ໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 76 ປີ (13 ສິງຫາ 1950 - 13 ສິງຫາ 2026 ໃກ້ຈະມາເຖິງນີ້, ທ່ານ ວັນນະສິນ ສິມມາວົງ ຜູ້ອຳນວຍການໃຫຍ່ ສໍານັກຂ່າວສານປະເທດລາວ (ຂປລ) ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ໃນວັນທີ 11 ສິງຫາ ຜ່ານມານີ້ ທີ່ສໍານັກງານຂ່າວສານປະເທດລາວ ໂດຍໄດ້ຍົກໃຫ້ການເຕີບໃຫຍ່ຂະຫຍາຍຕົວ ແລະ ບົດບາດ ຂອງສື່ມວນຊົນລາວ ຕະຫຼອດໄລຍະ 76 ປີ ຜ່ານມາຈົນເຖິງຍຸກດີຈີຕອນໃນປັດຈຸບັນ. ການເຕີບໃຫຍ່ຂະຫຍາຍຕົວຂອງສື່ມວນຊົນແມ່ນມີຄວາມໂດດເດັ່ນໃນແຕ່ລະໄລຍະໂດຍສະເພາະດ້ານວັດຖຸ-ອຸປະກອນ ແລະ ເຕັກນິກວິຊາການ. ຈາກທີ່ໃນອະດີດອຸປະກອນ ຍັງມີຄວາມຈໍາກັດ ແລະ ການຜະລິດ, ເຜີຍແຜ່ຂ່າວສານມີຄວາມຫຍຸ້ງຍາກ ຊຶ່ງມາຮອດປັດຈຸບັນວິທະຍາສາດ-ເຕັກໂນໂລຊີ ໄດ້ພັດທະນາຢ່າງວ່ອງໄວ ສົ່ງຜົນໃຫ້ວຽກງານສື່ມວນຊົນໄດ້ມີການພັດທະນາ ສາມາດຜະລິດ, ສົ່ງຂ່າວ ແລະ ການກະຈາຍຂໍ້ມູນຂ່າວສານມີຄວາມສະດວກ, ວ່ອງໄວ ແລະ ກວ້າງຂວາງ. ນອກຈາກນີ້ ສື່ມວນຊົນລາວຍັງເປັນອົງປະກອບທີ່ສຳຄັນໃນຂະບວນການພັດທະນາສັງຄົມ ແລະ ປະເທດຊາດໂດຍເປັນສື່ກາງໃນການສະໜອງຂ່າວສານ, ສ່ອງແສງບັນຫາຕ່າງໆຂອງສັງຄົມ, ຊີ້ແຈງໃຫ້ປະຊາຊົນຮັບຮູ້ຂໍ້ເທັດຈິງ ແລະ ສ້າງຄວາມເຂົ້າໃຈທີ່ຖືກຕ້ອງ. ຄວບຄູ່ກັບການປ່ຽນແປງດ້ານເສດຖະກິດ, ສັງຄົມ ແລະ ເຕັກໂນໂລຊີ ສື່ມວນຊົນລາວຍັງເປັນຜູ້ສ່ອງແສງທຸກການເຄື່ອນໄຫວຂອງສັງຄົມ, ເປັນແຮງຂັບເຄື່ອນການພັດທະນາເສດຖະກິດ-ສັງຄົມ, ເປັນຜູ້ຊີ້ແຈງ ແລະ ສ້າງຄວາມເຂົ້າໃຈໃນບັນຫາຕ່າງໆຢ່າງຖືກຕ້ອງ, ເປັນເວທີ ລະຫວ່າງອົງການບໍລິຫານ, ການປົກຄອງກັບປະຊາຊົນ ພ້ອມທັງຊຸກຍູ້ ສ້າງຄວາມສາມັກຄີເປັນປຶກແຜ່ນ, ຮັກຊາດ, ຮັກບ້ານເກີດເມືອງນອນ ແລະ ພ້ອມກັນສ້າງສາພັດທະນາປະເທດຊາດ. ສື່ມວນຊົນໄດ້ກາຍເປັນອາວຸດອັນແຫຼມຄົມຂອງພັກ, ເປັນກະບອກສຽງໃຫ້ພັກ, ລັດ ແລະ ປະຊາຊົນ, ເປັນເວທີ ສົ່ງເສີມລະບອບປະຊາທິປະໄຕ.
