 |
ໃນພິທີ, ສະຫາຍ ພົຈວ ຄຳບານ ພົມມະນີວົງ ຫົວໜ້າກອງບັນຊາການ ປກສ ແຂວງ ໄດ້ສະຫຼຸບການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປີ 2024- 2025 ຜ່ານມາວ່າ: ຄະນະພັກ,ຄະນະນຳ ປກສ ແຂວງ ໄດ້ເອົາໃຈໃສ່ນຳພາ-ຊີ້ນໍາຄະນະກຳມະການ, ກຳລັງວິຊາສະເພາະ ແລະ ປກສ 4 ເມືອງ ໃຫ້ເປັນເຈົ້າການເຄື່ອນໄຫວຈັດຕັ້ງປະຕິບັດໜ້າທີ່ ໃນການແກ້ໄຂບັນຫາຢາເສບຕິດ ດ້ວຍການໂຄສະນາເຜີຍແຜ່ກົດໝາຍ, ຜົນຮ້າຍຂອງຢາເສບຕິດ ແລະ ນິຕິກຳຕ່າງໆ ທີ່ກ່ຽວພັນ. ພ້ອມນີ້, ໄດ້ຕິດຕາມກວດກາຫາກຸ່ມເປົ້າໝາຍທີ່ເຄື່ອນໄຫວມົ້ວສຸມຢາເສບຕິດ ສາມາດເລີກຮື້ ແລະ ມ້າງລາຍຄະດີຄ້າ-ຂາຍຢາເສບຕິດໄດ້ 115 ເລື່ອງ, ຈັບຕົວຜູ້ຕ້ອງຫາໄດ້ 116 ຄົນ ຍິງ 6 ຄົນ, ຍຶດຂອງກາງປະເພດຢາເສບຕິດໄດ້ຈຳນວນ 63,552 ເມັດ ພາຫະນະລົດໃຫຍ່ 1 ຄັນ ແລະ ລົດຈັກ 15 ຄັນ, ໂທລະສັບ 101 ໜ່ວຍ, ໂມງ 4 ໜ່ວຍ, ສາຍຄໍຄ້າຍຄືຄຳ 2 ເສັ້ນ, ສາຍຄໍຄ້າຍຄືເງິນ 3 ເສັ້ນ, ພັດສະປອດ 7 ຫົວ, ໃບຂັບຂີ່ 3 ໃບ, ບັດປະຈໍາຕົວ 10 ບັດ, ຢາສູບໄຟຟ້າ 1 ອັນ, ໃບກະທ້ອມ 83 ຖົງ, ນໍ້າກະທ້ອມຕົ້ມສຸກ 4 ຕຸກ, ຢາດີໄອ 40 ແກ້ວ, ບັດເອທີເອັມ 1 ຫົວ, ປຶ້ມບັນຊີເງິນຝາກ 1 ຫົວ.
 |
ນອກນັ້ນ, ໄດ້ເກັບກຳຂຶ້ນບັນຊີເປົ້າໝາຍຄ້າ-ຂາຍຢາເສບຕິດ ທັງໝົດ 401 ຄົນ ຍິງ 25 ຄົນ, ຂຶ້ນບັນ ຊີເປົ້າໝາຍມົ້ວສຸມເສບຢາເສບຕິດ 2,994 ຄົນ ຍິງ 90 ຄົນ, ສຶກສາອົບຮົມຜູ້ເສບ ແລະ ມົ້ວສຸມຢາເສບຕິດພ້ອມທັງສ້າງບົດບັນທຶກກ່າວເຕືອນຈໍານວນ 126 ຄົນ ຍິງ 7 ຄົນ, ນຳສົ່ງຜູ້ເສບ ແລະ ຜູ້ມົ້ວສຸມຢາເສບຕິດ ເຂົ້າປິ່ນປົວຢູ່ສູນບໍາບັດຈໍານວນ 154 ຄົນ ຍິງ 4 ຄົນ. ໃນນັ້ນ, ປິ່ນປົວຫາຍດີແລ້ວຈໍານວນ 60 ຄົນ ຍິງ 4 ຄົນ, ນໍາເອົາຢາເສບຕິດໄປກວດວິໄຈຢູ່ສູນວິໄຈແຂວງຈຳປາສັກ ແລະ ສະຫວັນນະເຂດ 141 ຕົວຢ່າງ, ກວດນໍ້າປັດສະວະຊອກຫາສານເສບຕິດໃຫ້ນັກຮຽນ ແລະ ພະນັກງານ-ລັດຖະກອນ 851 ຄົນ ຍິງ 283 ຄົນ.
