ເຜີຍແຜ່ກົດໝາຍ ວ່າດ້ວຍສານທະຫານ ສະບັບປັບປຸງ ຢູ່ ວປກ

ສະຫາຍ ພັນໂທ ນາງ ພິມນະພາ ພວງສາວະດີ ຮອງຫົວໜ້າພະແນກໂຄສະນາເຜີຍແຜ່ກົດໝາຍ ກົມກົດໝາຍ ໄດ້ຜ່ານກົດໝາຍ ວ່າດ້ວຍສານທະຫານ (ສະບັບປັບປຸງ) ປະກອບມີ 10 ພາກ, 5 ໝວດ, 71 ມາດຕາ ໂດຍເນື້ອໃນເອກະສານເພື່ອກຳນົດຫຼັກການ, ລະບຽບ ແລະ ມາດຕະການ ກ່ຽວກັບການຈັດຕັ້ງ, ການເຄື່ອນໄຫວ ແລະ ການຕິດຕາມກວດກາວຽກງານສານທະຫານ ເພື່ອຮັບປະກັນການປະຕິບັດໜ້າທີ່ຂອງສານທະຫານໃຫ້ມີປະສິດທິພາບ ແລະ ເຮັດໃຫ້ການພິຈາລະນາ, ພິພາກສາຄະດີອາຍາມີຄວາມວ່ອງໄວ, ໂປງໃສ່, ພາວະວິໄສ, ຖືກຕ້ອງ ແລະ ຍຸຕິທໍາ ແນໃສປົກປ້ອງຜົນປະໂຫຍດຂອງກອງທັບ, ສິດ ແລະ ຜົນປະໂຫຍດອັນຊອບທຳຂອງນາຍ ແລະ ພົນທະຫານ, ກຳມະກອນ, ພາລະກອນ ແລະ ກຳລັງສຳຮອງ ໃນເວລາປະຕິບັດໜ້າທີ່ປ້ອງກັນຊາດ, ເຮັດໃຫ້ກອງທັບມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ມີຄວາມໜັກແໜ້ນ, ເຂັ້ມແຂງທາງດ້ານກົດ ໝາຍ ແລະ ມີແບບແຜນທັນສະໄໝ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດ. ທັງນີ້, ກໍເພື່ອແນໃສ່ເຮັດໃຫ້ນາຍທະຫານຢູ່ວິທະຍາຄານປ້ອງກັນຊາດ ໄກສອນ ພົມວິຫານ ຮັບຮູ້ເຂົ້າໃຈກ່ຽວກັບກົດໝາຍ ວ່າດ້ວຍສານທະຫານ (ສະບັບປັບປຸງ) ຢ່າງທົ່ວເຖິງ.

ໂອກາດນີ້, ສະຫາຍ ພົນຈັດຕະວາ ບົວສີ ສີວົງສາ ຍັງໄດ້ມອບປຶ້ມກົດໝາຍວ່າດ້ວຍສານທະຫານ (ສະບັບປັບປຸງ ປີ 2023) ໃຫ້ ວປກ ຈໍານວນ 75 ຫົວ ຮັບໂດຍສະຫາຍ ພົນຈັດຕະວາ ສອນທະນູ ແກ້ວໝື່ນເຮືອງ ຮອງຫົວໜ້າການເມືອງ, ຫົວໜ້າກົມການເມືອງ ວປກ.

ຂ່າວ: ເຂັງພອນ