ເສັ້ນທາງລົດໄຟຈີນ-ລາວໄດ້ຂົນສົ່ງສິນຄ້າຫຼາຍກວ່າ 33.059 ລ້ານກວ່າໂຕນ, ໃນນັ້ນປະລິມານຂົນສົ່ງສິນຄ້າຂ້າມຊາດມີເຖິງ 7.509 ລ້ານໂຕນ. ປະເພດສິນຄ້າໄດ້ເພີ່ມຈາກ 10 ກວ່າຊະນິດ ເຊັ່ນ: ປຸ໋ຍເຄມີ, ເຄື່ອງໃຊ້ປະຈຳວັນ ແລະ ອື່ນໆໃນເບື້ອງຕົ້ນຂຶ້ນເປັນ 2.900 ກວ່າຊະນິດ ເຊັ່ນ: ເຄື່ອງເອເລັກໂຕຣນິກ, ເຄື່ອງຜະລິດໄຟຟ້າດ້ວຍແສງຕາເວັນ, ໝາກໄມ້ ແລະ ອື່ນໆ. ໝາກໄມ້ ແລະ ສິນຄ້າອື່ນໆ ຈາກລາວ, ໄທ ແລະ ປະເທດຕ່າງໆໄດ້ຜ່ານເສັ້ນທາງລົດໄຟຈີນ-ລາວຂົນສົ່ງໄປຮອດນະຄອນຄຸນໝິງ ແຂວງຢຸນນານ ຈີນ ຢ່າງບໍ່ຂາດສາຍ, ແລ້ວສົ່ງໄປຈຳໜ່າຍຢູ່ແຂວງເສສວນ, ແຂວງກວາງຕຸ້ງ ແລະ ແຫ່ງອື່ນໆ, ສ່ວນຜັກ, ໝາກພິລາ, ເຄື່ອງຜະລິດໄຟຟ້າດ້ວຍແສງຕາເວັນ, ເຄື່ອງໄຟຟ້າຂະໜາດນ້ອຍທີ່ໃຊ້ໃນເຮືອນ ແລະ ສິນຄ້າອື່ນໆຂອງຈີນໄດ້ຖືກຂົນສົ່ງໄປຈຳໜ່າຍຢູ່ປະເທດອາຊີຕາເວັນອອກສຽງໃຕ້. ນອກຈາກນັ້ນ, ຮູບແບບໃໝ່ດ້ານການຂົນສົ່ງ, ເຊັ່ນ “ເສັ້ນທາງລົດໄຟຈີນ-ລາວ + ຂະບວນລົດໄຟຈີນ-ເອີຣົບ”, ເຮັດໃຫ້ເວລາຈໍລະຈອນສິນຄ້າລະຫວ່າງຊາດໄວທີ່ສຸດໄດ້ຫຼຸດລົງເຫຼືອພຽງ 15 ມື້ ຊຶ່ງໄດ້ຊຸກຍູ້ການເຊື່ອມໂຍງເຊື່ອມຈອດກັນຢ່າງມີປະສິດທິພາບສູງ, ສະໜອງຊ່ອງທາງໃໝ່ໃຫ້ແກ່ຜະລິດຕະພັນທີ່ມີເອກະລັກພິເສດຂອງປະເທດຕ່າງໆໃນອາຊີຕາເວັນອອກສ່ຽງໃຕ້ຊຶ່ງລວມທັງປະເທດລາວ ສາມາດເຂົ້າສູ່ຕະຫຼາດເອີຣົບຢ່າງວ່ອງໄວ, ໄດ້ສ້າງກາລະໂອກາດ ແລະ ຜົນປະໂຫຍດທີ່ແທ້ຈິງໃຫ້ກັບວິສາຫະກິດ ແລະ ປະຊາຊົນຂອງປະເທດຕ່າງໆ.
ໃນດ້ານການຂົນສົ່ງຜູ້ໂດຍສານ, ນັບມາຮອດວັນທີ 19 ກຸມພາປີ 2024, ໄດ້ຂົນສົ່ງຜູ້ໂດຍສານເຖິງ 28.897 ລ້ານເທື່ອຄົນ. ເລີ່ມແຕ່ວັນທີ 1 ມັງກອນ ປີ 2024 ເປັນຕົ້ນມາ, ຜູ້ໂດຍສານບົນເສັ້ນທາງລົດໄຟຈີນ-ລາວ ມີຈຳນວນຫຼວງຫຼາຍຢ່າງຕໍ່ເນື່ອງ, ສະເລ່ຍແລ້ວໄດ້ຂົນສົ່ງຜູ້ໂດຍສານຫຼາຍກວ່າ ໝື່ນຄົນຕໍ່ມື້. ໂດຍແນໃສ່ແກ້ໄຂບັນຫາທີ່ຊື້ປີ້ຍາກຍ້ອນຈຳນວນຜູ້ໂດຍສານຂອງຂະບວນລົດໄຟໂດຍສານສາກົນເພີ່ມຂຶ້ນຫຼາຍ, ນັບແຕ່ວັນທີ 26 ມັງກອນ 2024 ເປັນຕົ້ນມາ, ບ່ອນນັ່ງສຳລັບຜູ້ໂດຍສານຂ້າມຊາດບົນເສັ້ນທາງລົດໄຟຈີນ-ລາວໄດ້ເພີ່ມຂຶ້ນຈາກ 300 ບ່ອນນັ່ງເປັນ 350 ບ່ອນນັ່ງ, ເພື່ອອຳນວຍຄວາມສະດວກໃຫ້ແກ່ຜູ້ໂດຍສານຫຼາຍກວ່າເກົ່າໃນການທຽວໄປມາລະຫວ່າງສອງປະເທດຈີນ-ລາວໂດຍລົດໄຟຖ້ຽວນີ້. ໃນເດືອນມັງກອນປີນີ້, ເສັ້ນທາງລົດໄຟຈີນ-ລາວໄດ້ຂົນສົ່ງຜູ້ໂດຍສານ 1,86 ລ້ານເທື່ອຄົນ, ໃນນັ້ນມີຜູ້ໂດຍສານຂ້າມຊາດ 23.000 ເທື່ອຄົນ ຊຶ່ງມີການເພີ່ມຂຶ້ນຢ່າງພົ້ນເດັ່ນ.
