ໂຣກຕຸ້ຍ ສົ່ງຜົນຕໍ່ສຸຂະພາບໃນປັດຈຸບັນ, ລວມເຖິງເພີ່ມໂອກາດໃຫ້ເກີດໂຣກຕຸ້ຍຕອນເປັນຜູ້ໃຫຍ່ ແລະ ໂຣກຕ່າງໆທີ່ກ່ຽວຂ້ອງ, ໂດຍປັດໄຈສຳຄັນທີ່ພາໃຫ້ເກີດການລະບາດຂອງໂຣກນີ້ ເຊັ່ນ: ພັນທຸກຳ, ສະພາບແວດລ້ອມ ແລະ ອິດທິພົນໃນການດຳລົງຊີວິດ, ຂະນະທີ່ການປະເມີນຄ່າອັດຕາພັນທຸກຳຊີ້ໃຫ້ເຫັນວ່າ: ພັນທຸກຳມີສ່ວນເຮັດໃຫ້ເກີດຄວາມສ່ຽງຕໍ່ໂຣກຕຸ້ຍເຖິງ 40-70%.
ການສຶກສາສະບັບນີ້ນິຍາມໂຣກຕຸ້ຍໃນໄວໜຸ່ມວ່າ: ຍ້ອນພຶດຕິກຳຂອງການໃຊ້ຊີວິດເຊັ່ນ: ການໃຊ້ເວລາຢູ່ກັບໜ້າຈໍຫຼາຍເກີນໄປ ຫຼື ການນອນຫຼັບພັກຜ່ອນບໍ່ພຽງພໍ ຊຶ່ງເປັນປັດໄຈທີ່ສຳຄັນເຊັ່ນກັນ ຕົວຢ່າງ: ໄວໜຸ່ມທີ່ໃຊ້ເວລາຢູ່ໜ້າຈໍດົນກວ່າ 2 ຊົ່ວໂມງຕໍ່ມື້ ມີຄວາມສ່ຽງນໍ້າໜັກເກີນເກນ ຫຼື ເປັນໂຣກຕຸ້ຍເພີ່ມຂຶ້ນ 67%. ການສຶກສາດັ່ງກ່າວຍັງເນັ້ນຢໍ້າເຖິງໂຣກຕຸ້ຍເປັນໂຣກທີ່ສັບຊ້ອນ ຊຶ່ງກ່ຽວຂ້ອງກັບຄວາມບໍ່ສົມດຸນລະຫວ່າງການຮັບ ແລະ ການໃຊ້ພະລັງງານ ທີ່ໄດ້ຮັບອິດທິພົນຈາກຮໍໂມນຄວບຄຸມຄວາມຫິວ ແລະ ຄວາມອີ່ມ.
ໂຣກຕຸ້ຍໃນໄວໜຸ່ມ ຍັງກ່ຽວຂ້ອງກັບອາກາດແຊກຊ້ອນຂອງສຸຂະພາບຈຳນວນຫຼາຍເຊັ່ນ: ອາການດື້ອິນຊູລິນ, ຄວາມດັນເລືອດສູງ, ໂຣກໄຂມັນໃນເລືອດສູງ, ຄວາມຜິດປົກກະຕິດ້ານການນອນ ແລະ ອາກາດຊຶມເຊົ້າ ອີກທັງພົວພັນກັບອັດຕາການເສຍຊີວິດຈາກໂຣກຫຼອດເລືອດ ແລະ ຫົວໃຈ ລວມເຖິງໂຣກເບົາຫວານປະເພດ 2 ຕອນເຂົ້າສູ່ໄວຜູ້ໃຫຍ່ເພີ່ມຂຶ້ນອີກດ້ວຍ.
ປັດຈຸບັນ, ມີວິທີຮັກສາໂຣກຕຸ້ຍຫຼາຍວິທີ ແຕ່ຫົວໃຈສຳຄັນຍັງຄົງຢູ່ທີ່ການປັບປ່ຽນການດຳລົງຊີວິດໃຫ້ເໝາະສົມຄື: ການປັບອາຫານ, ການເຄື່ອນໄຫວຮ່າງກາຍເພີ່ມຂຶ້ນ ແລະ ການເຂົ້າຮັບຄຳປຶກສາດ້ານພຶດຕິກຳ.
ຄໍາເຫັນ