ທ່ານ ທຳມະລົດ ລາດຊະພົນ ກ່າວເປີດກອງປະຊຸມວ່າ: ສະພາບການໃນປັດຈຸບັນ ການເຊື່ອມໂຍງດ້ານການຄ້າໃນພາກພື້ນ ແລະ ທົ່ວໂລກ ແມ່ນມີຄວາມກ້າວໜ້າທາງດ້ານເຕັກໂນໂລຊີຫຼາຍ, ເງື່ອນໄຂດັ່ງກ່າວ ຮຽກຮ້ອງໃຫ້ ສປປ ລາວ ຕ້ອງໄດ້ມີການພັດທະນາໃນຫຼາຍດ້ານ ເພື່ອຕອບສະໜອງສິ່ງທ້າທາຍດັ່ງກ່າວ ຊຶ່ງໃນຊຸມປີຜ່ານມາ, ລັດຖະບານແຫ່ງ ສປປ ລາວ ໄດ້ກຳນົດເປົ້າໝາຍ ໃນການເພີ່ມທະວີການນຳໃຊ້ບໍລິການທາງເອເລັກໂຕຣນິກໃຫ້ສູງຂຶ້ນໂດຍສະເພາະແມ່ນໄດ້ວາງ 2 ຍຸດທະສາດລວມ ຊຶ່ງແມ່ນແຜນແມ່ບົດ ວ່າດ້ວຍການຫັນເປັນດີຈີຕອນ ແລະ ແຜນແມ່ບົດວ່າດ້ວຍເສດຖະກິດດີຈີຕອນ, ພາຍໃຕ້ຍຸດທະສາດລວມຂອງລັດຖະບານ, ໂດຍສະເພາະດ້ານການເກັບອາກອນ ຊຶ່ງເປັນແຫຼ່ງເກັບລາຍຮັບລາຍໃຫຍ່ຂອງປະເທດ, ຕ້ອງມີຄວາມເຂັ້ມແຂງຮອບດ້ານ ເພື່ອຮັບມືກັບສະຖານະການ, ຮັບປະກັນການຈັດເກັບລາຍຮັບໃຫ້ຖືກຕ້ອງ ແລະ ທັນສະໄໝ. ການຈັດຕັ້ງປະຕິບັດການເກັບພັນທະຈາກການຄ້າທາງເອເລັກໂຕຣນິກ ແລະ ບໍລິການຮູບແບບດີຈີຕອນ ເປັນໜຶ່ງໃນໜ້າວຽກຈຸດສຸມບຸລິມະສິດ ຂອງລັດຖະບານ ກໍຄືກະຊວງການເງິນ ໃນການຜັນຂະຫຍາຍຄຳສັ່ງເລກທີ 18/ນຍ ວ່າດ້ວຍການຕ້ານ ແລະ ສະກັດກັ້ນການຮົ່ວໄຫຼຂອງລາຍຮັບ ແລະ ຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາເສດຖະກິດການເງິນໃນຊຸມປີທີ່ຜ່ານມາຊຶ່ງການຄົ້ນຄວ້າ ຄຳແນະນຳການປະຕິບັດການເກັບພັນທະອາກອນມູນຄ່າເພີ່ມ ສິນຄ້າດີຈີຕອນ ແມ່ນໄດ້ລິເລີ່ມຄົ້ນຄວ້ານັບແຕ່ປີ 2021 ແລະ ຈະສາມາດຈັດຕັ້ງປະຕິບັດຢ່າງເປັນທາງການ ໃນວັນທີ 1 ສິງຫາ 2024 ນີ້.
ຈາກນັ້ນ, ທ່ານນາງ ໄພປານີ ຈູມມະລີ ຮອງຫົວໜ້າພະແນກຄຸ້ມຄອງອາກອນມູນຄ່າເພີ່ມ ກົມສ່ວຍສາອາກອນ ກະຊວງການເງິນ ໄດ້ເຜີຍແຜ່ເນື້ອໃນ ຄຳແນະນຳ ກ່ຽວກັບການຈັດຕັ້ງປະຕິບັດພັນທະອາກອນມູມຄ່າເພີ່ມ ຜູ້ສະໜອງສິນຄ້າດີຈີຕອນ ແລະບໍລິການຮູບແບບ ດີຈີຕອນ ຫຼື ກິດຈະກຳການຄ້າທາງເອເລັກໂຕຣນິກຈາກຕ່າງປະເທດໃຫ້ຜູ້ຊົມໃຊ້ຢູ່ ສ ປປ ລາວ ສະບັບເລກທີ0558/ກງ ລົງວັນທີ14ກຸມພາ 2024ວ່າ: ສິນຄ້າດີຈີຕອນໝາຍເຖິງສິນຄ້າທີ່ບໍ່ສາມາດຈັບຕ້ອງໄດ້, ຜູ້ສະໜອງສິນຄ້າດີຈີຕອນ ແລະບໍລິການຮູບແບບ ດີຈີຕອນ ຫຼື ກິດຈະກຳການຄ້າທາງເອເລັກໂຕຣນິກ ແມ່ນບຸກຄົນ ນິຕິບຸກຄົນ ທີ່ບໍ່ມີພູມລຳເນົາຢູ່ ສປປ ລາວ ແຕ່ໃຫ້ບໍລິການດ້ານອອນລາຍແກ່ຜູ້ຊົມໃຊ້ທີ່ຢູ່ໃນ ສປປ ລາວ ແລະ ຮູບແບບ-ວິທີການເກັບອາກອນມູນຄ່າເພີ່ນຈາກຜູ້ສະໜອງສິນຄ້າ. ນອກນີ້ກໍຍັງມີບັນດາມາດຕະການປັບໃໝ ຕໍ່ຜູ້ລະເມີດນິຕິກຳດັ່ງກ່າວນີ້ອີກ. ພ້ອມນີ້ໃນທີ່ປະຊຸມຍັງໄດ້ເປີດໂອກາດໃຫ້ບັນດາທ່ານຜູ້ເຂົ້າຮ່ວມ ໄດ້ສົນທະນາຖາມ-ຕອບ ບັນຫາຂໍ້ຂ້ອງໃຈກ່ຽວກັບນິຕິກຳດັ່ງກ່າວດ້ວຍ.
ໃນຕອນທ້າຍ, ທ່ານ ກ່ຽນທອງ ເທບທິດາ ຮອງເຈົ້າເມືອງໄດ້ມີຄຳເຫັນຮຽກຮ້ອງມາຍັງເຈົ້າໜ້າທີ່ໆກ່ຽວຂ້ອງໂດຍສະເພາະແມ່ນສ່ວຍສາອາກອນເມືອງ ຕ້ອງໄດ້ນຳເນື້ອໃນຈິດໃຈຂອງນິຕິກຳດັ່ງກ່າວໄປເຜີຍແຜ່ໃຫ້ບັນດານັກທຸລະກິດ ຜູ້ປະກອບການ ບຸກຄົນ ນິຕິບຸກຄົນທີ່ດຳເນີນທຸລະກິດດັ່ງກ່າວຮັບຮູ້ແລະເຂົ້າໃຈ ແລະ ພ້ອມກັນປະຕິບັດພັນທະໃຫ້ແກ່ລັດຕາມລະບຽບກົດໝາຍ.
(ຂ່າວ-ພາບ ຫ້ອງການ ຖວທ ເມືອງວັງວຽງ)
ຄໍາເຫັນ