ທ່ານ ວັນນະສິນ ສິມມາວົງ ໄດ້ໃຫ້ຮູ້ຕື່ມວ່າ: ເພື່ອສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ແລະ ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກຄະນະໂຄສະນາອົບຮົມສູນກາງພັກ (ຄອສພ) ຕາມທິດ “ຕັ້ງໜ້າສ້າງການຫັນປ່ຽນໃນວຽກງານໂຄສະນາອົບຮົມ ໄປສູ່ຄຸນນະພາບໃໝ່ຢ່າງແຂງແຮງ”, ໃນຊຸມປີຕໍ່ໜ້ານີ້, ຄອສພ ຕ້ອງຕັດສິນໃຈສືບຕໍ່ພັດທະນາວຽກງານສື່ມວນຊົນ, ເພີ່ມທະວີບົດບາດການນໍາພາທີ່ເຂັ້ມແຂງຂອງພັກຕໍ່ສື່ມວນຊົນ ແລະ ສັງຄົມ, ຕ້ອງຖືເອົາການກໍ່ສ້າງພັກເປັນປັດໄຈຕັດສິນ ໂດຍສ້າງໃຫ້ການຈັດຕັ້ງພັກ ໃນບັນດາອົງການສື່ມວນຊົນທຸກຂັ້ນ ມີຄວາມປອດໃສ, ເຂັ້ມແຂງ, ໜັກແໜ້ນ, ສ້າງຄວາມເຂັ້ມແຂງ ໃຫ້ກົງຈັກການຈັດຕັ້ງຂອງສື່ມວນຊົນ ທີ່ຢູ່ໃນບັນດາອົງການຈັດຕັ້ງພັກ, ລັດ, ອົງການຈັດຕັ້ງນະຫາຊົນ ແລະ ສັງຄົມ ໃຫ້ສາມາດຈັດຕັ້ງປະຕິບັດພາລະບົດບາດ ຂອງຕົນຢ່າງໜັກແໜ້ນ ເພື່ອຮັບປະກັນໃຫ້ໄດ້ 4ລັກສະນະອັນສັກສິດຂອງສື່ມວນຊົນປະຕິວັດຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້. ສື່ມວນຊົນຕ້ອງເປັນກະບອກສຽງທີ່ຊົງພະລັງໃນການເຄື່ອນໄຫວໂຄສະນາ, ປຸກລະດົມ, ເຕົ້າໂຮມຄວາມສາມັກ, ຍົກສູງຈິດໃຈຮັກຊາດ, ຮັກລະບອບໃໝ່, ຍົກສູງຈິດໃຈເອກະລາດ, ເປັນເຈົ້າຕົນເອງ ແລະ ເພິ່ງຕົນເອງ.
ໂອກາດວັນທີ່ຄວາມໝາຍສໍາຄັນນີ້, ຜູ້ອໍານວຍການໃຫຍ່ ສໍານັກຂ່າວສານປະເທດລາວຍັງສະແດງຄວາມຮູ້ບຸນຄຸນຕໍ່ການນໍາພັກ-ລັດ ໂດຍສະເພາະຄະນະໂຄສະນາອົບຮົບສູນກາງພັກທີ່ໄດ້ໃຫ້ການຊີ້ນໍາ-ນໍາພາ ຢ່າງໃກ້ຊິດ ເຮັດໃຫ້ວຽກງານຂ່າວສານໄດ້ມີການພັດທະນາຂຶ້ນຢ່າງບໍ່ຢຸດຢັ້ງ ແລະ ຂໍອວຍພອນໄຊອັນປະເສີດໃຫ້ການນໍາພັກ-ລັດ ກໍຄືຄະນະນໍາ ຄອສພ ຈົ່ງມີສຸຂະພາບພາລະນາໄມແຂງແຮງ ສືບຕໍ່ຊີ້ນໍາ-ນໍາພາວຽກງານສື່ມວນຊົນ ກໍຄືຂ່າວສານໃຫ້ດີຂຶ້ນເປັນກ້າວໆ ແລະ ຂໍອວຍພອນໄຊອັນປະເສີດໃຫ້ນັກຮົບສື່ມວນຊົນທຸກທົ່ວໜ້າຈົ່ງມີສຸຂະພາບເຂັ້ມແຂງແຂງແຮງ ສືບຕໍ່ປະຕິບັດໜ້າທີ່ວຽກງານຂອງຕົນໃຫ້ມີປະສົບຜົນສໍາເລັດທຸກປະການ ແລະ ທັນຍຸກທັນສະໄໝຂຶ້ນເປັນກ້າວໆ.
ຄໍາເຫັນ