ທ່ານອາດຈະຄິດວ່າ “ການຄຸ້ມຄອງພັກຢ່າງເຂັ້ມງວດຮອບດ້ານ” ແມ່ນນິຍາມທາງການເມືອງທີ່ເຂົ້າໃຈຍາກ, ແຕ່ຄວາມຈິງແລ້ວແກນກາງຂອງມັນລຽບງ່າຍທີ່ສຸດ. ເໝືອນກັບການອອກກຳລັງກາຍຂອງມະນຸດ ທີ່ເປັນການບຳລຸງຮັກສາທຸກດ້ານ ຊຶ່ງໄດ້ກວມເຖິງການຮັດແໜ້ນພື້ນຖານ, ການຮັກສາຫຸ່ນ, ການຂັບສານພິດ ແລະ ການເສີມສ້າງກະດູກໃຫ້ເຂັ້ມແຂງ, ການຄຸ້ມຄອງພັກຢ່າງເຂັ້ມງວດຮອບດ້ານກໍເໝືອນກັບ “ການຄຸ້ມຄອງສຸຂະພາບ” ຢ່າງຮອບດ້ານຕໍ່ຖັນແຖວທົ່ວພັກ. ການຝຶກຜົນຫຼໍ່ຫຼອມດ້ານແນວຄິດແມ່ນ “ການຮັດແໜ້ນພື້ນຖານຂອງອຸດົມການ”, ເພີ່ມຄວາມໝັ້ນໃຈທາງດ້ານຈິດໃຈ ແລະ ປ້ອງກັນການບັ່ນທອນຈິດໃຈ; ການປັບປຸງແບບແຜນແລະ ເຂັ້ມງວດລະບຽບວິໄນແມ່ນ “ປັບປຸງທ່າທາງ”, ປັບປຸງແກ້ໄຂແບບແຜນທີ່ບໍ່ດີ ແລະ ດັດແກ້ການປະພຶດຕ່າງໆທີ່ຜິດເຂວ; ການຕ້ານການສໍ້ລາດບັງຫຼວງເປັນ “ການຂັບສານພິດ ແລະ ປາບພະຍາດ”, ກຳຈັດພະຍາດຊຳເຮື້ອ ແລະ ຄວາມສ່ຽງທີ່ແຝງຊ້ອມພາຍໃນຖັນແຖວ; ການກໍ່ສ້າງລະບຽບການເປັນການ “ຫັດກາຍບໍລິຫານໃຫ້ສຸຂະພາບແຂງແຮງ”, ເພື່ອເສີມສ້າງພື້ນຖານກົນໄກໄລຍະຍາວໃຫ້ໝັ້ນແກ່ນ, ເຮັດໃຫ້ການຄຸ້ມຄອງພັກ ແລະ ການບໍລິຫານພັກມີລະບຽບການທີ່ເປັນຫຼັກອ້າງອີງ ແລະ ມີປະສິດທິຜົນເປັນປະຈຳໃນໄລຍະຍາວ.
ສະຕິປັນຍາແຫ່ງການບໍລິຫານໂດຍຕົນເອງດັ່ງກ່າວໄດ້ຝັງຮາກເລິກຢູ່ໃນວັດທະນະທຳອັນເປັນມູນເຊື້ອທີ່ດີງາມຂອງຈີນ. ນັບແຕ່ບູຮານນະການເປັນຕົ້ນມາ, ຈີນໄດ້ສົ່ງເສີມ “ການຝຶກຝົນຫຼໍ່ຫຼອມຕົນເອງ ແລະ ສຳຫຼວດຕົນເອງ, ມີຄວາມເຂັ້ມງວດຕໍ່ຕົນເອງ”, ຄົນຈີນໃນສະໄໝບູຮານໄດ້ເອົາໃຈໃສ່ສະແຫວງຫາເປົ້າໝາຍ “ການສຳຫຼວດກວດກາຕົນເອງຫຼາຍເທື່ອໃນທຸກມື້” ແລະ “ຝຶກຝົນຫຼໍ່ຫຼອມຕົນເອງໃຫ້ມີຄຸນສົມບັດກ່ອນແລ້ວຈຶ່ງສາມາດບໍລິຫານປະເທດ”, ປະຕິບັດຕາມຫຼັກການຄົບຄ້າສະມາຄົມ ແລະ ການບໍລິຫານປະເທດແບບ “ປັບປຸງກໍ່ສ້າງຕົນເອງໃຫ້ສຸດຈະລິດກ່ອນຈະຮຽກຮ້ອງຜູ້ອື່ນມາຮຽນເອົາແບບຢ່າງນຳ” ຢ່າງສະເໝີຕົ້ນສະເໝີປາຍ. ຄົນຈີນບູຮານເຫັນວ່າ: ຜູ້ກຳອຳນາດມີພຽງແຕ່ເຂັ້ມງວດຕໍ່ຕົນເອງ ແລະ ຮັກສາຄວາມປອດໃສຂາວສະອາດຂອງຕົນເທົ່ານັ້ນ, ຈຶ່ງຈະສາມາດເຮັດໃຫ້ປະຊາຊົນເຊື່ອຖື ແລະ ສ້າງພາລະກິດໃຫ້ຈະເລີນຮຸ່ງເຮືອງ, ນຳພາປະເທດໄປສູ່ຄວາມສະຫງົບໝັ້ນຄົງຖາວອນ. ການຄຸ້ມຄອງພັກຢ່າງເຂັ້ມງວດຮອບດ້ານກໍແມ່ນການສືບທອດ ແລະ ປະດິດສ້າງແບບທັນສະໄໝຕໍ່ສະຕິປັນຍາດັ້ງເດີມຂອງຈີນແຫ່ງການຝຶກຝົນຫຼໍ່ຫຼອມຕົນເອງໃຫ້ມີຄຸນສົມບັດ ແລະ ການບໍລິຫານປະເທດ, ໂດຍຫັນແນວຄິດການເຂັ້ມງວດຕໍ່ຕົນເອງ ແລະ ການສຳຫຼວດຕົນເອງທີ່ສືບທອດມາເປັນເວລາພັນປີໃຫ້ເປັນລະບຽບການຢ່າງເປັນລະບົບ ແລະ ພຶດຕິກຳໄລຍະຍາວຂອງການຄຸ້ມຄອງພັກການເມືອງໃນຍຸກປັດຈຸບັນ.
