OECD ລະບຸວ່າ: ພາກພື້ນນີ້ເປັນຈຸດສຸມຂອງມົນລະພິດພລາສຕິກ, ໂດຍຂີ້ເຫຍື້ອພລາສຕິກທີ່ຍັງຈັດການບໍ່ຖືກວິທີເປັນບັນຫາໃຫຍ່ ຊຶ່ງໃນປີ 2022 ມີຂີ້ເຫຍື້ອພລາສຕິກເຖິງ 8.4 ລ້ານໂຕນ ໄດ້ຮົ່ວໄຫຼອອກສູ່ສິ່ງແວດລ້ອມ.
ບົດລາຍງານ "ທ່າອ່ຽງຂອງພລາສຕິກໃນພາກພື້ນ" ຊີ້ໃຫ້ເຫັນວ່າ: ການຈັດການທີ່ບໍ່ ຖືກຕ້ອງ ແລະ ບໍ່ປອດໄພ ເຊັ່ນ: ການຈູດເຜົາ ຫຼື ຖິ້ມຂີ້ເຫຍື້ອ ຍັງຄົງເປັນບັນຫາໃນປະເທດສະມາຊິກອາຊຽນ ແລະ ໃນປະເທດຈີນ ໂດຍສະເພາະຢູ່ເຂດຊົນນະບົດ.
ສຳນັກຂ່າວສານກຽວໂດລາຍງານວ່າ: ບັນຫາຂີ້ເຫຍື້ອພລາສຕິກເປັນເລື່ອງສຳຄັນ ທີ່ສົ່ງຜົນກະທົບຕໍ່ສິ່ງແວດລ້ອມ ທັງແມ່ນ້ຳ ແລະ ມະຫາສະໝຸດ. ນອກຈາກນີ້ ຍັງເປັນອັນຕະລາຍຕໍ່ສຸຂະພາບຂອງສັດປ່າ ແລະ ມະນຸດ, ເນື່ອງຈາກວ່າໄມໂຄຣພລາສຕິກ ສາມາດເຂົ້າສູ່ຮ່າງກາຍໄດ້.
OECD ຄາດຄະເນວ່າ: ປະລິມານຂີ້ເຫຍື້ອພລາສຕິກທີ່ຮົ່ວໄຫຼອອກສູ່ສິ່ງແວດລ້ອມຂອງພາກພື້ນດັ່ງກ່າວຈະສູງເຖິງ 14.1 ລ້ານໂຕນຕໍ່ປີພາຍໃນປີ 2050 ຊຶ່ງໃນຈຳນວນນີ້ 5.1 ລ້ານໂຕນຈະໄຫຼສູ່ແມ່ນ້ຳ ແລະ ທະເລ.
ບົດລາຍງານລະບຸວ່າ: ແຕ່ລະປະເທດໃນພາກພື້ນມີຄວາມສາມາດໃນການຈັດການຂີ້ເຫຍື້ອທີ່ແຕກຕ່າງກັນ ແລະ ມາດຕະການຫຼຸດຜ່ອນການນໍາໃຊ້ພລາສຕິກໃນຫຼາຍໆປະເທດກໍຍັງບໍ່ມີປະສິດຕິຜົນ.
ການຂະຫຍາຍຕົວຢ່າງໄວວາຂອງປະຊາກອນ ແລະ ຕົວເມືອງເຮັດໃຫ້ການໃຊ້ພລາສຕິກໃນ 13 ປະເທດນີ້ ເພີ່ມຂຶ້ນເກືອບ 9 ເທົ່າຈາກ 17 ລ້ານໂຕນໃນປີ 1990 ເປັນ 152 ລ້ານໂຕນໃນປີ 2022. ໂດຍພລາສຕິກຫຼາຍກວ່າເຄິ່ງໜຶ່ງຖືກນຳໃຊ້ສໍາລັບຜະລິດຕະພັນທີ່ມີອາຍຸສັ້ນ ເຊັ່ນ: ການຫຸ້ມຫໍ່.
ເມື່ອພລາສຕິກຫຼາຍກວ່າເຄິ່ງໜຶ່ງທີ່ໃຊ້ໃນພາກພື້ນນີ້ມີອາຍຸການໃຊ້ງານບໍ່ເກີນ 5 ປີ ຈຶ່ງກາຍເປັນຂີ້ເຫຍື້ອຢ່າງໄວວາ ສົ່ງຜົນໃຫ້ປະລິມານຂີ້ເຫຍື້ອພລາສຕິກຂອງພາກພື້ນດັ່ງກ່າວເພີ່ມຂຶ້ນຈາກ 10 ລ້ານໂຕນໃນປີ 1990 ເປັນ 113 ລ້ານໂຕນໃນປີ 2022.
ບົດລາຍງານຍັງລະບຸຕື່ມວ່າ, ຖ້າຫາກມີມາດຕະການຢ່າງຈິງຈັງເຊັ່ນ: ການຫ້າມໃຊ້ພລາສຕິກແບບໃຊ້ຄັ້ງດຽວຖິ້ມ ແລະ ມີການເກັບພາສີຈະຊ່ວຍຫຼຸດການໃຊ້ພລາສຕິກໃນພາກພື້ນໄດ້ 28%, ເພີ່ມອັດຕາການນຳມາໃຊ້ໃໝ່ເປັນ 54% ແລະ ຫຼຸດປະລິມານຂີ້ເຫຍື້ອທີ່ຈັດການບໍ່ຖືກຕ້ອງໄດ້ເຖິງ 97%.
ລ້າສຸດ, ການເຈລະຈາເພື່ອເຮັດສົນທິສັນຍາສາທີ່ຜູກມັດດ້ານກົດໝາຍ ກ່ຽວກັບມົນລະພິດພລາສຕິກໄດ້ກັບມາອີກຄັ້ງໃນນະຄອນເຈນີວາ, ພາຍຫຼັງການເຈລະຈາຄັ້ງກ່ອນຢູ່ເມືອງປູຊານ ສ ເກົາຫຼີ ໃນປີກາຍນີ້ຖືກຢຸດຕິ ຍ້ອນຫຼາຍປະເທດຍັງມີຄວາມເຫັນບໍ່ລົງລອຍກັນກ່ຽວກັບມາດຕະການຄວບຄຸມການຜະລິດ ພລາສຕິກ ແລະ ການຈັດການຂີ້ເຫຍື້ອ.
ຄໍາເຫັນ