ພິທີມອບ-ຮັບ ເງິນສະໜັບສະໜູນການປະຕິບັດຂໍ້ແຂ່ງຂັນ

ພິທີມອບ-ຮັບ ເງິນສະໜັບສະໜູນ ຂອງນັກທຸລະກິດ ເຂົ້າໃນການປະຕິບັດຂໍ້ແຂ່ງຂັນ ເພື່ອສ້າງເງື່ອນໄຂປະກາດບ້ານໃຫຍ່ຫຼັກ 32 ເປັນຕົວເມືອງນ້ອຍຊົນນະບົດ ຊຶ່ງຈັດຂຶ້ນວັນທີ 16 ຕຸລານີ້ທີ່ສະໂມສອນກຸ່ມບ້ານຫົວນ້ຳງາ ບ້ານຫຼັກ 32 ເມືອງໄຊ ແຂວງອຸດົມໄຊ ພາຍໃຕ້ການເປັນປະທານຂອງທ່ານ ສົມຈັນ ເທບພາລີ ຮອງເລຂາພັກເມືອງ ປະທານກວດກາພັກ-ລັດເມືອງໄຊ ຫົວໜ້າຄະນະສະມາຊິກສະພາປະຊາຊົນແຂວງ, ມີບັນດາກຳມະການພັກເມືອງ, ເລຂາຄະນະພັກຮາກຖານກຸ່ມບ້ານ ແລະ ພາກສ່ວນກ່ຽວ ຂ້ອງເຂົ້າຮ່ວມຢ່າງພ້ອມພຽງ.
ໃນພິທີ, ທ່ານ ທອງພັນ ເຊຍເຢລີ ກໍາມະການພັກເມືອງ ເລຂາຄະນະພັກຮາກຖານກຸ່ມບ້ານຫົວນ້ຳງາ ນາຍບ້ານຫຼັກ32 ຂຶ້ນຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການຍ້ອງຍໍ ໃຫ້ແກ່ບຸກຄົນດີເດັ່ນ ແລະ ບໍລິສັດດີເດັ່ນ ໃນການປະກອບສ່ວນເພື່ອພັດທະນາບ້ານຫຼັກ32 ພ້ອມທັງມອບ-ຮັບເງິນ ແລະ ໃບຍ້ອງຍໍໂດຍຜັດປ່ຽນກັນຂຶ້ນມອບ ແລະ ຮັບ ຊຶ່ງບໍລິສັດ ຟົງຟົງ ຈໍາກັດຜູ້ດຽວມອບເງິນສົດຈໍານວນ 20 ລ້ານກີບ, ບໍລິສັດ ຫົວເຟິງ ມອບເງິນສົດຈຳນວນ 15 ລ້ານກີບ, ບໍລິສັດ ເຊິນຟົງ ມອບເງິນສົດຈຳນວນ 10 ລ້ານກີບ, ບໍລິສັດ ຟົງດາ  ມອບເງິນສົດຈໍານວນ 10 ລ້ານກີບ ແລະ ບໍລິສັດລາວຫົວຍູມອບເງິນສົດຈຳນວນ 10 ລ້ານກີບ; ສ່ວນນັກທຸລະກິດສ່ວນບຸກຄົນ ທ່ານ ນໍເນັງລີ ມອບເງິນສົດຈຳນວນ 5ລ້ານກີບ, ທ່ານ ບຸນມີ ສີປະເສີດ, ທ່ານ ໄຊຈາ ເຮີ ແລະ ທ່ານ ເບຍປໍ ຊົງ ມອບເງິນສົດຜູ້ລະ 2 ລ້ານກີບ, ລວມທັງໝົດ 76 ລ້ານກີບ, ເງິນທີ່ບັນດາບໍລິສັດ ແລະ ບັນດານັກທຸລະກິດສ່ວນບຸກຄົນມາມອບໃນຈໍານວນດັ່ງກ່າວນີ້ ແມ່ນເງິນທີ່ນຳໃຊ້ເຂົ້າໃນການປະຕິບັດຂໍ້ແຂ່ງຂັນ ເພື່ອສ້າງເງື່ອນໄຂປະກາດບ້ານໃຫຍ່ຫຼັກ 32 ເປັນຕົວເມືອງນ້ອຍຊົນນະບົດ ແລະ ສົມທົບກັບອົງການປົກຄອງແຂວງ ແລະ ອົງການປົກຄອງເມືອງໄຊ.
ໂອກາດດັ່ງກ່າວ, ທ່ານ ສົມຈັນ ເທບພາລີ ຮອງເລຂາພັກເມືອງ ປະທານກວດກາພັກ-ລັດ ເມືອງ ຫົວໜ້າຄະນະສະມາຊິກສະພາປະຊາຊົນແຂວງ ໄດ້ສະແດງຄວາມຂອບໃຈຕໍ່ບັນດາບໍລິສັດ ແລະ ນັກທຸລະກິດສ່ວນບຸກຄົນທີ່ໄດ້ນຳເອົາວັດຖຸປັດໄຈ ມາຊ່ວຍສົມທົບກັບພັກ-ລັດຂັ້ນເທິງ ເຂົ້າໃນການປະຕິບັດຂໍ້ແຂ່ງຂັນ ເພື່ອສ້າງເງື່ອນໄຂປະກາດບ້ານໃຫຍ່ຫຼັກ 32 ໃຫ້ກາຍເປັນຕົວເມືອງນ້ອຍໃນຊົນນະບົດ ໃຫ້ປະກົດຜົນເປັນຈິງ ແລະ ທ່ານຍັງໄດ້ກ່າວອີກວ່າການຊ່ວຍເຫຼືອປະກອບສ່ວນຂອງແຕ່ລະບໍລິສັດ ແລະ ນັກທຸລະກິດໃນຄັ້ງນີ້ຈະບໍ່ເປັນຄັ້ງທຳອິດ ແລະ ຄັ້ງສຸດທ້າຍ ແລະ ເຊື່ອວ່າຍັງຈະໄດ້ຂໍຄວາມຊ່ວຍເຫຼືອຈາກບັນດາຜູ້ປະກອບການ ຫຼືນັກທຸລະກິດ ແລະ ບໍລິສັດຕື່ມອີກໃນເທື່ອໜ້າ.
(ຂ່າວ-ພາບ: ອຸດົມໄຊ)