 |
ໃນພິທີ, ທ່ານ ນາງ ອາລີ ວົງໜໍ່ບຸນທໍາ ໄດ້ຫວນຄືນປະຫວັດມູນເຊື້ອແຫ່ງການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວວຽກງານຮອບດ້ານ ຂອງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ທີ່ໄດ້ອຸທິດຕົນ ເພື່ອປະກອບສ່ວນໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືພາລະກິດພັດທະນາແມ່ຍິງລາວ. 70 ປີຜ່ານມາ ເອື້ອຍນ້ອງແມ່ຍິງ ໄດ້ເຂົ້າຮ່ວມຕໍ່ສູ້ຢ່າງພິລະອາດຫານ, ບໍ່ຍອມຈຳນົນ, ເສຍສະຫຼະຊີວິດເລືອດເນື້ອ, ລົ້ມລຸກຄຸກຄານ ຄຽງບ່າຄຽງໄຫຼ່ກັບເພດຊາຍ, ຜ່ານຜ່າຄວາມຫຍຸ້ງຍາກ, ລຳບາກ ລະອິດລະອ້ຽວ, ຂ້ຽວຂາດ ແລະ ຍືດເຍື້ອຍາວນານ, ມີຜົນງານບັນທຶກໄວ້ໃນໜ້າປະຫວັດສາດອັນສະຫວ່າງສະໄຫວຂອງຊາດ ແລະ ຂອງແມ່ຍິງໃນຫຼາຍໆດ້ານ ຊຶ່ງທ່ານໄດ້, ຫວນຄືນປະຫວັດຄວາມເປັນມາ ແລະ ນໍາສະເໜີຜົນງານ, ການເຄື່ອນໄຫວບາງດ້ານທີ່ພົ້ນເດັ່ນ ຂອງອົງການຈັດຕັ້ງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ຊຶ່ງເລີ່ມມາຈາກໜ່ວຍຍຸວັນນາລີ, ໜ່ວຍແມ່ນັກຮົບ, ໜ່ວຍເອື້ອຍນັກຮົບ ທີ່ກໍາເນີດຂຶ້ນ ແຕ່ໄລຍະຕົ້ນສະໄໝຕໍ່ຕ້ານຈັກກະພັດລ່າເມືອງຂຶ້ນແບບເກົ່າ ຈົນເຖິງຂັບໄລ່ຈັກກະພັດລ່າເມືອງຂຶ້ນແບບໃໝ່. ພັກໄດ້ເອົາໃຈໃສ່ຢ່າງຈົດຈໍ່ຕໍ່ການເຕົ້າໂຮມ, ປຸກລະດົມຂົນຂວາຍ, ກໍ່ສ້າງແມ່ຍິງໃຫ້ມີຄວາມຕື່ນຕົວສະໝັກໃຈປະກອບສ່ວນໃນພາລະກິດປະຕິວັດ ແລະ ຖືແມ່ຍິງເປັນພາກສ່ວນໜຶ່ງໃນກຳລັງແຮງທີ່ສຳຄັນຂອງພັກ. ພັກເຫັນວ່າການຈັດຕັ້ງແມ່ຍິງ ໄດ້ຂະຫຍາຍຕົວຢ່າງແຂງແຮງໄວວາ. ດັ່ງນັ້ນ, ວັນທີ 20 ກໍລະກົດ 1955 ພັກໄດ້ມີມະຕິຕົກລົງສ້າງຕັ້ງໜ່ວຍຄົ້ນຄວ້າວຽກງານແມ່ຍິງຂຶ້ນຢ່າງເປັນທາງການ. ໜ່ວຍຄົ້ນຄວ້າວຽກງານແມ່ຍິງ ໄດ້ຮັບມອບໝາຍປະຕິບັດ 2 ໜ້າວຽກ ຄື: 1. ຄົ້ນຄວ້າຮ່າງກົດລະບຽບ, ໂຄງການດໍາເນີນງານ ເພື່ອກະກຽມຈັດຕັ້ງເປັນໜ່ວຍແມ່ຍິງໃນຂັ້ນຕໍ່ໄປ; 2. ຄົ້ນຄວ້າສະພາບສັງຄົມລາວ, ຮີດຄອງປະເພນີອັນເກົ່າແກ່ຫຼ້າຫຼັງ ທີ່ກົດໜ່ວງຖ່ວງດຶງຄວາມກ້າວໜ້າຂອງແມ່ຍິງ ແລະ ສົ່ງຜົນສະທ້ອນອັນບໍ່ດີຕໍ່ສຸຂະພາບຂອງແມ່ຍິງ ແລະ ເດັກນ້ອຍທີ່ຄວນປະລະ, ພ້ອມທັງສຶກສາອົບຮົມປຸກລະດົມຂົນຂວາຍແມ່ຍິງໃຫ້ມີຄວາມຕື່ນຕົວ ຢາກແກ້ໄຂສະພາບດ້ອຍໂອກາດ ຂອງຕົນເອງ ແລະ ບຸກບືນກ້າວຂຶ້ນ. ຜ່ານການອຸທິດເຫື່ອແຮງສະຕິປັນຍາ ປະກອບສ່ວນເຂົ້າໃນການຕໍ່ສູ້ປົດປ່ອຍຊາດ ມີແມ່ຍິງຈຳນວນບໍ່ໜ້ອຍ ຖືກສັດຕູຈັບກຸມຄຸມຂັງ, ທຸບຕີທໍລະມານ, ບັງຄັບໃຫ້ໄຂຄວາມລັບ ແຕ່ແມ່ຍິງກໍເດັດຂາດ ບໍ່ຍອມຈຳນົນ, ບໍ່ຍອມໄຂຄວາມລັບ, ດ້ວຍນ້ຳໃຈຕໍ່ສູ້ພິລະອາດຫານ, ດ້ວຍຄວາມທໍລະຫົດອົດທົນ ແລະ ຄວາມອົງອາດກ້າຫານ. ແມ່ຍິງລາວບັນດາເຜົ່າ ຈຶ່ງໄດ້ຮັບນາມມະຍົດເປັນວິລະຊົນແຫ່ງຊາດ 23 ສະຫາຍ, ເປັນນັກຮົບແຂ່ງຂັນທົ່ວປະເທດ 25 ສະຫາຍ. ພ້ອມນັ້ນ, ຍັງມີແມ່ຍິງຈໍານວນຫຼາຍ ໄດ້ຖືກຄັດເລືອກເປັນແບບຢ່າງທີ່ດີເດັ່ນ ໃນການປະກອບສ່ວນເຂົ້າໃນຫຼາຍຂົງເຂດວຽກງານ,ໄດ້ຮັບການຍ້ອງຍໍຈາກພັກ ແລະ ລັດຖະບານຢ່າງສົມກຽດ, ມີຫຼາຍສະຫາຍໄດ້ຮັບຫຼຽນໄຊ, ຫຼຽນກາ ແລະ ໃບຍ້ອງຍໍ. ບັນດາກົມກອງ ກໍໄດ້ຮັບນາມມະຍົດເປັນກົມກອງວິລະຊົນ ເຊັ່ນ: ກອງຮ້ອຍທະຫານເພດຍິງ 769, ໂຮງງານຕໍ່າແຜ່ນ 12 ຕຸລາ, ໂຮງຮຽນມັດທະຍົມເມືອງແປກ ແຂວງຊຽງຂວາງ. ການອຸທິດອັນໃຫຍ່ຫຼວງຂອງແມ່ຍິງລາວບັນດາເຜົ່າ ເປັນການປະກອບສ່ວນສໍາຄັນ ໃນການລຸກຮືຂຶ້ນຢຶດອໍານາດໃນທົ່ວປະເທດ ແລະ ສະຖາປະນາ ສປປ ລາວ ໃນວັນທີ 2 ທັນວາ 1975.
 |
ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ຂອງພັກໃນໄລຍະໃໝ່, ປີ 1984 ກອງປະຊຸມຄັ້ງປະຫວັດສາດ ຜູ້ແທນແມ່ຍິງລາວທົ່ວປະເທດ ໄດ້ເປີດຂຶ້ນຢ່າງເປັນທາງການ, ໃນເວລານັ້ນ ມີສະມາຊິກສະຫະພັນແມ່ຍິງທົ່ວປະເທດ ຈຳນວນສີ່ແສນກວ່າຄົນ. ກອງປະຊຸມໄດ້ສະຫຼຸບຕີລາຄາຜົນງານການເຄື່ອນໄຫວວຽກງານຮອບດ້ານຂອງອົງການຈັດຕັ້ງແມ່ຍິງ, ໄດ້ກໍານົດທິດທາງໜ້າທີ່ວຽກງານການເຄື່ອນໄຫວ ໃຫ້ສອດຄ່ອງກັບໜ້າທີ່ການເມືອງ ຂອງພັກໃນໄລຍະໃໝ່. ໄດ້ປ່ຽນຊື່ຈາກ “ສະມາຄົມແມ່ຍິງລາວຮັກຊາດ” ມາເປັນ “ສະຫະພັນແມ່ຍິງລາວ”. ພ້ອມທັງເລືອກເອົາ ທ່ານນາງ ຄຳແພງ ບຸບຜາ ເປັນປະທານ, ທ່ານນາງ ເພັດສະໝອນ ລາຊະສິມມາ ເປັນຮອງປະທານ. ໄດ້ຮັບຮອງເອົາ ຄໍາຂວັນ 3 ດີ 2 ໜ້າທີ່ ຂອງແມ່ຍິງລາວ ຄື: 3 ດີ: 1. ເປັນພົນລະເມືອງດີ, 2. ເປັນແມ່ທີ່ດີ, 3. ເປັນເມຍທີ່ດີ ແລະ 2 ໜ້າທີ່ຄື: ປົກປັກຮັກສາ, ກໍ່ສ້າງປະເທດຊາດ ແລະ ປົດປ່ອຍແມ່ຍິງ.
