 |
ສະຫາຍ ອ່ອນມະນີວັນ ຈັນດາວົງ ຮອງປະທານຄະນະກວດກາພັກ ແຂວງເຊກອງ ລາຍງານໃຫ້ຮູ້ວ່າ: ຕະຫຼອດໄລຍະຜ່ານມາຄະນະກວດກາແຕ່ລະຂັ້ນໄດ້ເອົາໃຈໃສ່ຈັດຕັ້ງປະຕິບັດວຽກງານຕິດຕາມກວດກາພັກຢ່າງຕັ້ງໜ້າ ໂດຍສະເພາະການຜັນຂະຫຍາຍ ແລະຈັດຕັ້ງປະຕິບັດກອງປະຊຸມໃຫຍ່ຄັ້ງທີ XI-XII ຂອງພັກ, ມະຕິກອງປະຊຸມໃຫຍ່ ຄັ້ງທີ X-XI ຂອງອົງຄະນະພັກແຂວງ ແລະການຈັດຕັ້ງປະຕິບັດຄຳສັ່ງແນະນຳຂອງຄະນະເລຂາທິການສູນກາງພັກ ເລກທີ 169/ຄລສພ, ລົງວັນທີ 5 ສິງຫາ 2022 ວ່າດ້ວຍການເພີ່ມທະວີ ການນຳພາ-ຊີ້ນຳ ຕໍ່ການເຄື່ອນໄຫວວຽກງານກວດກາ ແລະການແກ້ໄຂຜົນຂອງການກວດກາ, ບັນດາມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ, ແຜນພັດທະນາເສດຖະກິດ-ສັງຄົມຄັ້ງທີ lXຂອງແຂວງ, ເອົາໃຈໃສ່ນຳພາກໍ່ສ້າງ-ປັບປຸງການຈັດຕັ້ງພັກ, ສະມາຊິກພັກ ຕາມ 5 ຫຼັກການ, 3 ທິດນຳໃນການກໍ່ສ້າງ, ກວດກາການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນຕາມຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ ແລະບົດແນະນຳຂອງຄະນະຈັດຕັ້ງສູນກາງພັກ ສະບັບເລກທີ 28/ຄຈສພ, ເກັບກຳສະພາບການຈັດຕັ້ງປະຕິບັດລະບອບແບບແຜນນຳພາ-ວິທີເຮັດວຽກຂອງພະນັກງານ, ຕິດຕາມກວດກາການດຳເນີນຊີວິດການເມືອງກາງສະໄໝ ແລະຕິດຕາມກວດກາຄວາມຮັບຜິດຊອບການປະຕິບັດໜ້າທີ່ການເມືອງຂອງພະນັກງານທີ່ມີການລະເມີດກົດລະບຽບຂອງພັກ, ຄຽງຄູ່ກັນນີ້ ວຽກງານກວດກາລັດ ກໍໄດ້ເອົາໃຈໃສ່ດຳເນີນການກວດກາຕາມແຜນປີປົກກະຕິ, ສົມທົບກັບຂະແໜງກວດກາລັດ, ພະແນກການກ່ຽວຂ້ອງ ດຳເນີນຕິດຕາມກວດກາໂຄງການລົງທຶນຂອງລັດທີ່ມີມູນຄ່າ 10 ຕື້ກີບ ລົງມາ ມີທັງໝົດ 44 ໂຄງການ ສາມາດພົບເຫັນບັນຫາຈຳນວນຫນຶ່ງ ເປັນຕົ້ນການຄິດໄລ່ບໍ່ຖືກລະບຽບການ, ປະສານສົມທົບຮ່ວມກັບຄະນະສະເພາະກິດຂັ້ນແຂວງ ເຜີຍແຜ່ ແລະກວດກາການຈັດຕັ້ງປະຕິບັດແຈ້ງການຂອງຫ້ອງວ່າການສຳນັກງານນາຍົກ ເລກທີ 978/ຫສນຍ ແລະຄຳສັ່ງ 04/ຊກ ຢູ່ 3 ເມືອງ ຈຳນວນ 23 ເປົ້າໝາຍ, ຮ່ວມກັບຄະນະສະເພາະກິດຂັ້ນແຂວງຕາມຂໍ້ຕົກລົງຂອງທ່ານເຈົ້າແຂວງ ຕິດຕາມການປະມູນຊື້-ຂາຍໄມ້ຢຶດຜິດກົດໝາຍ ຈຳນວນທັງໝົດ 202 ທ່ອນ, ບໍລິມາດ 461,866 ແມັດກ້ອນ ມູນຄ່າເປັນເງິນ 