 |
ການລົງເຄື່ອນໄຫວໃນຄັ້ງນີ້ ນຳໂດຍ ທ່ານ ອາຄົມ ປຣະເສີດ ຮອງປະທານກຳມາທິການເສດຖະກິດ ແລະ ການເງິນ ສະພາແຫ່ງຊາດ, ທ່ານ ວັນແສງ ແກ້ວບຸນພັນ ກຳມະການພັກແຂວງ ເລຂາພັກເມືອງໄຊພູທອງ, ພ້ອມດ້ວຍຄະນະ.
ການລົງພົບປະໄດ້ແບ່ງກຳລັງອອກເປັນ 4 ຈຸດຫຼັກ ຄື ສະໂມສອນຂອງເມືອງ, ບ້ານດົງໝາກໄຟ, ບ້ານໂພນທັນ ແລະ ບ້ານນາບໍ່ ໂດຍມີຄະນະພັກ, ອຳນາດການປົກຄອງທ້ອງຖິ່ນ ແລະ ປະຊາຊົນເຂົ້າຮ່ວມຮັບຟັງ.
ສສຊ ແລະ ສສຂ ໄດ້ເຜີຍແຜ່ຜົນສຳເລັດກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V ເຊິ່ງໄດ້ພິຈາລະນາ ຮັບຮອງເອົາ ເປັນຕົ້ນແມ່ນການເລືອກຕັ້ງຕຳແໜ່ງການນຳຂັ້ນສູງ, ການປັບປຸງກົງຈັກລັດຖະບານໃຫ້ມີ 13 ກະຊວງ ແລະ ການຮັບຮອງເອົາແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2026-2030). ໂຄງການຍຸດທະສາດທີ່ສັງຄົມໃຫ້ຄວາມສົນໃຈ ທີ່ໄດ້ຮັບການຮັບຮອງໃນຄັ້ງນີ້ ແມ່ນແຜນການສ້າງເສັ້ນທາງລົດໄຟ ຈາກແຂວງຄຳມ່ວນ ຫາ ສສ ຫວຽດນາມ ພ້ອມທັງແຜນການສ້າງ ແລະ ປັບປຸງກົດໝາຍໃນ 4 ຂົງເຂດວຽກງານ ຈຳນວນ 91 ສະບັບ (ສ້າງໃໝ່ 19 ສະບັບ ແລະ ປັບປຸງ 72 ສະບັບ) ເພື່ອເປັນເຄື່ອງມືໃນການຄຸ້ມຄອງລັດ-ຄຸ້ມຄອງສັງຄົມ.
ໃນຂະນະດຽວກັນ, ປະຊາຊົນກໍໄດ້ສະເໜີບາງບັນຫາທີ່ຕິດພັນກັບຊີວິດການເປັນຢູ່ ຂອງພວກເຂົາເຈົ້າ, ຫຼັງຈາກນັ້ນ ສສຊ-ສສຂ ໄດ້ຜັດປ່ຽນກັນອະທິບາຍຊີ້ແຈງຢ່າງກົງໄປກົງມາ ພ້ອມທັງຮວບຮວມເອົາຂໍ້ສະເໜີທີ່ເກີນຂອບເຂດ, ສິດ ເພື່ອນຳສະເໜີຕໍ່ອົງການປົກຄອງຂັ້ນເມືອງ, ຂັ້ນແຂວງ ແລະ ພາກສ່ວນກ່ຽວຂ້ອງ ເພື່ອຊອກຫາແນວທາງແກ້ໄຂໃນຕໍ່ໜ້າ.
ການລົງພົບປະ ປະຊາຊົນຄັ້ງນີ້ ທ່ານ ອາຄົມ ປຣະເສີດ ພ້ອມດ້ວຍຄະນະ ໄດ້ລົງກວດກາສະພາບຄວາມເປັນຈິງ ຢູ່ອ່າງເກັບນ້ຳກຸດຕະປໍ ແລະ ໂຄງການກໍ່ສ້າງຊົນລະປະທານຢູ່ເຂດບ້ານນາບໍ່ ເພື່ອເກັບກຳຂໍ້ມູນ, ບັນຫາການຂາດແຄນນ້ຳເຂົ້າໃນການຜະລິດກະສິກຳ ແລະ ໂຄງການກໍ່ສ້າງທີ່ຍັງຊັກຊ້າເນື່ອງຈາກຂາດແຫຼ່ງທຶນ. ພ້ອມທັງ ມອບຄອມພິວເຕີພົກພາ (Notebook) ຈຳນວນ 5 ເຄື່ອງ ພ້ອມດ້ວຍຊຸດກິລາ ໃຫ້ແກ່ທາງເມືອງ ແລະ ໂຮງຮຽນໃນພື້ນທີ່ ມູນຄ່າລວມທັງໝົດ 95 ລ້ານກວ່າກີບ ເພື່ອຫັນເປັນທັນສະໄໝ ແລະ ສົ່ງເສີມການສຶກສາ-ກິລາ ໃຫ້ແກ່ເຍົາວະຊົນໃນທ້ອງຖິ່ນອີກດ້ວຍ.
ຄໍາເຫັນ