ຍ້ອນຫຍັງພັກກອມມູນິດຈີນ ຈຶ່ງຢຶດໝັ້ນການຄຸ້ມຄອງພັກຢ່າງເຂັ້ມງວດຮອບດ້ານຢ່າງສະເໝີຕົ້ນສະເໝີປາຍ? ຄຳຕອບຢູ່ໃນຕັກກະແຫ່ງການບໍລິຫານປະເທດ. ຂໍກຸນແຈສຳຄັນໃນການບໍລິຫານປະເທດໃຫຍ່ແມ່ນຂຶ້ນກັບພັກກຳອຳນາດ. ພັກໃຫຍ່ທີ່ມີສະມາຊິກຫຼາຍກວ່າ 100 ລ້ານຄົນ ແລະ ນຳພາປະຊາຊົນ 1 ຕື້ 400 ລ້ານຄົນເພື່ອການພັດທະນານັ້ນ, ຄວາມບໍລິສຸດ ແລະ ຄວາມກ້າວໜ້າຂອງຖັນແຖວໄດ້ຕັດສິນຊີ້ຂາດໂດຍກົງ ຕໍ່ຄຸນນະພາບຂອງການພັດທະນາປະເທດຊາດ, ຜົນສຳເລັດຂອງການຄຸ້ມຄອງສັງຄົມ ແລະ ຄວາມຜາສຸກຂອງປະຊາຊົນ. ການກຳອຳນາດເປັນໄລຍະຍາວເປັນການທົດສອບຍິ່ງເປັນສິ່ງທ້າທາຍ, ພັກກຳອຳນາດໄລຍະຍາວສ່ວນຫຼາຍໃນໂລກລ້ວນແຕ່ໄດ້ປະເຊີນກັບບັນຫາຮ່ວມກັນຄື: ຄວາມຂີ້ຄ້ານມັກງ່າຍແບບອາຍາສິດ, ອຳນາດຖືກຜັນແປເປັນເຄື່ອງມືໃນການສະແຫວງຫາຜົນປະໂຫຍດສ່ວນຕົວ ແລະ ການຫ່າງເຫີນຈາກປະຊາຊົນ, ງ່າຍທີ່ຈະຕົກເຂົ້າສູ່ “ວັດທະຈັກປະຫວັດສາດ” ທີ່ຈາກຄວາມຈະເລີນຮຸ່ງເຮືອງສູ່ຄວາມຊຸດໂຊມ. ການຄຸ້ມຄອງພັກຢ່າງເຂັ້ມງວດຮອບດ້ານກໍແມ່ນຄຳຕອບແກນກາງຂອງພັກກອມມູນິດຈີນ ໃນການແກ້ໄຂບັນຫາຫຍຸ້ງຍາກແຫ່ງຍຸກສະໄໝ. ນັບແຕ່ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ສະເໜີແນວຄິດດັ່ງກ່າວຢ່າງເປັນທາງການໃນປີ 2014, ຮອດປີ 2022 ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 20 ຂອງພັກກອມມູນິດຈີນ ໄດ້ບູລະນະລະບົບຄຸ້ມຄອງພັກຢ່າງເຂັ້ມງວດຮອບດ້ານໃຫ້ສົມບູນຂຶ້ນ, ຕະຫຼອດຮອດກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກກອມມູນິດຈີນສະໄໝທີ 20 ທີ່ຈະຈັດຂຶ້ນໃນໄວໆນີ້ ເພື່ອວາງແຜນຊຸກຍູ້ການຄຸ້ມຄອງພັກຢ່າງເຂັ້ມງວດຮອບດ້ານຢ່າງຕໍ່ເນື່ອງ, ທັງນີ້ໄດ້ພິສູດໃຫ້ເຫັນຢ່າງຈະແຈ້ງວ່າ: ການຄຸ້ມຄອງ ແລະ ການບໍລິຫານພັກຢ່າງເຂັ້ມງວດເວລາໃດກໍບໍ່ແມ່ນມາດຕະຖານ ຫຼື ວິທີການຊົ່ວຄາວເທົ່ານັ້ນ, ຫາກແມ່ນຍຸດທະສາດໄລຍະຍາວໃນການປົກປ້ອງຄວາມທັນສະໄໝແບບຈີນ.