ນອກນີ້, ພາກສ່ວນຄຸ້ມຄອງເສັ້ນທາງລົດໄຟຈີນ-ລາວຍັງໄດ້ລົງເລິກວິເຄາະຕະຫຼາດການທ່ອງທ່ຽວຂ້າມຊາດ ແລະ ຄວາມຕ້ອງການຂອງຜູ້ໂດຍສານ, ອອກແບບເສັ້ນທາງການທ່ອງທ່ຽວຂ້າມຊາດ ແລະ ຜະລິດຕະພັນການທ່ອງທ່ຽວຕ່າງໆຢູ່ລາວ, ເຊັ່ນ: “ດິນແດນເລິກລັບ·ພາບລວມແມ່ນ້ຳລ້ານຊ້າງ-ແມ່ນ້ຳຂອງ” ເປັນເວລາ 12 ວັນ, “ຂີ່ລົດໄຟທ່ຽວປະເທດລາວ” ເປັນເວລາ 7 ວັນ ແລະ ອື່ນໆ, ຈັດຕັ້ງຜູ້ໂດຍສານແຫ່ງຕ່າງໆທົ່ວປະເທດຈີນຂີ່ລົດໄຟຄວາມໄວສູງໄປທ່ອງທ່ຽວຢູ່ປະເທດລາວ. ຫວ່າງບໍ່ດົນມານີ້, ກຸ່ມບໍລິສັດເສັ້ນທາງລົດໄຟຈີນສາຂາປັກກິ່ງໃຫ້ຮູ້ວ່າ, ປີ 2024 ກຸ່ມບໍລິສັດທ່ອງທ່ຽວເສັ້ນທາງລົດໄຟຈີນຈະນຳສະເໜີຂະບວນລົດໄຟທ່ອງທ່ຽວທີ່ມີຫົວຂໍ້ວ່າ “ຂີ່ລົດໄຟຕາມເສັ້ນທາງລົດໄຟຈີນ-ລາວ ສຳຜັດກັບປະເທດລາວ” ໃນວັນທີ 18 ມີນາ ນີ້ ຊຶ່ງຈະເຮັດໃຫ້ນັກທ່ອງທ່ຽວປັກກິ່ງສາມາດຂີ່ລົດໄຟໄປສຳຜັດກັບແຫຼ່ງທ່ອງທ່ຽວທີ່ມີຊື່ສຽງຢູ່ແຫ່ງຕ່າງໆຂອງລາວໂດຍບໍ່ຕ້ອງປ່ຽນລົດໄຟ.
ເພື່ອອຳນວຍຄວາມສະດວກ ແລະ ປອດໄພໃຫ້ແກ່ປະຊາຊົນລຽບຕາມເສັ້ນທາງລົດໄຟໃນການຂົນສົ່ງສິນຄ້າ, ເລີ່ມແຕ່ວັນທີ 20 ກຸມພາ 2024 ເປັນຕົ້ນໄປ, ໃນຕອນເຊົ້າຂອງທຸກໆມື້, ກ່ອນການອອກເດີນທາງຂອງຂະບວນລົດໄຟຖ້ຽວ K12 ທີ່ຈາກນະຄອນຫຼວງວຽງຈັນໄປສູ່ບໍ່ເຕ່ນ, ແລະ ລົດໄຟຖ້ຽວ K11 ທີ່ຈາກບໍ່ເຕ່ນໄປສູ່ນະຄອນຫຼວງວຽງຈັນ, ພະນັກງານລົດໄຟຈະຂົນເອົາຫີບໄປສະນີດ່ວນທີ່ເຕັມໄປດ້ວຍພັດສະດຸໄປສະນີດ່ວນເຂົ້າໃນຕູ້ລົດໄຟ ແລະ ສົ່ງໄປຈຸດໝາຍປາຍທາງ, ການສົ່ງສິນຄ້າຂະໜາດນ້ອຍ ແລະ ຈຳນວນໜ້ອຍຜ່ານເສັ້ນທາງລົດໄຟຈີນ-ລາວຢ່າງປອດໄພ ແລະ ວ່ອງໄວໄດ້ບັນລຸຜົນເປັນຈິງ, ເພື່ອນມິດໃນລາວ ຊື້ເຄື່ອງຜ່ານອິນເຕີເນັດຈາກຈີນ ກໍຈະນັບມື້ນັບສະດວກກວ່າເກົ່າ.
ໂດຍ: ຊີອາໄອ
ຄໍາເຫັນ