ກໍຄືພັກປະຊາຊົນປະຕິວັດລາວໃນປັດຈຸບັນ ແມ່ນ ມີຄວາມເຕີບໃຫຍ່ເຂັ້ມແຂງ ຮອບດ້ານ,ຍາມໃດກໍຢຶດໝັ້ນລັດທິ ມາກ-ເລນິນ, ເປັນຕົວແທນໃຫ້ແກ່ສິດ ແລະຜົນປະໂຫຍດຂອງຊົນຊັ້ນກໍາມະກອນ ແລະຊາວຜູ້ອອກແຮງງານບັນດາເຜົ່າຢ່າງສະເໝີຕົ້ນສະເໝີປາຍ.
ຜົນງານທີ່ພົ້ນເດັ່ນທີ່ສຸດແມ່ນນັບແຕ່ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນໃນປີ 1955 ພັກໄດ້ນໍາພາປະຊາຊົນລາວບັນດາເຜົ່າ ລຸກຂຶ້ນຕໍ່ສູ້ຕ້ານກັບຈັກກະພັດລ່າເມືອງຂຶ້ນແບບເກົ່າ ແລະແບບໃໝ່ ຢ່າງອົງອາດກ້າແກ່ນ.ກອບກູ້ເອົາເອກະລາດ,ຜືນແຜ່ນດິນອັນຄົບຖ້ວນ ມາໃຫ້ແກ່ປະຊາຊົນລາວບັນດາເຜົ່າ; ປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975 ແບບບົວບໍ່ຊ້ຳ ນໍ້າບໍ່ຂຸ່ນ (ບໍ່ມີການສູນເສຍຊີວິດເລືອດເນື້ອ) ຊຶ່ງບໍ່ມີປະເທດໃດໃນໂລກເຮັດໄດ້.
ພາຍຫຼັງປະເທດຊາດໄດ້ຮັບການປົດປ່ອຍພັກໄດ້ສຸມໃສ່ນໍາພາ ປົກປັກຮັກສາ ແລະສ້າງສາພັດທະນາປະເທດຊາດ ຮໍາບາດແຜສົງຄາມ ທີ່ຍືດເຍື້ອມານານຫຼາຍສິບປີ;ມາຮອດປີ 1986 ພັກໄດ້ກໍານົດແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກ ຖືກຕ້ອງ, ສອດຄ່ອງກັບສະພາບຈຸດພິເສດຂອງປະເທດ ດ້ວຍການນໍາພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ ສາມາດບັນລຸໄດ້ຜົນງານອັນໃຫຍ່ຫຼວງເຮັດໃຫ້ປະເທດຊາດຂອງພວກເຮົາມີສະຖຽນລະພາບດ້ານການເມືອງໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍດີ, ເສດຖະກິດຂອງປະເທດຂະຫຍາຍຕົວ,ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກລະດັບຂຶ້ນ ມີຫຼາຍພັນຄອບຄອບຫຼຸດພົ້ນອອກຈາກຄວາມທຸກຍາກ; ດ້ານວັດທະນະທໍາ-ສັງຄົມ ໄດ້ຮັບການພັດທະນາ ໂດຍສະເພາະການຍົກລະດັບ ຄຸນນະພາບການສຶກສາ, ກໍ່ສ້າງຊັບພະຍາກອນມະນຸດ, ສີມືແຮງງານ, ມູນເຊື້ອ ແລະຄຸນຄ່າວັດທະນະທໍາອັນດີງາມຂອງຊາດ ໄດ້ຮັບການອະນຸລັກຮັກສາ ແລະເສີມຂະຫຍາຍຢ່າງຕໍ່ເນື່ອງ; ອໍານາດການປົກຄອງ, ກົງຈັກການຈັດຕັ້ງທຸກຂັ້ນ ໄດ້ຮັບການບູລະນະ, ປັບປຸງໃຫ້ສອດຄ່ອງກັບສະພາບຕົວຈິງຂອງປະເທດ.
