ທ່ານນາງ ສິລິນທອນ ສັກລໍຄຳ ຫົວໜ້າກົມຮ່ວມມືຕ່າງປະເທດ ກະຊວງ ສສກ ກ່າວວ່າ: ສິ່ງສໍາຄັນຫຼັກໆຂອງຄັງສະສົມປຶ້ມອ່ານສະບັບນີ້ເນັ້ນການມີສ່ວນຮ່ວມ ແລະ ຮັບປະກັນການເຂົ້າເຖິງຂອງທຸກຄົນໃນປຶ້ມອ່ານຈຳນວນ 594 ຫົວເລື່ອງທີ່ຖືກຄັດເລືອກເຂົ້າໃສ່ໃນຄັງສະສົມປຶ້ມອ່ານສຳລັບເດັກ ຊຶ່ງເຫັນວ່າມີຄວາມຫຼາກຫຼາຍຂອງລັກສະນະຕົວລະຄອນ ແລະ ພື້ນຖານທາງດ້ານວັດທະນະທຳເພື່ອຮັບປະກັນໃຫ້ມີຄວາມສອດຄ່ອງ ແລະ ເໝາະສົມກັບຜູ້ອ່ານທີ່ເປັນເດັກທຸກຄົນໃນສປປ ລາວ. ຄັງສະສົມປຶ້ມອ່ານສຳລັບເດັກນີ້ ໄດ້ຖືກອອກແບບມາເພື່ອໃຫ້ເປັນຊັບພະຍາກອນທີ່ເປັນປະໂຫຍດໃຫ້ແກ່ພາກລັດ, ຄູ ແລະ ຜູ້ເຮັດວຽກດ້ານການສຶກສາ, ຊຸມຊົມ, ຄອບຄົວ ແລະ ພໍ່ແມ່/ຜູ້ປົກຄອງໂດຍໄດ້ຜ່ານການກວດກາ ແລະ ຮັບຮອງຈາກກະຊວງ ສສກ ເພື່ອໃຫ້ຂໍ້ມູນ ແລະ ເພີ່ມປະສິດທິພາບໃນການເລືອກຊື້ປຶ້ມອ່ານສຳລັບເດັກ ຊຶ່ງຄັງສະສົມປຶ້ມອ່ານສຳລັບເດັກແມ່ນໄດ້ເຜີຍແຜ່ໃຫ້ທຸກຄົນສາມາດນຳໃຊ້ໄດ້ຢ່າງເປີດກວ້າງ. ໂຄງການຮຽນອ່ານທີ່ສະໜັບສະໜູນໂດຍອົງການພັດທະນາສາກົນປະເທດສະຫະລັດອາເມຣິກາ ຈະສືບຕໍ່ໃຫ້ການສະໜັບສະໜູນຄວາມພະຍາຍາມຂອງລັດຖະບານ ສປປ ລາວ ໃນການປັບປຸງ ແລະ ເສີມຂະຫຍາຍເຮັດໃຫ້ຄັງສະສົມປຶ້ມອ່ານສໍາລັບເດັກນີ້ກາຍເປັນຊັບພະຍາກອນທີ່ເປັນປະໂຫຍດ ແລະ ແທດເໝາະຕໍ່ໄປ.
ການພັດທະນາຄັງສະສົມປຶ້ມອ່ານສຳລັບເດັກຄັ້ງນີ້, ໄດ້ຮັບການຮ່ວມມືຢ່າງໃກ້ຊິດລະຫວ່າງກະຊວງ ສສກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຄະນະບໍລິຫານສົ່ງເສີມປຶ້ມອ່ານເພື່ອເດັກລາວ ແລະ ໂຄງການຮຽນອ່ານທີ່ສະໜັບສະໜູນໂດຍອົງການພັດທະນາສາກົນປະເທດສະຫະລັດອາເມຣິກາ ຖືເປັນບາດກ້າວສຳຄັນໃນການສົ່ງເສີມການຮຽນຮູ້ໜັງສືຂອງເດັກໃນ ສປປ ລາວ, ເປັນໂຄງການ 7 ປີໂດຍໄດ້ເລີ່ມຈັດຕັ້ງປະຕິບັດມາແຕ່ປີ 2018 ແລະ ຈະສິ້ນສຸດໃນປີ 2025.
ໂຄງການດັ່ງກ່າວ, ເນັ້ນໃສ່ການປັບປຸງທັກສະການອ່ານຂອງເດັກນ້ອຍໃນຊັ້ນກຽມປະຖົມສຶກສາ ປ1, ປ2 ໃນ ສປປ ລາວ ໂດຍເນັ້ນໃສ່ເດັກນ້ອຍທີ່ບໍ່ເວົ້າພາສາລາວມາແຕ່ກໍາເນີດ ແລະ ເດັກທີ່ມີຄວາມເປັນພິການ. ໂຄງການດັ່ງກ່າວໄດ້ເຮັດວຽກຢ່າງໃກ້ຊິດກັບກະຊວງ ສສກ ແລະ ຄູ່ຮ່ວມພັດທະນາເພື່ອສ້າງຄວາມເຂັ້ມແຂງໃຫ້ແກ່ລະບົບການສຶກສາຂອງລາວ ໂດຍການສະໜອງສື່ການຮຽນ-ການສອນເສີມທີ່ມີຄຸນນະພາບສູງ, ຝຶກອົບຮົມ ແລະ ໃຫ້ການຊຸກຍູ້ຊ່ວຍເຫຼືອຄູ, ການມີສ່ວນຮ່ວມຂອງຊຸມຊົນກ່ຽວກັບການອ່ານ ແລະ ກິດຈະກໍາເພື່ອການລິເລີ່ມກ່ຽວກັບການສຶກສາຮຽນຮ່ວມສຳລັບເດັກນ້ອຍ ທີ່ບໍ່ເວົ້າພາສາລາວມາແຕ່ກໍາເນີດ ແລະ ເດັກທີ່ມີຄວາມເປັນພິການ. ໂຄງການດັ່ງກ່າວ, ຈັດຕັ້ງປະຕິບັດໂດຍການຮ່ວມມືຂອງອົງການຈັດຕັ້ງສາກົນຊຶ່ງນໍາໂດຍອົງການຊ່ວຍເຫຼືອເດັກສາກົນ (Save the Children) ຮ່ວມກັບອົງການຣູມທູຣີດ (Room to Read) ແລະ ອົງການເພື່ອມະນຸດສະທຳ ແລະ ການມີສ່ວນຮ່ວມ (Humanity & Inclusion).
ຂ່າວ-ພາບ: ບຸນທະວີ ນະວົງສາ
ຄໍາເຫັນ