ບົດລາຍງານກ່າວວ່າ: ອາຫານທີ່ປຸງແຕ່ງຂັ້ນສູງກວມເອົາປະມານ 70% ຂອງຜະລິດຕະພັນອາຫານທັງໝົດທີ່ຂາຍຢູ່ໃນຮ້ານຂາຍເຄື່ອງໃນທົ່ວ ສະຫະລັດ ອາເມຣິກາ. ເພາະມີລົດຊາດແຊບ, ສະດວກ ແລະ ລາຄາບໍ່ແພງ. ແຕ່ຜູ້ຊ່ຽວຊານກ່າວວ່າສາມາດລວມເອົາອາຫານປຸງແຕ່ງບາງປະເພດເຂົ້າໄວໃນອາຫານຂອງທ່ານ ໂດຍບໍ່ມີຜົນກະທົບຕໍ່ສຸຂະ ພາບ. ເນື່ອງຈາກວ່າອາຫານເຫຼົ່ານີ້ບໍ່ໄດ້ຄືກັນ ຫຼື ມີຜົນກະທົບໃນລະດັບດຽວກັນທຸກຊະນິດ.
ທັງນີ້, ມີການວິເຄາະພິດຊາແຊ່ແຂງຫຼາຍໆຍີ່ຫໍ້ພົບວ່າ: ບາງຍີ່ຫໍ້ໃຊ້ສ່ວນປະກອບພື້ນຖານເຊັ່ນ: ແປ້ງເຂົ້າສາລີ, ຊອດໝາກເລັ່ນ, ນໍ້າມັນໝາກກອກ, ຜົງກະທຽມ ແລະ ເນີຍແຂງ mozzarella. ໃນຂະນະທີ່ບາງຍີ່ຫໍ້ປະກອບດ້ວຍສານກັນບູດ, ເຄື່ອງປຸງລົດຊາດ ແລະ ສ່ວນປະກອບຂອງວັດຖຸສັງເຄາະຈຳນວນຫຼາຍ ຈົນເຮັດໃຫ້ລາຍການສ່ວນປະກອບເບິ່ງຄືກັບການທົດລອງໃນວິຊາເຄມີຂອງໂຮງຮຽນ.
ບົດລາຍງານຍັງອ້າງອີງຄຳແນະນຳຂອງນັກໂພຊະນາການວ່າ: ບໍ່ຄວນກິນພິດຊ່າແຊແຂງທຸກໆມື້, ແຕ່ສາມາດເປັນສ່ວນໜຶ່ງຂອງອາຫານທ່ຽງ ຫຼື ອາຫານແລງແບບສຸຂະພາບດີໃນບາງຄັ້ງໄດ້. ໂດຍກະແຈສຳຄັນຄືການເລືອກຍີ່ຫໍ້ທີ່ມີຄຸນນະພາບ ແລະ ກິນຄູ່ກັບອາຫານອື່ນໆເພື່ອໃຫ້ຄົບໝູ່ ເຊັ່ນ: ບຣອກໂຄລີ, ກະລົດ ຫຼື ໝາກແຕງ ຫຼື ທ່ານສາມາດເພີ່ມໄຂ່ຕົ້ມ ແລະ ປິດທ້າຍດ້ວຍໝາກໄມ້ສົດ, ວອລນັດ ຫຼື ຖົ່ວປະສົມ ຊຶ່ງຈະຊ່ວຍໃຫ້ສານອາຫານສົມດຸນຍິ່ງຂຶ້ນ.
ຄໍາເຫັນ