ສະຫາຍ ພອຍຄໍາ ຮຸ່ງບຸນຍວງ ກ່າວຕື່ມວ່າ: ສໍາລັບແຂວງໄຊສົມບູນ ພູມີປະເທດເປັນພູຜາສູງຊັນ, ທຸລະການດານ ກ່ອນໜ້ານີ້ຫຼາຍສິບປີ ຍັງເປັນເຂດຫຍຸ້ງຍາກຫຼາຍດ້ານ, ພື້ນຖານໂຄງລ່າງເສັ້ນທາງເຂົ້າ-ອອກ, ໄປ-ມາຫຍຸ້ງຍາກ ປະຊາຊົນ ສ່ວນຫຼາຍຍັງທຸກຍາກ, ຫຼ້າຫຼັງ, ດໍາລົງຊີວິດກະແຈກກະຈາຍ, ຂຶ້ນກັບທໍາມະຊາດເປັນສ່ວນໃຫຍ່. ຍ້ອນເຫັນໄດ້ຄວາມຈໍາເປັນ ແລະຄວາມຫຍຸ້ງຍາກຄືດັ່ງກ່າວ ພັກຈຶ່ງໄດ້ຕັດສິນໃຈຕົກລົງສ້າງຕັ້ງແຂວງໄຊສົມບູນຂຶ້ນ ໃນວັນທີ 13 ທັນວາ 2013 ແລະປະກາດເປັນທາງການໃນວັນທີ 31 ທັນວາ 2013. ອົງການປົກຄອງແຂວງແຕ່ລະສະໄໝ ໄດ້ສຸມໃສ່ນໍາພາພັດທະນາແຂວງໄຊສົມບູນຢ່າງຕັ້ງໜ້າໂດຍຖືເອົາວຽກງານສຶກສາອົບຮົມນໍາພາການເມືອງ-ແນວຄິດ, ປຸກລະດົມເຕົ້າໂຮມຄວາມສາມັກຄີປອງດອງເປັນປຶກແຜ່ນ; ພັດທະນາເສດຖະກິດ-ສັງຄົມເປັນໃຈກາງ ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ,ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນຢ່າງແຂງແຮງ ໄປພ້ອມກັບການກໍ່ສ້າງພື້ນຖານໂຄງລ່າງ ດ້ານເສັ້ນທາງຄົມມະນາຄົມ ຈາກແຂວງຫາເມືອງ, ເມືອງຫາບ້ານ ແລະເສັ້ນທາງເຊື່ອມຈອດກັບບັນດາແຂວງອ້ອມຂ້າງ ເຮັດໃຫ້ແຂວງໄຊສົມບູນໄດ້ຮັບການພັດທະນາດີຂຶ້ນເທື່ອລະກ້າວ, ສັງຄົມມີຄວາມສະຫງົບ.
ມາຮອດທ້າຍປີ 2018 ກົມການເມືອງສູນກາງພັກຈຶ່ງໄດ້ອອກມະຕິ ເລກທີ 055/ກມສພ ວ່າດ້ວຍການຮັບຮອງເອົາຍຸດທະສາດການພັດທະນາເຂດຈຸດສຸມໃຈກາງແຂວງໄຊສົມບູນ; ປີ 2019 ລັດຖະບານໄດ້ອອກດໍາລັດເລກທີ 414/ລບ, ວ່າດ້ວຍນະໂຍບາຍການພັດທະນາເສດຖະກິດແຂວງໄຊສົມບູນ ຊຶ່ງເປັນນິຕິກໍາທີ່ສໍາຄັນພັດທະນາໄຊສົມບູນຕາມ 5 ທ່າແຮງຂອງແຂວງເຊັ່ນ: ດ້ານກະສິກໍາ, ທ່ອງທ່ຽວ, ໄຟຟ້າ, ບໍ່ແຮ່ແລະ ເປັນໃຈກາງທາງຜ່ານ. ໃນນີ້,ຂະແໜງກະສິກໍາ ແລະທ່ອງທ່ຽວ ເປັນຂະແໜງທີ່ເປັນບຸລິມະສິດໃຫ້ມີການຫັນປ່ຽນໄວຂຶ້ນກວ່າເກົ່າ.