 |
ຈາກຜົນງານທີ່ຍາດມາໄດ້, ສະຫະພັນແມ່ຍິງລາວ ໄດ້ຮັບການຍ້ອງຍໍຊົມເຊີຍຈາກພັກ ແລະ ລັດຖະບານ ຄື: ກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ I ປະທານ ສຸພານຸວົງ ປະທານປະເທດ ປະດັບຫຼຽນໄຊອິດສະຫຼະຊັ້ນ I ແລະ ທຸງມູນເຊື້ອ ໃຫ້ແກ່ຂະບວນການແມ່ຍິງລາວ; ກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ V ທ່ານ ຈູມມາລີ ໄຊຍະສອນ ເລຂາທິການໃຫຍ່ ປະທານປະເທດ ປະດັບຫຼຽນໄຊອິດສະຫຼະຊັ້ນ I ໃຫ້ສະຫະພັນແມ່ຍິງລາວ ຍ້ອງຍໍຜົນງານ 20 ປີ; ໃນໂອກາດສະເຫຼີມສະຫຼອງວຽງຈັນ ເປັນນະຄອນຫຼວງ ຄົບຮອບ 450 ປີ ກ້ອນກໍາລັງແມ່ຍິງບັນດາເຜົ່າໄດ້ຮັບຫຼຽນໄຊແຮງງານ ຊັ້ນ II; ເນື່ອງໃນໂອກາດສ້າງຕັ້ງສະຫະພັນແມ່ຍິງລາວ ຄົບຮອບ 60 ປີ, ທ່ານ ຈູມມາລີ ໄຊຍະສອນ ເລຂາທິການໃຫຍ່ ປະທານປະເທດ ໄດ້ປະດັບຫຼຽນຄໍາແຫ່ງຊາດ ຊຶ່ງເປັນຫຼຽນສູງສຸດ ຂອງ ສປປ ລາວ ໃຫ້ສະຫະພັນແມ່ຍິງລາວ ແລະ ປີ 2015 ລັດຖະບານ ສສ ຫວຽດນາມ ໄດ້ປະດັບຫຼຽນໄຊເອກະລາດ ຊັ້ນ I ໃຫ້ສະຫະພັນແມ່ຍິງລາວ. ນອກນັ້ນ, ຜູ້ເຂົ້າຮ່ວມກໍໄດ້ຮັບຟັງສູນທອນພົດຈາກ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດແຫ່ງ ສປປ ລາວ.
 |
ຫຼັງຈາກນັ້ນ, ທ່ານ ດອນ ໄພວົງ ຮອງຫົວໜ້າຄະນະຈັດຕັ້ງສູນກາງພັກ ຜ່ານດໍາລັດວ່າດ້ວຍການປະດັບຫຼຽນໄຊອິດສະຫຼະ ຊັັ້ນ III ທີ່ມີຜົນງານໃນການນໍາພາ-ຊີ້ນໍາວຽກງານສະຫະພັນແມ່ຍິງ, ສົ່ງເສີມມູນເຊື້ອວັດທະນະທໍາຮີດຄອງປະພນີອັນດີງານຂອງຊາດ ແລະ ແມ່ຍິງບັນດາເຜົ່າ. ໃຫ້ກຽດປະດັບຫຼຽນໄຊອິດສະຫຼະ ຊັັ້ນ III ຄັ້ງນີ້ ໂດຍພະນະທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ.
ໃນພິທີຍັງໄດ້ຮັບຊົມຟີມມູນເຊື້ອ 70 ປີ ແຫ່ງການເຕີບໃຫຍ່ຂະຫຍາຍຕົວຂອງສະຫະພັນແມ່ຍິງລາວ, ຊົມການສະແດງສິລະປະຈາກສິລະປະກອງທັບປະຊາຊົນລາວ ແລະ ຮັບຟັງບົດກອນອວຍພອນ ຈາກຕາງໜ້າສູນກາງຊາວໝຸ່ມ ປະຊາຊົນ ປະຕິວັດລາວ ຕື່ມອີກ.
ຂ່າວ-ພາບ: ຍຸພິນທອງ-ບຸນອູ້ມ
ຄໍາເຫັນ