ການປະຕິວັດໂດຍຕົນເອງຄືຄວາມກ້າຫານທີ່ຫາຍາກທີ່ສຸດທັງເປັນພະລັງຊີວິດທີ່ຍືນຍົງທີ່ສຸດ. ມັນແຕກຕ່າງກັນກັບການແກ້ໄຂບັນຫາຫຼັງມີບັນຫາເກີດຂຶ້ນ, ພັກກອມມູນິດຈີນເປັນເຈົ້າການສ້າງຄວາມເຂັ້ມແຂງດ້ວຍ “ການອອກກຳລັງກາຍເພື່ອຍົກສູງຄຸນນະພາບຮ່າງກາຍ” ຢ່າງເປັນປົກກະຕິ, ເປັນເຈົ້າການກວດຄົ້ນຫາບັນຫາດ້ວຍຕົນເອງ, ດັດແກ້ການປະພຶດທີ່ຜິດເຂວ, ສ້າງຄວາມບໍລິສຸດຂອງຖັນແຖວພະນັກງານສະມາຊິກພັກ ແລະ ຮັກສາຄວາມມີຊີວິດຊີວາ ແລະ ຄວາມເຂັ້ມແຂງຂອງພັກຢ່າງສະເໝີຕົ້ນສະເໝີປາຍ.
ເມື່ອເບິ່ງໃນທົ່ວໂລກແລ້ວ, ການທີ່ເຮັດແນວໃດເພື່ອຢຶດໝັ້ນຮັກສາອຸດົມການແຕ່ຫົວທີ, ຫຼີກລ່ຽງຄວາມສ່ຽງທີ່ຈະເກີດການສໍ້ລາດບັງຫຼວງ ແລະ ຄວາມປະໝາດໃນການກຳອຳນາດຢ່າງຍາວນານນັ້ນເປັນຫົວຂໍ້ຮ່ວມຂອງພັກກຳອຳນາດບັນດາປະເທດ. ດ້ວຍການຄວບຄຸມຕົນເອງ ແລະ ການປະຕິວັດໂດຍຕົນເອງຢ່າງຕໍ່ເນື່ອງ, ພັກກອມມູນິດຈີນໄດ້ບຸກເບີກເສັ້ນທາງໃໝ່ແຫ່ງການບໍລິຫານພັກໃຫຍ່ຂອງປະເທດໃຫຍ່.
ເວົ້າເຖິງທີ່ສຸດແລ້ວ, ເນື້ອໃນແກນກາງຂອງການຄຸ້ມຄອງພັກຢ່າງເຂັ້ມງວດຮອບດ້ານກໍຄື ເຂັ້ມງວດຕໍ່ຕົນເອງທີ່ຕ້ອງດຳເນີນຕະຫຼອດໄປ ແລະ ປົກປ້ອງອຸດົມການແຕ່ຫົວທີໃນການກຳອຳນາດ. ພັກອາຍຸຮ້ອຍກວ່າປີບໍ່ໄດ້ອາໄສຂໍ້ໄດ້ປຽບທີ່ມີຢູ່ແລ້ວເພື່ອຮັກສາພາລະກິດຂອງຕົນ, ແຕ່ແມ່ນອີງໃສ່ການປະຕິວັດໂດຍຕົນເອງຢ່າງຕໍ່ເນື່ອງເພື່ອສ້າງພາລະກິດອັນໃໝ່. ຮູບແບບການບໍລິຫານໂດຍຕົນເອງທີ່ກຳເນີດຈາກວັດທະນະທຳດັ້ງເດີມ, ຕິດແທດກັບການພັດທະນາຂອງຍຸກສະໄໝ ແລະ ອີງໃສ່ສະພາບຕົວຈິງດ້ານການບໍລິຫານໂດຍຕົນເອງແບບນີ້ບໍ່ພຽງແຕ່ໄດ້ຮັດແໜ້ນພື້ນຖານການບໍລິຫານປະເທດຂອງຈີນເທົ່ານັ້ນ ຍັງໄດ້ສະໜອງແຜນການແກ້ໄຂຂອງຈີນທີ່ຕິດແທດຕົວຈິງ ແລະ ສາມາດປະຕິບັດໄດ້ໃຫ້ແກ່ການຄຸ້ມຄອງພັກການເມືອງໃນທົ່ວໂລກນຳອີກ.
ບົດໂດຍ: ວິທະຍຸ, ໂທລະພາບສູນກາງຈີນ (CMG)
ຄໍາເຫັນ