ກະຊວງພາຍໃນແລະ ການສື່ສານ ຂອງຍີ່ປຸ່ນເປີດເຜີຍ ໃນວັນທີ 15 ກັນຍາ ຜ່ານມາວ່າ:ຈຳນວນປະຊາກອນທີ່ມີອາຍຸ 65 ປີຂຶ້ນໄປໃນປະເທດເພີ່ມຂຶ້ນເປັນ 36,25 ລ້ານຄົນຫຼືຄິດເປັນ 29,3% ຂອງປະຊາກອນທັງໝົດພາຍໃນປະເທດ ເຮັດໃຫ້ຍີ່ປຸ່ນຍັງຄົງເປັນປະເທດທີ່ມີອັດຕາສ່ວນຜູ້ອາຍຸສູງຫຼາຍກວ່າປະເທດ ຫຼື ພາກພື້ນອື່ນໆໃນໂລກ ທີ່ມີປະຊາກອນເກີນ 100.000 ຄົນ.
ຈໍານວນຜູ້ອາຍຸສູງດັ່ງກ່າວ ແບ່ງອອກເປັນຜູ້ຍິງ 20,53 ລ້ານຄົນ ແລະຜູ້ຊາຍ 15,72 ລ້ານຄົນ ໂດຍຂໍ້ມູນລະບຸໄວ້ວ່າ:ປີ 2023 ມີຜູ້ອາຍຸສູງທີ່ຍັງຄົງໄດ້ຮັບການຈ້າງງານມີເຖິງ 9,14 ລ້ານຄົນ ຫຼື ຄິດເປັນ 1 ໃນ 7 ຂອງລູກຈ້າງທັງໝົດໃນຍີ່ປຸ່ນ.
ທັງນີ້, ຍີ່ປຸ່ນກຳລັງປະສົບບັນຫາໃນການຫາທາງແກ້ໄຂວິກິດການຈໍານວນປະຊາກອນທີ່ນັບມື້ຈະຍິ່ງຮ້າຍແຮງຂຶ້ນເລື້ອຍໆ ໂດຍປະຊາກອນຂອງຍີ່ປຸ່ນຫຼຸດລົງ 595.000 ຄົນ ໃນໄລຍະ 1 ປີ ຈົນເຖິງ 1 ຕຸລາ 2023 ເປັນປີທີ 13 ຕິດຕໍ່ກັນ, ແຕ່ໃນຂະນະທີ່ປະຊາກອນໄວເຮັດວຽກຄ່ອຍໆຫຼຸດນ້ອຍລົງ ຄ່າໃຊ້ຈ່າຍດ້ານສາທາລະນະສຸກ ແລະ ສະຫວັດດີການສຳລັບຜູ້ອາຍຸສູງກັບເພີ່ມສູງຂຶ້ນ.
ສະຖາບັນຄົ້ນຄວ້າດ້ານການປະກັນສັງຄົມ ແລະ ປະຊາກອນແຫ່ງຊາດຂອງຍີ່ປຸ່ນ ຄາດຄະເນວ່າ: ພາຍໃນປີ 2040ຈໍານວນຜູ້ອາຍຸສູງໃນຍີ່ປຸ່ນຈະມີອັດຕາສ່ວນເພີ່ມຂຶ້ນເປັນ 34,8% ຂອງປະຊາກອນທັງໝົດພາຍໃນປະເທດ.
ຂະນະທີ່ສະຖາບັນຈັດຫາງານ (Recruit Works Institute) ໃນນະຄອນຫຼວງໂຕກຽວ ປະເມີນວ່າ: ຍີ່ປຸ່ນ ຈະມີຈໍານວນແຮງງານຕໍ່າກວ່າທີ່ຕ້ອງການເຖິງ 11 ລ້ານຄົນ ໃນປີ 2040ເນື່ອງຈາກປະຊາກອນທີ່ຫຼຸດລົງຢ່າງຕໍ່ເນື່ອງ.
ຄໍາເຫັນ