ໃນຕໍ່ໜ້າ, ຄະນະພັກ-ຄະນະບັນຊາທຸກຂັ້ນໃນກໍາລັງ ປກສ ຈະສຸມໃສ່ນໍາພາ-ຊີ້ນໍາເຈົ້າໜ້າທີ່ເຫຼົ່າຮົບວິ ຊາສະເພາະ ສືບຕໍ່ເຂັ້ມງວດປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ມີຜົນສໍາເລັດດີຂຶ້ນກວ່າເກົ່າ; ຈະຕິດຕາມ ກວດກາ ແລະ ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມໃຫ້ຫຼຸດໜ້ອຍຖອຍລົງ; ຈະເພີ່ມທະວີການຮ່ວມມື ແລະ ປະສານສົມທົບຢ່າງຮອບດ້ານກັບບັນດາແຂວງ ຄື: ແຂວງສາລະວັນ, ອັດຕະປື, ຈໍາປາສັກ ແລະ ສສ ຫວຽດນາມ ໃນການແລກປ່ຽນບົດຮຽນການແກ້ໄຂປະກົດການຫຍໍ້ທໍ້ຕ່າງໆ ທີ່ເກີດຂຶ້ນຕາມຊາຍແດນ; ສືບຕໍ່ໂຄສະນາເຜີຍແຜ່ກົດໝາຍ ແລະ ຜົນຮ້າຍຂອງຢາເສບຕິດຢູ່ເຂດຈຸດສຸມກຸ່ມບ້ານ, ໂຮງຮຽນ ແລະ ສະຖານທີ່ອື່ນໆໃຫ້ຕໍ່ເນື່ອງ; ຕິດຕາມກວດກາ, ປ່ອງເສັ້ນທາງລໍາລຽງຂົນສົ່ງ ແລະ ເລີກຮື້ເຄືອຂ່າຍ, ກຸ່ມແກັງ, ຄ້າ-ຂາຍຢາເສບຕິດ ພ້ອມດຳເນີນຄະດີຕໍ່ຜູ້ກະທຳຜິດຢ່າງເຂັ້ມງວດ; ພ້ອມນີ້, ຈະລົງຊຸກຍູ້ຕິດຕາມກວດກາປະເມີນຜົນການສ້າງຄອບຄົວ ແລະ ບ້ານປອດຢາເສບຕິດຢູ່ບັນດາເມືອງ ແລະ ກຸ່ມບ້ານ.
 |
ໃນພິທີໄດ້ມອບຫຼຽນກາປ້ອງກັນຄວາມສະຫງົບຈຳນວນ 335 ທ່ານ, ໃບຍ້ອງຍໍຂັ້ນກະຊວງ ປກສ 582 ທ່ານ ແລະ ໃບຍ້ອງຍໍຂັ້ນກົມໃຫຍ່ການເມືອງ ກະຊວງ ປກສ ຈຳນວນ 530 ທ່ານ ໃຫ້ບຸກຄົນ ແລະ ກົມກອງ ທີ່ມີສ່ວນຮ່ວມໃນການຈັດຕັ້ງປະຕິບັດວາລະແຫ່ງຊາດ. ຈາກນັ້ນ, ຜ່ານຂໍ້ຕົກລົງວ່າດ້ວຍການຮັບຮອງກົມກອງ, ຂະແໜງການ ແລະ ບ້ານປອດຢາເສບຕິດ ແລະ ຜ່ານຂໍ້ຕົກລົງຄະນະກຳມະການປົກຄອງແຂວງ ເລກທີ 196/ຄປຂ, ລົງວັນທີ 15 ມິຖຸນາ 2026 ວ່າດ້ວຍການແຕ່ງຕັ້ງຄະນະກຳມະການແກ້ໄຂບັນຫາຢາເສບຕິດຂັ້ນແຂວງ. ຂ່າວ-ພາບ: ປກສ ແຂວງເຊກອງ
ຄໍາເຫັນ