ຕະຫຼອດໄລຍະ 11 ປີກວ່າທີ່ຜ່ານມາ ແຂວງໄຊສົມບູນມີສະຖຽນລະພາບດ້ານການເມືອງໜັກແໜ້ນ, ສັງຄົມມີຄວາມສະຫງົບສຸກ ອັນພົ້ນເດັ່ນ ແມ່ນສາມາດແກ້ໄຂໄດ້ໜໍ່ແໜງຄວາມບໍ່ສະຫງົບ ທີ່ເປັນບັນຫາສະສົມຍືດເຍື້ອຍາວນານມາຫຼາຍສິບປີ ສາມາດແກ້ໄຂຕົກໄປ; ປະຊາຊົນບັນດາເຜົ່າ ມີຄວາມຕື່ນຕົວທາງດ້ານການເມືອງສູງຂຶ້ນກວ່າເກົ່າ,ເຂົ້າຮ່ວມປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ,ປະກອບສ່ວນປົກປັກຮັກສາ ແລະສ້າງສາພັດທະນາເສດຖະກິດ-ສັງຄົມຂອງແຂວງ, ເມືອງ, ບ້ານ,ຍົກລະດັບຊີວິດການເປັນຢູ່ຂອງຕົນເອງດີຂຶ້ນເທື່ອລະກ້າວ ທໍາການຜະລິດ, ປູກຝັງ-ລ້ຽງສັດ, ຄ້າຂາຍ, ເຮັດທຸລະກິດ, ການບໍລິການ ແລະອື່ນໆ ເຮັດໃຫ້ຄອບຄົວທຸກຍາກຫຼຸດລົງເທື່ອລະກ້າວ. ການຈັດເກັບລາຍຮັບເຂົ້າງົບປະມານ ເພີ່ມຂຶ້ນ ແລະລື່ນແຜນການທຸກໆປີສົ່ງຜົນໃຫ້ແຂວງມີການພັດທະນາຢ່າງຮອບດ້ານ ດ້ວຍບາດກ້າວທີ່ໜັກແໜ້ນ, ເສດຖະກິດ-ສັງຄົມຂອງແຂວງ ຂະຫຍາຍຕົວຕໍ່ເນື່ອງ, ໝັ້ນທ່ຽງ ສະເລ່ຍບໍ່ຫຼຸດ 7%ຕໍ່ປີ.
ການລົງທຶນພັດທະນາຂອງເອກະຊົນທັງພາຍໃນ ແລະຕ່າງປະເທດ, ໂຄງການລົງທຶນຂອງລັດ ນັບທັງສູນກາງ ແລະແຂວງຄຸ້ມຄອງ ກໍເພີ່ມຂຶ້ນ ໂດຍສະເພາະໂຄງການກໍ່ສ້າງພື້ນຖານໂຄງລ່າງດ້ານສໍານັກງານ-ອົງການຂອງລັດ ແລະເອກະຊົນ ໄດ້ຮັບການກໍ່ສ້າງເພີ່ມຂຶ້ນຢ່າງຕໍ່ເນື່ອງ; ບັນດາຖະໜົນຫົນທາງເມື່ອທຽບໃສ່ບໍ່ທັນສ້າງຕັ້ງແຂວງເສັ້ນທາງເຂົ້າ-ອອກແລະເສັ້ນທາງພາຍໃນແຂວງການໄປ-ມາພົບຄວາມຫຍຸ້ງຍາກ, ເປັນທາງດິນແດງແຕ່ປັດຈຸບັນໄດ້ຮັບການພັດທະນາຍົກລະດັບເປັນທາງປູຢາງຫຼາຍເສັ້ນ;ຂົງເຂດວັດທະນະທໍາ-ສັງຄົມໄດ້ຮັບການພັດທະນາເຕີບໃຫຍ່ເຂັ້ມແຂງຂຶ້ນເທື່ອລະກ້າວເປັນຕົ້ນໄດ້ສຸມໃສ່ການພັດທະນາຊັບພະຍາກອນມະນຸດ, ປັບປຸງຍົກລະດັບຄຸນນະພາບການຮຽນ-ການສອນດີຂຶ້ນເປັນກ້າວໆ, ຕາໜ່າງການສຶກສາໄດ້ຮັບການຂະຫຍາຍກວ້າງຂວາງ, ອັດຕາເດັກໃນເກນອາຍຸໄດ້ເຂົ້າຮຽນທົ່ວເຖິງ,ຕາໜ່າງສາທາລະນະສຸກໄດ້ຂະຫຍາຍຕົວລົງສູ່ທ້ອງຖິ່ນຮາກຖານບ້ານ, ໂຮງໝໍແຂວງ, ໂຮງໝໍເມືອງ ແລະບັນດາສຸກສາລາໃນເມື່ອກ່ອນ ກໍໄດ້ຮັບການປັບປຸງຍົກລະດັບດີຂຶ້ນກວ່າເກົ່າເຮັດໃຫ້ປະຊາຊົນໄດ້ເຂົ້າເຖິງການບໍລິການປິ່ນປົວຮັກສາສຸຂະພາບຢ່າງທົ່ວເຖິງ; ມູນເຊື້ອວັດທະນະທຳ,ຮີດຄອງປະເພນີອັນດີງາມຂອງຊາດ, ຂອງເຜົ່າໄດ້ຮັບການປົກປັກຮັກສາ ແລະ ເສີມຂະຫຍາຍຢ່າງຕັ້ງໜ້າ, ສະຖານທີ່ທ່ອງທ່ຽວທາງດ້ານທໍາມະຊາດ, ປະຫວັດສາດແລະວັດທະນະທໍາໄດ້ຮັບການປັບປຸງເທື່ອລະກ້າວ; ອົງການແນວລາວສ້າງຊາດ, ສະຫະພັນນັກຮົບເກົ່າແລະອົງການຈັດຕັ້ງມະຫາຊົນ ໄດ້ເອົາໃຈໃສ່ເປັນເຈົ້າການ ເຄື່ອນໄຫວຢ່າງແຂງແຮງໃນການເຕົ້າໂຮມສ້າງຄວາມສາມັກຄີປອງດອງເປັນປຶກແຜ່ນຂອງທຸກຊົນເຜົ່າ, ຊັ້ນຄົນ, ສາສະໜາ, ທຸກເພດທຸກໄວໃນທົ່ວແຂວງໄປພ້ອມກັບການເອົາໃຈໃສ່ໂຄສະນາສຶກສາອົບຮົມແລະປຸກລະດົມຂົນຂວາຍປະຊາຊົນບັນດາເຜົ່າ ເຂົ້າໃນການປົກປັກຮັກສາແລະສ້າງສາພັດທະນາແຂວງໄຊສົມບູນນັບມື້ນັບກ້າວຂຶ້ນໄປຢ່າງໜັກແໜ້ນ.
ທັງໝົດເຫຼົ່ານີ້ ແມ່ນຜົນງານສ່ວນໜຶ່ງ ແຫ່ງການນໍາພາ-ຊີ້ນໍາອັນສະຫຼາດສ່ອງໃສ ແລະຖືກຕ້ອງຂອງພັກປະຊາຊົນປະຕິວັດລາວ ຈຶ່ງເຮັດໃຫ້ແຂວງໄຊສົມບູນພວກເຮົາ ໄດ້ຮັບການພັດທະນາເຕີບໃຫຍ່, ເຂັ້ມແຂງ, ໜັກແໜ້ນ ມາເຖິງທຸກວັນນີ້.
ຕາງໜ້າໃຫ້ຄະນະພັກ, ສະພາປະຊາຊົນແຂວງ ແລະອົງການປົກຄອງ ແຂວງໄຊສົມບູນ, ໃນນາມສ່ວນຕົວ ຂໍສະແດງຄວາມຂອບໃຈ ແລະຮູ້ບຸນຄຸນຢ່າງລົ້ນເຫຼືອຕໍ່ພັກປະຊາຊົນປະຕິວັດລາວ, ຂ້າພະເຈົ້າ ພ້ອມແລ້ວຈະຂໍອຸທິດຕົນເພື່ອພັກ, ເພື່ອປະເທດຊາດ ແລະເພື່ອປະຊາຊົນລາວບັນດາເຜົ່າ ດ້ວຍການສຸມເຫື່ອແຮງ, ສະຕິປັນຍາ, ຄວາມຮູ້ ຄວາມສາມາດ, ບົດຮຽນປະສົບການຢ່າງບໍ່ຮູ້ອິດຮູ້ເມື່ອຍ ປະກອບສ່ວນເຂົ້າໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດ ກໍຄືເຮັດໃຫ້ແຂວງໄຊສົມບູນພວກເຮົາ ໃຫ້ໄດ້ຮັບການພັດທະນາກ້າວຂຶ້ນໄປຢ່າງບໍ່ຢຸດຢັ້ງ, ຢຶດໝັ້ນຢ່າງຕາຍໃຈຕໍ່ອຸດົມການກ້າວຂຶ້ນສັງຄົມນິຍົມຂອງພັກ, ຈະນໍາເອົາຄວາມຢູ່ດີກິນດີ, ຄວາມສົມບູນພູນສຸກ ມາໃຫ້ແກ່ປະຊາຊົນລາວບັນດາເຜົ່າທົ່ວແຂວງໄຊສົມບູນ, ເອົາໃຈໃສ່ນໍາພາປົກປັກຮັກສາ ແລະສ້າງສາພັດທະນາແຂວງໄຊສົມບູນໃຫ້ຈະເລີນຮຸ່ງເຮືອງສີວິໄລຂຶ້ນໄປເລື້ອຍໆ.
ຄໍາເຫັນ