ສະຫະກອນສິນເຊື່ອນາກາຍ ສົ່ງເສີມການສ້າງທຶນໃຫ້ຊຸມຊົນເຂັ້ມແຂງ

ທ່ານ ສົມພົງ ສະຫວັນ ອໍານວຍການສິນເຊື່ອຝາກປະຢັດ ນາກາຍ ໄດ້ເປີດເຜີຍຕໍ່ສື່ມວນຊົນ ເນື່ອງໃນໂອກາດທັດສະນະສຶກສາ ແລະ ເຂົ້າຮ່ວມຝຶກອົບຮົມໃນຕົ້ນເດືອນກໍລະກົດ ພາຍໃຕ້ໂຄງການແກມຊິວ ທີ່ໄດ້ຮັບການສະໜັບສະໜູນທຶນຈາກສະຫະພາບເອີຣົບ, ຈັດຕັ້ງປະຕິບັດໂດຍສະມາ ຄົມນັກຂ່າວແຫ່ງ ສປປລາວ ແລະ ອົງການແຄຣນາ ນາຊາດ ປະຈຳລາວ ຜ່ານມານີ້ວ່າ: ກອງທຶນສິນເຊື່ອຝາກປະຢັດບ້ານ ສ້າງຕັ້ງຂຶ້ນໃນປີ 2018 ໂດຍມີພະນັກງານ 7 ທ່ານ; ເປົ້າໝາຍສໍາຄັນມຸ່ງເນັ້ນສ້າງໂອກາດໃຫ້ປະຊາຊົນສາມາດເຂົ້າເຖິງແຫຼ່ງທຶນ, ນໍາເງິນທຶນໄປໃຊ້ໃນການຜະລິດ, ການປະກອບອາຊີບ ແລະ ສ້າງລາຍຮັບໃຫ້ຄອບຄົວ; ເບິ່ງຄືວ່າ ເປັນພຽງການສ້າງແຫຼ່ງທຶນຂະໜາດນ້ອຍສໍາລັບຊຸມຊົນ, ແຕ່ການດໍາເນີນງານຢ່າງຕໍ່ເນື່ອງ ໄດ້ສ້າງຄວາມໄວ້ວາງໃຈຈາກສະມາຊິກ; ຈຸດສໍາຄັນແມ່ນການບໍລິຫານທີ່ມີຄວາມໂປ່ງໃສ, ດໍາເນີນຕາມລະບຽບກົດໝາຍ ແລະ ຍຶດຖືຜົນປະໂຫຍດຂອງສະມາຊິກເປັນຫຼັກ, ເງື່ອນໄຂດັ່ງກ່າວໄດ້ສ້າງຄວາມໄວ້ເນື້ອເຊື່ອໃຈຈາກປະຊາຊົນ ເຮັດໃຫ້ຈໍານວນສະມາຊິກເພີ່ມຂຶ້ນ ແລະ ສາມາດຂະຫຍາຍຕາໜ່າງບໍລິການຈາກ 16 ບ້ານ ມາເປັນ 24 ບ້ານ, ໂອກາດເຂົ້າເຖິງແຫຼ່ງທຶນຂອງປະຊາຊົນຫຼາຍຂຶ້ນ, ຄອບຄົວທີ່ຕ້ອງການທຶນ ເພື່ອນໍາໄປໝູນໃຊ້ໃນການຜະລິດ ຫຼື ປະກອບອາຊີບໃນບໍລິບົດນີ້, ການອອມຊັບ ບໍ່ໄດ້ເປັນພຽງການເກັບເງິນໄວ້, ແຕ່ກໍາລັງກາຍເປັນກົນໄກສ້າງທຶນໝູນວຽນພາຍໃນຊຸມຊົນ; ປັດຈຸບັນ, ສະຫະກອນມີສະມາຊິກ 3,600 ຄົນ ແລະ ມີເງິນອອມຊັບຫຼາຍກວ່າ 33 ຕື້ກີບ, ສະແດງໃຫ້ເຫັນສັກກະຍະພາບຂອງການອອມຊັບ ແລະ ຄວາມໄວ້ວາງໃຈຂອງສະມາຊິກທີ່ມີຕໍ່ກອງທຶນ.

