ກະຊວງແຜນການ ແລະ ການລົງທຶນ (ກຜທ) ໄດ້ຕາງໜ້າລັດຖະບານລາວ ຮ່ວມກັບ ທະນາຄານພັດທະນາອາຊີ (ADB) ຈັດກອງປະຊຸມເຜີຍແຜ່ ແຜນຍຸດທະສາດການຮ່ວມມືກັບປະເທດ ສປປ ລາວ ຂອງ ADB ສະບັບໃໝ່ ໄລຍະ 5 ປີ (2024-2028) ຂຶ້ນໃນວັນທີ 24 ພຶດສະພາ ນີ້ ທີ່ນະຄອນຫຼວງວຽງຈັນ ຊຶ່ງແຜນຍຸດທະສາດດັ່ງກ່າວ ມີເປົ້າໝາຍແນໃສ່ເສີມສ້າງຄວາມເຂັ້ມແຂງ ແກ່ພື້ນຖານເສດຖະກິດທີ່ກະຈາຍຢ່າງທົ່ວເຖິງ, ຍືນຍົງ ແລະ ພ້ອມຮັບກັບການປ່ຽນແປງໃນ ສປປ ລາວ.
ກອງປະຊຸມຄັ້ງນີ້, ຈັດຂຶ້ນໂດຍການເປັນປະທານຮ່ວມຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກຜທ ແລະ ທ່ານ ນາງ ໂຊໂນມິ ທະນາກະ ຫົວໜ້າສໍານັກງງານ ADB ປະຈໍາ ສປປ ລາວ ໂດຍມີບັນດາພາກສ່ວນກ່ຽວຂ້ອງຈາກກະຊວງ/ຂະແໜງການຕ່າງໆ ເຂົ້າຮ່ວມ.
ທ່ານ ນາງ ພອນວັນ ອຸທະວົງ ໄດ້ໃຫ້ຮູ້ວ່າ: “ແຜນຍຸດທະສາດການຮ່ວມມືກັບປະເທດສະບັບໃໝ່ ດັ່ງກ່າວແມ່ນສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ສໍາລັບໄລຍະປີ 2020-2025 ຂອງລັດຖະບານ ສປປ ລາວ ຊຶ່ງຈະເປັນເຄື່ອງມືອັນສໍາຄັນຂອງລັດຖະບານ ແລະ ADB ໃນການຮ່ວມມື ເພື່ອເລັ່ງບາດກ້າວການພັດທະນາ ຂອງ ສປປ ລາວ ໃຫ້ບັນລຸໄດ້ຕາມເປົ້າໝາຍທີ່ວາງໄວ້ ໃນນັ້ນລວມທັງ ການເຕີບໂຕທາງດ້ານເສດຖະກິດທີ່ຍືນຍົງ, ການປົກປັກຮັກສາສິ່ງແວດລ້ອມໄດ້ຮັບການເພີ່ມທະວີ, ແລະ ການເພີ່ມທະວີຄວາມເປັນຢູ່ທີ່ດີຂອງປະຊາຊົນລາວ ພາຍໃນປີ 2025 ແລະ ຕໍ່ໆໄປ".
ພາຍໃຕ້ແຜນຍຸດທະສາດ 5 ປີ ສະບັບໃໝ່ນີ້, ADB ຈະຮ່ວມມືຢ່າງໃກ້ຊິດກັບລັດຖະບານ ສປປ ລາວ ເພື່ອ ສົ່ງເສີມການເງິນພາກລັດໃຫ້ຍືນຍົງ, ເສີມຂະຫຍາຍການເຂົ້າເຖິງການບໍລິການທີ່ສະເໝີພາບ ແລະ ມີຄວາມກ້າວໜ້າໃນການປະຕິບັດງານດ້ານການປ່ຽນແປງດິນຟ້າອາກາດ. ແຜນຍຸດທະສາດດັ່ງກ່າວ, ໄດ້ຮັບການຊຸກຍູ້ດ້ວຍຫົວຂໍ້ ການພັດທະນາທີ່ກວມໃນທຸກຂະແໜງການເຊັ່ນ: ຄວາມສະເໝີພາບບົດບາດ ລະຫວ່າງ ຍິງ-ຊາຍ, ການປັບປຸງການປົກຄອງບໍລິຫານ ແລະ ຄວາມສາມາດຂອງສະຖາບັນທີ່ໄດ້ຮັບການປັບປຸງດີຂຶ້ນ, ຄວາມພ້ອມຮັບມືກັບໄພພິບັດ ແລະ ສະພາບການປ່ຽນແປງດິນຟ້າອາກາດ ທີ່ຮຸນແຂງຂຶ້ນ, ຮ່ວມມື ແລະ ເຊື່ອມໂຍງກັນໃນພາກພື້ນທີ່ເພີ່ມຫຼາຍຂຶ້ນ.
