ຄວາມກັງວົນເຫຼົ່ານີ້ເພີ່ມຂຶ້ນຫຼັງຈາກ Anthropic, ບໍລິສັດ AI ທີ່ຕັ້ງຢູ່ສະຫະລັດ ອາເມຣິກາ ໄດ້ແນະນຳເຄື່ອງມືສຳລັບອົງການຂອງຕົນໃນທ້າຍເດືອນທີ່ຜ່ານມາ ຊຶ່ງສາມາດເຮັດວຽກອັດຕະໂນມັດໄດ້ຕັ້ງແຕ່ການຂຽນໂປຣແກຣມໄປຈົນເຖິງດ້ານການຕະຫຼາດ. ສະຖານະການນີ້ໄດ້ສົ່ງຜົນກະທົບຕໍ່ຕະຫຼາດຫຸ້ນ IT ຂອງອິນເດຍ; ໂດຍໃນໄລຍະເຄິ່ງທຳອິດຂອງເດືອນກຸມພາ, ຮຸ້ນ TCS ຫຼຸດລົງເກືອບ 15%, ຫຸ້ນ Infosys ຫຼຸດລົງປະມານ 17%, ແລະ HCL Technologies ຫຼຸດລົງ 13%.
ຜູ້ຊ່ຽວຊານຊີ້ໃຫ້ເຫັນວ່າ: ການຫົດຕົວຂອງການຈ້າງງານຈະສົ່ງຜົນກະທົບຕໍ່ການບໍລິໂພກພາຍໃນປະເທດ ຊຶ່ງກວມເອົາເກືອບ 60% ຂອງ GDP ອິນເດຍ ແລະ ອາດຈະເຮັດໃຫ້ເສດຖະກິດຫຼຸດລົງ, ລວມທັງກະທົບເປົ້າໝາຍຂອງລັດຖະບານທີ່ຕ້ອງການພັດທະນາອິນເດຍໃຫ້ເປັນປະເທດທີ່ພັດທະນາແລ້ວພາຍໃນປີ 2047.
ທ່ານ ວິນິດ ນາຍາຣ ຜູ້ກໍ່ຕັ້ງມູນນິທິ Sampark ແລະ ອະດີດ CEO ຂອງ HCL ກ່າວວ່າ: ອິນເດຍ, ມີຄວາມສ່ຽງໃນຖານະທີ່ເປັນສູນກາງສະໜັບສະໜູນທຸລະກິດຂອງໂລກ, ຖ້າຫາກບໍ່ປັບຕົວເຂົ້າກັບພາລະບົດບາດໃໝ່ ອາດຈະປະເຊີນກັບບັນຫາທັກສະທີ່ລ້າສະໄໝຈຳນວນຫຼວງຫຼາຍ ແລະ ອາດມີຊາວໜຸ່ມຈຳນວນຫຼາຍບໍ່ສາມາດຊອກຫາວຽກເຮັດງານທຳໄດ້.
ຂະແໜງທຸລະກິດຕ່າງໆກຳລັງນໍາໃຊ້ AI ຢ່າງຈິງຈັງ. ໂດຍ Bajaj Finance ເປີດເຜີຍວ່າ: ບໍລິສັດນໍາໃຊ້ AI ເພື່ອວິເຄາະການສົນທະນາກັບລູກຄ້າຫຼາຍກວ່າ 500,000 ຄົນ ແລະ ສາມາດນໍາຂໍ້ມູນທີ່ໄດ້ຮັບເພື່ອສົ່ງຂໍ້ສະເໜີທາງດ້ານການເງິນ 100,000 ຄັ້ງ ແລະ ຈ່າຍເງິນກູ້ມູນຄ່າປະມານ 16 ຕື້ຣູປີລະຫວ່າງເດືອນຕຸລາ ແລະ ເດືອນທັນວາຜ່ານມາຜ່ານສູນບໍລິການທີ່ໃຊ້ AI. ອີກທັງຍັງໃຊ້ AI ເພື່ອຜະລິດວິດີໂອ ແລະ ປ້າຍໂຄສະນາການຕະຫຼາດທັງໝົດ.
ດັ່ງນັ້ນ, ກຸນແຈສໍາຄັນແມ່ນການກະກຽມກໍາລັງແຮງງານໃຫ້ພ້ອມ. ຜູ້ຊ່ຽວຊານຍອມຮັບວ່າລະບົບການສຶກສາບໍ່ໄດ້ພັດທະນາທັກສະໃໝ່ເຫຼົ່ານີ້ຢ່າງພຽງພໍ. ທ່ານ ນາຍາຣ ເຊື່ອວ່າທັກສະການແກ້ໄຂບັນຫາຄວນໄດ້ຮັບການປູກຝັງເພື່ອໃຫ້ຊາວໜຸ່ມສາມາດຮັບມືກັບ AI ໄດ້.
ໃນປີນີ້, ອິນເດຍໄດ້ເປີດໂຄງການພັດທະນາທັກສະ AI ແຫ່ງຊາດ, ໂດຍມີຈຸດປະສົງເພື່ອຝຶກອົບຮົມຊາວໜຸ່ມໜຶ່ງລ້ານຄົນພາຍໃນໜຶ່ງປີ. ໂດຍປະຕິບັດຕາມນະໂຍບາຍຂອງປີກາຍທີ່ກຳນົດໃຫ້ສອນ AI ແກ່ເດັກນ້ອຍອາຍຸ 8 ປີຂຶ້ນໄປ, ເລີ່ມຕົ້ນໃນກາງປີການສຶກສາ 2026, ໂດຍຂະຫຍາຍອາຍຸຈາກ 11-17 ປີ.
ຄໍາເຫັນ