 |
ກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ໄດ້ດຳເນີນຢ່າງເປັນທາງການໃນວັນທີ 23-27 ມີນາ 2026 ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ກອງປະຊຸມຄັ້ງນີ້ ໄດ້ມີການເລືອກຕັ້ງ ແລະ ຮັບຮອງເອົາບຸກຄະລາກອນຂັ້ນສູງ ສະພາແຫ່ງຊາດ ໂດຍໄດ້ຮັບການເລືອກຕັ້ງທ່ານ ໄຊສົມພອນ ພົມວິຫານ ເປັນປະທານສະພາແຫ່ງຊາດ ພ້ອມດ້ວຍຮອງປະທານສະພາແຫ່ງຊາດ 4 ທ່ານ ແລະ ຄະນະປະຈຳສະພາແຫ່ງຊາດ, ທ່ານ ທອງລຸນ ສີສຸລິດ ໄດ້ຮັບການເລືອກຕັ້ງເປັນປະທານປະເທດ, ທ່ານ ນາງ ວຽງທອງ ສີພັນດອນ ເປັນຮອງປະທານປະເທດ ແລະ ທ່ານ ສອນໄຊ ສີພັນດອນ ເປັນນາຍົກລັດຖະມົນຕີ.
ການຮັບຮອງແຜນຍຸດທະສາດ 5 ປີ (2026-2030) ແຜນພັດທະນາເສດຖະກິດ-ສັງຄົມ: ວາງເປົ້າໝາຍ GDP ຂະຫຍາຍຕົວສະເລ່ຍ 6% ຕໍ່ປີຂຶ້ນໄປ, ປີ 2030 ລາຍຮັບ GDP ຕໍ່ຫົວຄົນໃຫ້ໄດ້ 3,104 ໂດລາ. ວຽກງານກົດໝາຍ: ຮັບຮອງແຜນສ້າງ ແລະ ປັບປຸງກົດໝາຍ 91 ສະບັບ ເພື່ອຍົກສູງການປົກຄອງດ້ວຍກົດໝາຍ; ໂຄງການຍຸດທະສາດ: ເຫັນດີດ້ານຫຼັກການໂຄງການກໍ່ສ້າງທາງລົດໄຟ ລາວ-ຫວຽດນາມ (ທ່າແຂກ-ມູຢາ) ດ້ວຍຮູບແບບ BOT ເພື່ອຍົກລະດັບການເຊື່ອມໂຍງເຊື່ອມຈອດກັບພາກພື້ນ ກອງປະຊຸມໄດ້ຮັບຮອງແຜນເຄື່ອນໄຫວວຽກງານ 5 ປີ ຂອງອົງການກວດກາແຫ່ງລັດ ອົງການກວດສອບແຫ່ງລັດ ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເນັ້ນໜັກການຕ້ານການສໍ້ລາດບັງຫຼວງ ການເກັບກູ້ຊັບສິນລັດ ການປັບປຸງກົງຈັກການຈັດຕັ້ງໃຫ້ເຂັ້ມແຂງ ແລະ ຍົກສູງຄຸນນະພາບການດຳເນີນຄະດີ ເພື່ອສ້າງຄວາມເຊື່ອໝັ້ນໃຫ້ແກ່ສັງຄົມ.
ກອງປະຊຸມຄັ້ງປະຖົມມະລືກ ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດຳເນີນໄປຢ່າງເປັນທາງການ ໃນລະຫວ່າງວັນທີ 1-3 ເມສາ 2026 ພາຍໃຕ້ການເປັນປະທານຂອງ ທ່ານ ອາດສະພັງທອງ ສີພັນດອນ ກອງປະຊຸມໄດ້ບັນລຸຜົນສຳເລັດໃນການຮັບຮອງເອົາວຽກງານສຳຄັນຕ່າງໆ ເພື່ອກຳນົດທິດທາງການພັດທະນານະຄອນຫຼວງວຽງຈັນ ໃນໄລຍະ 5 ປີຕໍ່ໜ້າ (2026-2030) ບັນດາເນື້ອໃນສຳຄັນທີ່ໄດ້ຮັບຮອງໃນກອງປະຊຸມ ໄດ້ຮັບຮອງຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ X (ປະຈຳເຂດເລືອກຕັ້ງທີ 1) ຈຳນວນ 19 ທ່ານ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ ຊຸດທີ V ຈຳນວນ 45 ທ່ານ ໃນກອງປະຊຸມ ໄດ້ມີການເລືອກຕັ້ງບຸກຄະລາກອນ ຊຶ່ງໄດ້ຮັບເລືອກ ທ່ານ ອາດສະພັງທອງ ສີພັນດອນ ເປັນປະທານສະພາປະຊາຊົນ ນະຄອນຫຼວງວຽງຈັນ, ທ່ານ ສິລິລາດທົງສິນ ທອງເພັງ ໄດ້ຮັບການແຕ່ງຕັ້ງເປັນປະທານຄະນະກຳມະການປົກຄອງ ນະຄອນຫຼວງວຽງຈັນ ກອງປະຊຸມ ວາງຄາດໝາຍສູ້ຊົນໃຫ້ເສດຖະກິດນະຄອນຫຼວງວຽງຈັນ ຂະຫຍາຍຕົວສະເລ່ຍ 8% ຕໍ່ປີ ພ້ອມທັງກຳນົດມາດຕະການແກ້ໄຂບັນຫາເຄັ່ງຮ້ອນດ້ານເສດຖະກິດ ການຄຸ້ມຄອງລາຄາສິນຄ້າ ບັນຫາຢາເສບຕິດ ແລະ ປະກົດການຫຍໍ້ທໍ້ໃນສັງຄົມ ກອງປະຊຸມໄດ້ຮັບຮອງແຜນການເຄື່ອນໄຫວ 5 ປີ ຂອງອົງການກວດສອບປະຈຳພາກກາງ 1 ແລະ ອົງການກວດກາລັດ ນະຄອນຫຼວງວຽງຈັນ ເພື່ອຍົກສູງປະສິດທິພາບການຄຸ້ມຄອງລັດ ແລະ ການເກັບກູ້ລາຍຮັບ, ຮັບຮອງແຜນການສ້າງ ແລະ ປັບປຸງນິຕິກຳ 5 ປີ ພ້ອມທັງແຜນການເຄື່ອນໄຫວຂອງສານປະຊາຊົນ ແລະ ອົງການໄອຍະການປະຊາຊົນ ເພື່ອສ້າງຄວາມເຊື່ອໝັ້ນ ແລະ ຄວາມຍຸຕິທຳໃຫ້ແກ່ສັງຄົມ ກອງປະຊຸມຄັ້ງນີ້ ຖືເປັນບາດກ້າວສຳຄັນໃນການຈັດຕັ້ງຜັນຂະຫຍາຍແຜນພັດທະນາ ເພື່ອສ້າງນະຄອນຫຼວງວຽງຈັນ ໃຫ້ມີຄວາມເຂັ້ມແຂງ ມີສະຖຽນລະພາບ ແລະ ພັດທະ ນາຢ່າງຍືນຍົງໃນຊຸມປີຕໍ່ໜ້າ.
(ແຫຼ່ງຂ່າວ: ວຽງຈັນໃໝ່)
ຄໍາເຫັນ