ທ່ານ ນາງ ໂຊໂນມິ ທະນາກະ ໄດ້ໃຫ້ຮູ້ວ່າ: “ແຜນຍຸດທະສາດ ການຮ່ວມມືກັບປະເທດ ສໍາລັບ ສປປ ລາວ ຂອງ ADB ສະບັບໃໝ່ ແມ່ນໄດ້ຖືກອອກແບບມາເພື່ອຊ່ວຍໃຫ້ປະເທດ ສາມາດຮັບມືກັບສິ່ງທ້າທາຍທາງດ້ານເສດຖະກິດ ແລະ ການເງິນ ເພື່ອສ້າງການເຕີບໂຕຢ່າງທົ່ວເຖິງ ແລະ ຍືນຍົງ, ໂດຍເນັ້ນໜັກເຖິງຄວາມສໍາຄັນຂອງຄວາມໝັ້ນຄົງ ຂອງເສດຖະກິດມະຫາພາກ, ການສະໜອງການບໍລິການດີ ທີ່ໄດ້ຮັບການປັບປຸງດີຂຶ້ນ ແລະ ຄວາມພ້ອມຮັບມືກັບສະພາບການປ່ຽນແປງດິນຟ້າອາກາດ ຊຶ່ງເປັນເສົາຄໍ້າແກ່ການຮ່ວມມືຂອງພວກເຮົາ”.
ແຜນແຜນຍຸດທະສາດດັ່ງກ່າວ, ໄດ້ແນະນໍາບັນດາມາດຕະການຮອບດ້ານ ເພື່ອຊຸກຍູ້ການເງິນພາກລັດໃຫ້ຍືນຍົງ, ໝູນໃຊ້ການໃຫ້ກູ້ຢືມແບບມີເງື່ອນໄຂສິດທິພິເສດ (Concessional loan), ທຶນຊ່ວຍເຫຼືອລ້າ, ທຶນຊ່ວຍເຫຼືອທາງດ້ານວິຊາການ ແລະ ພ້ອມຜະລິດຕະພັນຄວາມຮູ້ຕ່າງໆ. ຄວາມພະຍາຍາມດັ່ງ ກ່າວ, ມີຈຸດປະສົງເພື່ອແນໃສ່ເສີມຂະຫຍາຍທ່າແຮງຄວາມສາມາດຂອງລັດຖະບານ ໃນການຄຸ້ມຄອງໜີ້ສິນ, ການປະຕິຮູບລັດວິສາຫະກິດ ແລະ ການຄຸ້ມຄອງການເງິນພາກລັດ ເພື່ອຮັບປະກັນໃຫ້ການນໍາໃຊ້ທຶນສາທາລະນະຢ່າງມີປະສິດທິຜົນ ແລະ ມີຄວາມຮັບຜິດຊອບ.
ໃນການປະຕິບັດຄໍາໝັ້ນສັນຍາ ກ່ຽວກັບວຽກການປ່ຽນແປງດິນຟ້າອາກາດ ໃຫ້ມີຄວາມຄືບໜ້າ, ແຜນຍຸດທະສາດຈະສະໜັບສະໜູນຢ່າງເຫັນຄວາມສໍາຄັນ ໃນການສະໜອງທຶນຮອນ ແລະ ສະຕິປັນຍາ ເຂົ້າໃສ່ທຸກຂະແໜງການທີ່ສໍາຄັນເຊັ່ນ: ກະສິກໍາ, ການຄຸ້ມຄອງຊັບພະຍາກອນທໍາມະຊາດ, ການບໍລິຫານຈັດການກັບມົນລະພິດ ແລະ ສິ່ງເສດເຫຼືອ ແລະ ການຄຸ້ມຄອງຄວາມສ່ຽງຈາກໄພພິບັດ, ໂດຍເນັ້ນໜັກເຖິງຄວາມສໍາຄັນຂອງພະລັງງານທົດແທນ; ແຜນຍຸດທະສາດນີ້, ຍັງພະຍາຍາມຊຸກຍູ້ການລົງທຶນໃສ່ພາກເອກະຊົນ ໃນດ້ານພະລັງງານລົມ ແລະ ພະລັງງານແສງຕາເວັນ ເພື່ອຊຸກຍູ້ບັນດາຄໍາໝັ້ນສັນຍາ ວ່າດ້ວຍການປ່ຽນແປງດິນຟ້າອາກາດ ໃຫ້ມີຄວາມຄືບໜ້າ ຕາມການປະກອບສ່ວນຂອງປະເທດທີ່ໄດ້ກໍານົດໄວ້ໃນສັນຍາປາຣີ.
ເພື່ອປັບປຸງການເຂົ້າເຖິງການບໍລິການທີ່ເທົ່າທຽມກັນ, ແຜນຍຸດທະສາດນີ້ ຍັງຈະສຸມໃສ່ການແກ້ໄຂຊ່ອງຫວ່າງໃນການຮັກສາສຸຂະພາບ ແລະ ການສຶກສາ ໂດຍການຍົກສູງຄຸນນະພາບ ແລະ ການສົ່ງ ເສີມການພັດທະນາທັກສະຕ່າງໆ. ຂໍ້ລິເລີ່ມທີ່ມີເປົ້າໝາຍ ແນໃສ່ຊ່ວຍໃຫ້ລະບົບການປະກັນສຸຂະພາບເຂັ້ມ ແຂງຂຶ້ນ, ຕອບໂຕ້ຕໍ່ສິ່ງທ້າທາຍ ຕໍ່ຄວາມໝັ້ນຄົງດ້ານສະບຽງອາຫານ ໂດຍກົງບົນເງື່ອນໄຂທີ່ລະອຽດອ່ອນທາງໂພຊະນາການ ແລະ ເພີ່ມທະວີການພັດທະນາລະບົບຕ່ອງໂສ້ມູນຄ່າທຸລະກິດກະສິກໍາ ຊຶ່ງແມ່ນສ່ວນປະກອບຫຼັກຂອງວິທີການອັນຮອບດ້ານນີ້.
(ຂ່າວ-ພາບ: ສຸກສະຫວັນ, ຂໍ້ມູນ: ADB)
ຄໍາເຫັນ