ການສ້າງຕັ້ງກຸ່ມ ແລະ ສະຫະກອນ ແມ່ນເພື່ອແນໃສ່ເຕົ້າໂຮມກຳລັງການຜະລິດ ໃຫ້ເປັນກຳລັງແຮງ ແກ່ການຜະລິດເປັນສິນຄ້າ (ຮ່ວມກັນຊື້ກົນຈັກ, ຮ່ວມກັນຊື້ປັດໄຈການຜະລິດ, ຮ່ວມກັນຜະລິດ, ຮ່ວມກັນຂາຍຜົນຜະລິດ) ເພື່ອແນໃສ່ເພີ່ມປະລິມານ ແລະ ຄຸນນະພາບໃຫ້ຜົນຜະລິດ; ມີຄວາມສະດວກຕໍ່ການສົ່ງເສີມຈາກພາກສ່ວນຕ່າງໆ (ການສະໜອງທຶນ, ການສະໜອງກົນຈັກ, ການສະໜອງເຕັກນິກ) ແລະ ຊາວກະສິກອນ ມີໂອກາດໃນການແລກປ່ຽນບົດຮຽນໃນການຜະລິດ, ມີກຸ່ມ ແລະ ສະຫະກອນຕົວແບບ ທີ່ຈຸດສາທິດ ແລະ ແລກປ່ຽນຮຽນຮູ້; ກຸ່ມ ແລະ ສະຫະກອນ ມີກຳລັງແຮງໃນການກຳນົດລາຄາສິນຄ້າ, ມີກຳລັງແຮງໃນການເຮັດການຜະລິດ ແລະ ເຮັດສັນຍາຜູກພັນສອງສົ້ນ; ສ້າງຄວາມໝັ້ນໃຈໃຫ້ຜູ້ປະກອບການ, ໂຮງງານປຸ່ງແຕ່ງໃນການຊື້-ຂາຍຜົນຜະລິດ ແລະ ສ້າງລາຍຮັບທີ່ໝັ້ນຄົງແກ່ຊາວກະສິກອນ; ເພື່ອເປັນການສ້າງພື້ນຖານເສດຖະກິດຂັ້ນທ້ອງຖິ່ນໃຫ້ເຂັ້ມແຂງ; ກໍ່ໃຫ້ເກີດມີຄວາມສາມັກຄີ, ການຊ່ວຍເຫຼືອກຊຶ່ງກັນ ແລະ ກັນ ເຮັດໃຫ້ສັງຄົມມີຄວາມສະຫງົບ.
ໃນໄລຍະຜ່ານມາ, ລັດຖະບານ ກໍໄດ້ມີບັນດານິຕິກຳ ທີ່ເປັນເຄື່ອງມືການສ້າງຕັ້ງກຸ່ມ ແລະ ສະຫະກອນ ເປັນຕົ້ນແມ່ນກົດໝາຍວ່າດ້ວຍຫະກະກອນ. ດຳລັດວ່າດ້ວຍກຸ່ມ ແລະ ສະຫະກອນ; ດຳລັດວ່າດ້ວຍການຜະລິດກະສິກຳແບບມີສັນຍາຜູກພັນ; ຄູ່ມືແນະນໍາການຈັດຕັ້ງປະຕິບັດວຽກງານກຸ່ມ ແລະ ສະຫະກອນກະສິກຳ ຊຶ່ງຜົນສຳເລັດໃນການຈັດຕັ້ງກຳລັງການຜະລິດ ເຮັດໃຫ້ປັດຈຸບັນທົ່ວປະເທດ ມີຈໍານວນກຸ່ມຜະລິດກະສິກຳ ທັງໝົດ 4,193 ກຸ່ມ ແລະ ສະຫະກອນກະສິກຳ 36 ແຫ່ງ. ໃນນີ້, ລັດເຮົາກໍໄດ້ເອົາໃຈໃສ່ໃນການກໍ່ສ້າງ ຝຶກອົບຮົມສ້າງຄວາມເຂັ້ມແຂງໃຫ້ກຸ່ມ ແລະ ສະຫະກອນ ຊຶ່ງໃນກອງປະຊຸມສະຫຼຸບວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ທີ່ຈັດຂຶ້ນຢູ່ນະຄອນຫຼວງວຽງຈັນ ເມື່ອທ້າຍເດືອນມັງກອນຜ່ານມານີ້ ກໍໄດ້ໃຫ້ຮູ້ວ່າ ປີຜ່ານມາ ກະຊວງກະສິກຳ ແລະ ປ່າໄມ້ ກໍຄືພາກສ່ວນກ່ຽວຂ້ອງໄດ້ຝຶກອົບຮົບໃຫ້ກຸ່ມ ແລະ ສະຫະກອນ ໄດ້ທັງໝົດ 35 ຄັ້ງ, ມີຜູ້ເຂົ້າຮ່ວມທັງໝົດ 1,205 ເທື່ອຄົນ ແລະ ເປັນເພດຍິງ 506 ເທື່ອຄົນ; ພ້ອມກັນນັ້ນ, ຍັງໄດ້ຈັດຕັ້ງເຜີຍແຜ່ນິຕິກຳ ແລະ ເອກະສານຕ່າງໆ ກ່ຽວກັບການສົ່ງເສີມການສ້າງຕັ້ງກຸ່ມ, ສະຫະກອນ ແລະ ກອງທຶນ ໄດ້ 11 ຄັ້ງ ມີຜູ້ເຂົ້າຮ່ວມ 500 ເທື່ອຄົນ ແລະ ເປັນເພດຍິງ 210 ເທື່ອຄົນ. ສະເພາະປີ 2024 ຜ່ານມາ, ກົມສົ່ງເສີມກະສິກຳ ແລະ ສະຫະກອນ ໄດ້ມອບທຶນ 1,187,000 ໂດລາ (ທຶນຊື້ກົນຈັກ ແລະ ເປັນກອງທຶນ) ໃຫ້ 53 ກຸ່ມການຜະລິດກະສິກຳໃນແຂວງຈໍາປາສັກ, ສະຫວັນນະເຂດ, ຄໍາມ່ວນ, ສາລະວັນ ແລະ ແຂວງເຊກອງ ເພື່ອເປັນທຶນໝູນວຽນຂອງກຸ່ມ ແລະ ທຶນດັ່ງກ່າວນັ້ນ ແມ່ນໄດ້ຮັບການສະໜັບສະໜູນຈາກທະນາຄານພັດທະນາອາຊີ. ປັດຈຸບັນ, ມີ 58 ກຸ່ມ ໃນ 56 ບ້ານ 19 ເມືອງ ໃນ 6 ແຂວງ (13 ກຸ່ມໃນແຂວງຄໍາມ່ວນ, 11 ກຸ່ມໃນແຂວງສະຫວັນະເຂດ, 11 ກຸ່ມໃນແຂວງສາລະວັນ, 7 ກຸ່ມໃນແຂວງຈໍາປາສັກ, 11 ກຸ່ມໃນແຂວງເຊກອງ ແລະ 5 ກຸ່ມໃນນະຄອນຫຼວງວຽງຈັນ) ທີ່ເຮັດການຜະລິດແບບມີສັນຍາຜູກພັນ ກັບຜູ້ປະກອບການ.
ເຖິງຢ່າງໃດກໍຕາມ, ການຈັດຕັ້ງກຳລັງການຜະລິດ ກໍຄືກຸ່ມ ແລະ ສະຫະກອນ ກໍຍັງມີບາງດ້ານທີ່ເປັນຂໍ້ຄົງຄ້າງ ຊຶ່ງກະຊວງກະສິກຳ ແລະ ປ່າໄມ້ ໂດຍສະເພາະແມ່ນກົມສົ່ງເສີມກະສິກຳ ແລະ ສະຫະກອນ ກໍໄດ້ມີບາງມາດຕະການແກ້ໄຂ ເປັນຕົ້ນແມ່ນການກວດຄືນກຸ່ມ ແລະ ສະຫະກອນ ເພື່ອແຍກໃຫ້ເຫັນສາເຫດ ກຸ່ມທີ່ເຂັ້ມແຂງ, ກຸ່ມປານກາງ ແລະ ກຸ່ມບໍ່ເຂັ້ມແຂງ ເພື່ອເສີມຂະຫຍາຍບົດຮຽນຂອງກຸ່ມທີ່ເຂັ້ມແຂງ, ປັບປຸງດ້ານອ່ອນຂອງກຸ່ມປານກາງ ແລະ ບໍ່ເຂັ້ມແຂງ ທັງນີ້ກໍເພື່ອສ້າງໃຫ້ກຸ່ມ ແລະ ສະຫະກອນ ການຜະລິດກະສິກຳ ເປັນກຳລັງແຮງໃຫ້ການຜະລິດເພື່ອຄໍ້າປະກັນສະບຽງອາຫານ ແລະ ເປັນສິນຄ້າສະໜອງພາຍໃນ ແລະ ຕ່າງປະເທດ.
(ພາບປະກອບຈາກສະຫະກອນ ທ່າຊ້າງ)
ຄໍາເຫັນ