ທ່ານນາງ ສວນສະຫວັນວິຍະເກດ ກ່າວວ່າ: ວຽກງານການທ່ອງທ່ຽວຖືເປັນວຽກງານໜຶ່ງທີ່ລັດຖະບານໃຫ້ຄວາມສໍາຄັນໃນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ຊຶ່ງພັກ-ລັດກໍານົດເອົາຂະແໜງທ່ອງທ່ຽວເປັນໜຶ່ງໃນຂະແໜງການເສດຖະກິດປາຍແຫຼມ ໂດຍຊຸກຍູ້ໃຫ້ມີການຂຸດຄົ້ນບັນດາທ່າແຮງບົ່ມຊ້ອນດ້ານການທ່ອງທ່ຽວເພື່ອສ້າງໂອກາດໃນການພັດທະນາ ແລະ ຊຸກຍູ້ເສດຖະກິດຂອງປະເທດໃຫ້ມີການຂະຫຍາຍຕົວ ຊຶ່ງເມືອງວັງວຽງ ແຂວງວຽງຈັນແມ່ນຈຸດໝາຍປາຍທາງການທ່ອງທ່ຽວຫຼັກຂອງສປປ ລາວ ຫຼືTourism Landmarkເປັນເມືອງໜຶ່ງທີ່ມີຊື່ສຽງໂດ່ງດັງ ແລະ ເປັນທີ່ຮູ້ຈັກຢ່າງກວ້າງຂວາງຂອງນັກທ່ອງທ່ຽວທັງພາຍໃນ ແລະ ຕ່າງປະເທດຍ້ອນມີຄວາມອຸດົມສົມບູນໄປດ້ວຍຊັບພະຍາກອນທາງທໍາມະຊາດ, ມີຈຸດເດັ່ນໃນການດຶງດູດນັກທ່ອງທ່ຽວ ປກອບດ້ວຍສາຍນໍ້າຊອງທີ່ໃສເຢັນໄຫຼຜ່ານ, ມີພູຜາຢັ່ງຢາຍຢ່າງສວຍສົດງົດງາມ, ປະຊາຊົນທ້ອງຖິ່ນມີນໍ້າໃຈໄມຕີຈິດ, ຍິ້ມແຍ້ມແຈ່ມໃສ, ມີເອກະລັກດ້ານຊີວິດການເປັນຢູ່, ມີກິດຈະກໍາທ່ອງທ່ຽວທາງທໍາມະຊາດຫຼາຍຮູບແບບ ໂດຍສະເພາະແມ່ນທ່ຽວຊົມທັດສະນີຍະພາບ, ສໍາຜັດທໍາມະຊາດທີ່ອຸດົມສົມບູນ, ລ່ອງເຮືອ, ກິດຈະກໍາການທ່ອງທ່ຽວຜະຈົນໄພ ແລະ ກິດຈະກໍາອື່ນໆ.
ໂດຍເຫັນໄດ້ຄວາມສໍາຄັນຂອງບັນຫາທີ່ໄດ້ກ່າວມານັ້ນ ແລະ ເພື່ອເປັນບ່ອນອີງໃຫ້ແກ່ການພັດທະນາ ແລະ ຄຸ້ມຄອງການທ່ອງທ່ຽວຂອງເມືອງວັງວຽງ, ໃນໄລຍະທີ່ຜ່ານມາກະຊວງ ຖວທ ໄດ້ຊ່ວຍສ້າງແຜນແມ່ບົດຄຸ້ມຄອງຕົວເມືອງທ່ອງທ່ຽວວັງວຽງ ສະບັບປີ 2010-2020 ໂດຍໄດ້ຮັບການສະໜັບສະໜູນທາງດ້ານງົບປະມານຈາກທະນາຄານພັດທະນາອາຊີ ຊຶ່ງແມ່ນບໍລິສັດ ເຮັນເຊັນ ປະເທດອົສຕຣາລີເປັນຜູ້ຊ່ວຍໃນການຂຽນແຜນ. ຜ່ານການຈັດຕັ້ງປະຕິບັດຕົວຈິງເຫັນວ່າການຈັດຕັ້ງປະຕິບັດ ແລະ ຜັນຂະຫຍາຍແຜນສະບັບເກົ່າຍັງບໍ່ທັນສາມາດປະຕິບັດໄດ້ດີເທົ່າທີ່ຄວນ. ດັ່ງນັ້ນ, ມາຮອດປີ 2021 ໂດຍອີງໃສ່ທິດຊີ້ນໍາຂອງຫ້ອງວ່າການສໍານັກງານນາຍົກລັດຖະມົນຕີທີ່ມອບໃຫ້ກະຊວງ ຖວທ ເປັນເຈົ້າການໃນການປະສານກັບພາກສ່ວນທີ່ກ່ຽວຂ້ອງເພື່ອປັບປຸງແຜນດັ່ງກ່າວຄືນໃໝ່ ຈຶ່ງເປັນທີ່ມາຂອງແຜນແມ່ບົດພັດທະນາ ແລະ ຄຸ້ມຄອງເຂດການທ່ອງທ່ຽວລະດັບຊາດເມືອງວັງວຽງ ແລະ ບໍລິເວນອ້ອມຮອບ ສໍາລັບປີ 2025-2035 ທີ່ລັດຖະບານໄດ້ອອກຂໍ້ຕົກລົງຮັບຮອງເປັນທີ່ຮຽບຮ້ອຍ, ສະບັບເລກທີ 08/ນຍ ລົງວັນທີ 10 ມັງກອນ 2025.
ການປັບປຸງແຜນແມ່ບົດໃນຄັ້ງນີ້, ຖືເປັນບາດກ້າວທີ່ສໍາຄັນໃນການວາງແຜນຜັງເມືອງ ແລະ ການຄຸ້ມຄອງການທ່ອງທ່ຽວຢູ່ເມືອງວັງວຽງໃນສະພາບການໃໝ່ໃຫ້ມີຄວາມເປັນລະບຽບຮຽບຮ້ອຍ, ແຜນດັ່ງກ່າວຈະເປັນຕົວກໍານົດທິດທາງທີ່ຈໍາເປັນໃນການວາງແຜນ ແລະ ການພັດທະນາການທ່ອງທ່ຽວ, ຮັບປະກັນການປົກປັກຮັກສາທິວທັດທໍາມະຊາດ ແລະ ວັດທະນະທໍາໃນຂອບເຂດຂອງຕົວເມືອງວັງວຽງ ແລະ ບໍລິເວນອ້ອມຮອບໃຫ້ມີຄວາມຍືນຍົງ ແລະ ມີຄວາມເປັນລະບຽບຮຽບຮ້ອຍ.ອີກສິ່ງໜຶ່ງທີ່ສໍາຄັນຂອງແຜນແມ່ບົດສະບັບປີ 2025-2035 ແມ່ນການປະສົມປະສານ ແລະ ເຊື່ອມໂຍງກັນລະຫວ່າງການວາງແຜນຜັງເມືອງ ແລະ ການວາງແຜນພັດທະນາການທ່ອງທ່ຽວໃຫ້ມີຄວາມກົມກຽວກັນ ຊຶ່ງກວມເອົາຂອບເຂດພື້ນທີ່ບໍລິເວນຕົວເມືອງວັງວຽງ ແລະ ບໍລິເວນອ້ອມຮອບໂດຍມີການຄໍານຶງເຖິງຄວາມອາດສາມາດໃນການຂະຫຍາຍຕົວຂອງຕົວເມືອງວັງວຽງໃນອະນາຄົດ.
ຂ່າວ: ວິນນາລີ
ຄໍາເຫັນ