2,121.86 ລ້ານກີບ, ພ້ອມນັ້ນຍັງໄດ້ຖືເອົາວຽກງານສະກັດກັ້ນ ແລະຕ້ານການສໍ້ລາດບັງຫຼວງເປັນວຽກທີ່ສຳຄັນຮີບດ່ວນ ເພື່ອຕ້ານແລະສະກັດກັ້ນການສໍ້ລາດບັງຫຼວງດ້ວຍຫຼາຍວິທີ ແລະຫຼາຍຮູບແບບ, ໃນນັ້ນໄດ້ຈັດພິທີປາຖະກະຖາ, ເຜີຍແຜ່ໂຄສະນາເຊື່ອມຊຶມວັນຕ້ານການສໍ້ລາດບັງຫຼວງ, ກົດໝາຍຕ້ານການສໍ້ລາດບັງຫຼວງໃຫ້ແກ່ສະມາຊິກພັກ, ພະນັກງານລັດຖະກອນ, ທະຫານ, ຕຳຫຼວດໄດ້ຮັບຮູ້ຢ່າງທົ່ວເຖິງ, ໄດ້ດຳເນີນການສືບສວນ-ສອບສວນ ຄະດີການສໍ້ລາດບັງຫຼວງ 2 ຄະດີຄື: ຄະດີສໍ້ລາດບັງຫຼວງ ຢູ່ບໍລິສັດ ລັດວິສາຫະກິດໄປສະນີລາວ ສາຂາເຊກອງ ແລະ ອົງການປະກັນລົງຄົມແຂວງ ມີຜູ້ກ່ຽວຂ້ອງທັງໝົດ 9 ຄົນ, ພະນັກງານລັດ 7 ຄົນ, ພະນັກງານລັດວິສາຫະກິດ 2 ຄົນ, ໃນນີ້, ໄດ້ແກ້ໄຂ ຕາມລະບຽບບໍລິຫານ 5 ຄົນແລະ ດໍາເນີນຄະດີຕາມກົດໝາຍ 4 ຄົນ ພົບເຫັນຜົນເສຍຫາຍທັງໝົດ 3,096.35 ລ້ານກີບ, ເກັບກູ້ຄືນໄດ້ 196.53 ລ້ານກີບ ແລະຕິດຕາມກວດກາ ວຽກງານຄົ້ນຄວ້າ ຄໍາຮ້ອງ ຄໍາສະເໜີ, ຕິດຕາມກວດກາ, ຊຸກຍູ້ວຽກງານກວດກາການປະຕິບັດຜົນການກວດກາຕາມຜົນການກວດສອບສຳເລັດຕາມລະບຽບການ.
 |
ສຳລັບແຜນ5 ປີ ຕໍ່ໜ້າ (2026-2030)ຈະສືບຕໍ່ຍົກສູງບົດບາດການນຳພາຂອງຄະນະພັກຢ່າງແຂງແຮງ, ຍົກສູງຄວາມສັກສິດໃນການຄຸ້ມຄອງລັດດ້ວຍກົດໝາຍ, ສ້າງກົນໄກທີ່ສາມາດຕິດຕາມ,ກວດກາການນຳໃຊ້ສິດອຳນາດຂອງອົງການກວດກາລັດຂັ້ນຕ່າງໆ, ເພີ່ມທະວີການສະກັດກັ້ນ, ຕ້ານການສໍ້ລາດບັງຫຼວງຢ່າງເດັດຂາດ, ປັບປຸງການຈັດຕັ້ງ ແລະພະນັກງານກວດກາແຕ່ລະຂັ້ນໃຫ້ມີຄຸນນະພາບສູງຂຶ້ນ, ຫັນເປັນທັນສະໄໝ, ສ້າງເງື່ອນໄຂໃຫ້ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສື່ມວນຊົນ ແລະພົນລະເມືອງເຂົ້າຮ່ວມວຽກງານການຕິດຕາມກວດກາ ແລະວາງຄາດໝາຍສູ້ຊົນຄາດໝາຍວຽກງານພັກ, ການຍົກສູງປະສິດທິຜົນຂອງວຽກງານກວດກາລັດ ແລະວາງຄາດໝາຍສະກັດກັ້ນ ແລະຕ້ານການສໍ້ລາດບັງຫຼວງ ພ້ອມທັງວາງຄາດໝາຍຈຸດສຸມແຕ່ລະດ້ານ ເພື່ອສືບຕໍ່ຈັດຕັ້ງປະຕິບັດວຽກງານກວດກາໃຫ້ໄດ້ຮັບຜົນສຳເລັດຕາມລະດັບຄາດໝາຍ ແລະໄດ້ຮັບການພັດທະນາເຂົ້າສູ່ລວງເລິກຢ່າງມີປະສິດທິພາບ, ປະສິດທິຜົນ ແລະເຂັ້ມແຂງຂຶ້ນເລື້ອຍໆ.
 |
ຂ່າວ: ອັດສະວິນ
ຄໍາເຫັນ