ພົບວ່າ:ຂະແໜງການທ່ອງທ່ຽວປ່ອຍອາຍແກັສເຮືອນແກ້ວເພີ່ມຂຶ້ນ 40% ໃນໄລຍະ 10 ປີ ເມື່ອນັບມາເຖິງປີ 2019.
ການຄົ້ນຄວ້າຊີ້ໃຫ້ເຫັນວ່າ: ການປ່ອຍອາຍກາກບອນຟຸດພຣິ້ນ (carbon footprint) ຫຼື ປະລິມານລວມຂອງອາຍແກັສກາກບອນໄດອອກໄຊ ຂອງອຸດສາຫະກໍາການທ່ອງທ່ຽວທົ່ວໂລກເພີ່ມຂຶ້ນຈາກ 3.7ກິກະຕັນ (Gt) ໃນປີ 2009 ເປັນ 5.2ກິກະຕັນ ໃນປີ 2019 ຊຶ່ງເພີ່ມຂຶ້ນ 40.5%.
ຕະຫຼອດໄລຍະເວລາດັ່ງກ່າວ, ອັດຕາການເພີ່ມຂຶ້ນຂອງການປ່ອຍອາຍແກັສເຮືອນແກ້ວຈາກຂະແໜງການທ່ອງທ່ຽວ ຢູ່ທີ່ 3.5% ຕໍ່ປີ, ໂດຍພົບວ່າການປ່ອຍອາຍແກັສເຮືອນແກ້ວຈາກທຸກແຫຼ່ງທົ່ວໂລກ ເພີ່ມຂຶ້ນ 1.5% ຕໍ່ປີຈາກ 50.9 ກິກະຕັນ ໃນປີ 2009 ເປັນ 59.1 ກິກະຕັນ ໃນປີ 2019, ຂະແໜງການທ່ອງທ່ຽວກວມເອົາ 8,8% ຂອງການປ່ອຍອາຍແກັສເຮືອນແກ້ວທົ່ວໂລກໃນປີ 2019, ເພີ່ມຂຶ້ນຈາກ 7,2% ໃນປີ 2009.
ບົດລາຍງານລະບຸວ່າ: ຄວາມກ້າວໜ້າດ້ານເຕັກໂນໂລຊີທີ່ຄ່ອຍເປັນຄ່ອຍໄປ ແລະຄວາມຕ້ອງການທີ່ເພີ່ມຂຶ້ນຢ່າງໄວວາເປັນແຮງຊຸກຍູ້ໃຫ້ການປ່ອຍອາຍແກັສເຮືອນແກ້ວເພີ່ມຂຶ້ນ.
ຄະນະນັກຄົ້ນຄວ້າຈາກມະຫາວິທະຍາໄລຄວີນແລນ, ມະຫາວິທະຍາໄລຊິດນີ ໃນອົສຕຣາລີລວມເຖິງມະຫາວິທະຍາໄລລິນເນຍ ຂອງຊູແອດ ໄດ້ຕິດຕາມການເດີນທາງລະຫວ່າງປະເທດແລະພາຍໃນປະເທດ ໃນ 175 ປະເທດ.
ບັນດານັກຄົ້ນຄ້ວາໄດ້ແນະນຳຫຼາຍມາດຕະການເພື່ອຊ່ວຍໃຫ້ຂະແໜງການທ່ອງທ່ຽວຫຼຸດຜ່ອນການປ່ອຍອາຍແກັສເຮືອນແກ້ວເຊັ່ນ: ການຫຼຸດຜ່ອນຖ້ຽວບິນໄລຍະໄກ, ການເກັບພາສີກາກບອນໄດອອກໄຊ,ການກໍານົດງົບປະມານກາກບອນ ແລະ ກຳນົດພັນທະຜູກພັນດ້ານນໍ້າມັນເຊື້ອໄຟທາງເລືອກໃຫ້ສາຍການບິນຮັບຜິດຊອບ. ສ່ວນລະດັບທ້ອງຖິ່ນ ບັນດານັກຄົ້ນຄວ້າລະບຸວ່າ: ຜູ້ປະກອບການດ້ານການທ່ອງທ່ຽວສາມາດຫັນມາໃຊ້ໄຟຟ້າພະລັງງານທົດແທນສໍາລັບທີ່ພັກອາໄສ, ອາຫານ ແລະການບັນເທີງ. ຕະຫຼອດຈົນປ່ຽນມານຳໃຊ້ພາຫະນະໄຟຟ້າໃນການຂົນສົ່ງແທນໄດ້.
ຄໍາເຫັນ