ທ່ານກ່າວອີກວ່າ: ການປ່ຽນເງິນອອມ ໃຫ້ກາຍເປັນ "ທຶນໝູນວຽນ" ໃນຊຸມຊົນການຂະຫຍາຍຕາໜ່າງບໍລິການຄັ້ງນີ້ ມີຄວາມໝາຍຫຼາຍກວ່າການເພີ່ມຕົວເລກ ມັນແມ່ນການຍັບແຫຼ່ງທຶນເຂົ້າໃກ້ປະຊາຊົນຫຼາຍຂຶ້ນ ພາຍໃຕ້ການຄຸ້ມຄອງຂອງອົງການຈັດຕັ້ງທາງສັງຄົມ ບໍລິສັດ ໄຟຟ້ານໍ້າເທີນ 2, ສະຫະກອນໄດ້ກາຍເປັນກົນໄກຮ່ວມກັນຂອງຊຸມຊົນ ໂດຍມີຫຼັກການວ່າ "ຜູ້ກູ້ຢືມ ຕ້ອງເປັນສະມາຊິກຂອງກອງທຶນ". ກົນໄກນີ້ຊ່ວຍສົ່ງເສີມ 2 ດ້ານຄວບຄູ່ກັນ: ສ້າງວິໄນທາງການເງິນ: ຝຶກນິໄສການອອມຊັບຢ່າງຕໍ່ເນື່ອງ; ຕໍ່ຍອດອາຊີບ: ນໍາເງິນທຶນໄປສະໜັບສະໜູນການຜະລິດກະສິກໍາ ແລະ ທຸລະກິດຂະໜາດນ້ອຍ-ກາງ (SMEs) ໃນທ້ອງຖິ່ນ. ສິ່ງນີ້ເຮັດໃຫ້ "ການເງິນ" ເຂົ້າມາຮັບໃຊ້ "ການຜະລິດ" ຢ່າງແທ້ຈິງ ແທນທີ່ຈະຢຸດຢູ່ພຽງການຝາກ ຫຼື ກູ້ຢືມ, ຊ່ວຍໃຫ້ເງິນທຶນໝູນວຽນຢູ່ພາຍໃນ, ສ້າງກິດຈະກໍາທາງເສດຖະກິດ ແລະ ເຮັດໃຫ້ຄອບຄົວສາມາດເພິ່ງພາຕົນເອງໄດ້.

ການບໍລິການຂອງສະຫະກອນແຫ່ງນີ້, ທີ່ໄດ້ຂະຫຍາຍຕາໜ່າງບໍລິການຈາກ 16 ບ້ານ ສູ່ 24 ບ້ານ ເປັນພຽງອີກກ້າວໜຶ່ງຂອງການເດີນທາງ ຄວາມທ້າທາຍສໍາຄັນໃນຕໍ່ໜ້າ ຄືການຮັກສາມູນເຊື້ອຄວາມຊື່ສັດຂອງພະນັກງານ, ຄວາມເຂັ້ມງວດໃນການຄຸ້ມຄອງທາງການເງິນ ແລະ ຄຸນນະພາບການບໍລິ ຫານໃຫ້ເຂັ້ມແຂງ. ຄຽງຄູ່ກັບການຂະຫຍາຍຕົວ ເພາະໃນທ້າຍທີ່ສຸດ, ທຶນທີ່ມີຄຸນຄ່າທີ່ສຸດ ບໍ່ແມ່ນທຶນທີ່ຖືກເກັບໄວ້, ແຕ່ແມ່ນທຶນທີ່ໝູນວຽນເພື່ອປ່ຽນເປັນໂອກາດ, ສ້າງລາຍຮັບ ແລະ ຍົກລະດັບຄຸນນະພາບຊີວິດຂອງປະຊາຊົນ ເພື່ອຫຼຸດຜ່ອນຄວາມທຸກຍາກ ແລະ ກ້າວເຂົ້າສູ່ການພັດທະນາໄປເລື້ອຍໆ.

ຂ່າວ: ສ.ພະຈັນ ພາບ: ວັດທະນາ