 |
ໂອກາດນີ້ໄດ້ຮັບຟັງການລາຍງານສະພາບລວມຂອງເມືອງໃນການຈັດຕັ້ງປະຕິບັດວຽກງານ 6 ເດືອນຕົ້ນປີຂອງເມືອງຈາກ ສະຫາຍ ບຸນສະຫວັດ ສີວົງໄຊ ກຳມະການພັກແຂວງ ເລຂາພັກເມືອງຜົ້ງສາລີ ຊຶ່ງທ່ານໃຫ້ຮູ້ວ່າ: ຜ່ານການຈັດຕັ້ງປະຕິບັດ 6 ເດືອນຕົ້ນປີ 2026 ເສດຖະກິດຂອງເມືອງຂະຫຍາຍຕົວຢູ່ໃນລະດັບ 2.06% ທຽບໃສ່ 6 ເດືອນຕົ້ນປີ 2025 ກວມ 71.17% (ຂອງແຜນການ 5.37%) ໃນນັ້ນ: ກະສິກຳ - ປ່າໄມ້ 2.88%, ທຽບໃສ່ 6 ເດືອນຕົ້ນປີ 2025 ກວມ 89.78%, ອຸດສາຫະກຳ-ຫັດຖະກໍາ2.06%, ທຽບໃສ່ 6 ເດືອນຕົ້ນປີ 2025 ກວມ 91.42% ບໍລິການ 2.23%, ທຽບໃສ່ 6 ເດືອນຕົ້ນປີ 2025 ກວມ 77.30%, ລວມຍອດມູນຄ່າຜະລິດພາຍໃນເມືອງ 315.97 ຕື້ກີບ, ທຽບໃສ່ 6 ເດືອນຕົ້ນປີ 2025 ກວມ 98.67%;
 |
ພາຍຫຼັງໄດ້ຮັບຟັງການລາຍງານ, ສະຫາຍ ວັນໄຊ ພອງສະຫວັນ ກໍໄດ້ມີຄຳເຫັນໂອ້ລົມ ຊຶ່ງກ່ອນອື່ນສະຫາຍໄດ້ສະແດງຄວາມຂອບໃຈຕໍ່ຄະນະພັກ, ຄະນະນຳຂອງເມືອງທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການຈັດຕັ້ງປະຕິບັດວຽກງານໃນແຕ່ລະດ້ານພ້ອມນີ້ກໍໄດ້ເນັ້ນໃຫ້ຄະນະພັກ, ຄະນະນຳຂອງເມືອງສູ້ຊົນສຸມໃສ່ການຈັດຕັ້ງປະຕິບັດບັນດາຄາດໝາຍຕ່າງໆຂອງເມືອງໃຫ້ປະກົດຜົນເປັນຈິງ, ພ້ອມກັນນໍາພາ-ຊີ້ນຳ, ບັນຊາ ສຶກສາຄົ້ນຄວ້າຫັນການລາຍງານການເມືອງເປັນແຜນການໂຄງການແຜນງານໃຫ້ລະອຽດໃນແຕ່ລະໄລຍະ, ວິເຄາະວິໄຈ, ຕິດຕາມ, ກວດກາການ ເຄື່ອນໄຫວໃນແຕ່ລະໄລຍະເພື່ອຊອກໃຫ້ເຫັນດ້ານດີ, ດ້ານຄົງຄ້າງ; ການພັດທະນາເສດຖະກິດ-ສັງຄົມໃຫ້ຄົ້ນຄວ້າຢ່າງເລິກເຊິ່ງ, ອັນໃດເປັນເສດຖະກິດພູມປັນຍາຂອງປະຊາຊົນທີ່ສາມາດຜະລິດເປັນສິນຄ້ານອກຈາກການຜະລິດຊາເພື່ອສະໜອງພາຍໃນເມືອງພາຍໃນແຂວງ ຫຼື ສ້າງໃຫ້ເປັນສິນຄ້າໂອດັອບເພື່ອສົ່ງອອກ, ບັນດາຂະແໜງການທີ່ຕິດພັນກັບການຜະລິດແມ່ນໃຫ້ຄົ້ນຄວ້າວິເຄາະວິໄຈ, ສ້າງຖານລາຍຮັບທີ່ມີຄວາມຍືນຍົງເພື່ອສ້າງຊີວິດການເປັນຢູ່ຂອງປະຊາຊົນ, ຊຸກຍູ້ສົ່ງເສີມຫົວໜ່ວຍວິສາຫະກິດຂະໜາດນ້ອຍເປັນຕົ້ນແມ່ນແຫຼ່ງຜະລິດ, ຕະຫຼາດສົ່ງອອກ ແລະ ດ້ານເຕັກນິກວິຊາການ; ສ້າງກຸ່ມການຜະລິດທີ່ສາມາດເຂົ້າເຖິງແຫຼ່ງທຶນເຂົ້າເຖິງຕະຫຼາດໄດ້ເພື່ອໃຫ້ມີຄວາມເຂັ້ມແຂງ ແລະ ຍືນຍົງ, ດຶງດູດການລົງທຶນຈາກພາຍໃນ ແລະ ຕ່າງປະເທດ, ພັດທະນາແຫຼ່ງທ່ອງທ່ຽວເພື່ອດຶງດູດນັກທ່ອງທ່ຽວ; ການຜະລິດສິນຄ້າ, ການແປຮູບການປຸງແຕ່ງການຫຸ້ມຫໍ່ຜະລິດຕະພັນຕ່າງໆກໍເຮັດໃຫ້ເປັນຫຼາຍຮູບຫຼາຍສີເພື່ອເພີ່ມມູນຄ່າສິນຄ້າ, ການບໍລິການຕ່າງໆກໍຕ້ອງຊຸກຍູ້ສົ່ງເສີມໂດຍສະເພາະການບໍລິການໂຮງແຮມ, ເຮືອນພັກ; ຊຸກຍູ້ຜູ້ປົກ ຄອງໃຫ້ນຳເອົາລູກຫຼານທີ່ຢູ່ໃນເກນອາຍຸໄດ້ເຂົ້າໂຮງຮຽນ; ວຽກງານສາທາລະນະສຸກສືບຕໍ່ເອົາໃຈໃສ່ໃນການຄຸ້ມຄອງປົກປັກຮັກສາໃນສິ່ງທີ່ມີແລ້ວໂດຍສະເພາະແມ່ນໂຮງໝໍ, ສຸກສາລາ ແລະ ການບໍລິການກໍຕ້ອງເອົາໃຈໃສ່ໃຫ້ດີ; ໃຫ້ເອົາໃຈໃສ່ຕິດຕາມ, ກວດກາການເຂົ້າອອກເມືອງຂອງຄົນຕ່າງປະເທດເພື່ອປ້ອງກັນບັນດາກຸ່ມແກ້ງທີ່ສ້າງຄວາມບໍ່ສະຫງົບປັ່ນປ່ວນສັງຄົມ, ໃຫ້ຕິດຕາມ, ກວດກາບັນດາໂຮງແຮມບ້ານພັກທີ່ອາດເປັນຈຸດມົ້ວສຸມ, ຕິດພັນກັບການແກ້ໄຂບັນຫາຢາເສບຕິດ; ເອົາໃຈໃສ່ກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ, ການຂະຫຍາຍພັກຕ້ອງໃຫ້ມີຄຸນນະພາບ, ການສ້າງພະນັກງານຕ້ອງສ້າງໃນຫຼາຍຮູບຫຼາຍແບບເປັນຕົ້ນແມ່ນການສ້າງເປັນລະບົບຢູ່ໂຮງຮຽນ, ການປະຕິບັດວຽກງານຕົວຈິງ ແລະ ສ້າງຢູ່ຮາກຖານ; ວຽກງານກວດກາ ຄະນະພັກຕ້ອງມີຄວາມຮັບຜິດຊອບໂດຍກົງຕໍ່ວຽກງານກວດກາ, ຄະນະກວດກາຕ້ອງເປັນເສນາທິການໃນການຈັດຕັ້ງປະຕິບັດຕາມແຜນຂອງຄະນະພັກ, ເພາະວຽກງານກວດກາເປັນກົນໄກໜຶ່ງຂອງການນຳພາຂອງພັກ, ການບໍລິຫານລັດໃນແຕ່ລະຂັ້ນເພື່ອຊອກໃຫ້ເຫັນຜົນດີຜົນສຳເລັດຂອງການຈັດ ຕັ້ງປະຕິບັດບັນດາຄາດໝາຍສູ້ຊົນ, ຊອກໃຫ້ເຫັນດ້ານອ່ອນເພື່ອປັບປຸງແກ້ໄຂ, ພ້ອມດຽວກັນນັ້ນກໍເພື່ອປ້ອງກັນບໍ່ໃຫ້ມີການລະເມີດຕໍ່ກົດລະບຽບຂອງພັກ, ກົດໝາຍ ແລະ ລະບຽບການຕ່າງໆຂອງລັດ; ວຽກງານຈັດຕັ້ງມະຫາຊົນກໍໃຫ້ເອົາໃຈໃສ່ຊຸກຍູ້ສົ່ງເສີມໃຫ້ມີການເຄື່ອນໄຫວຢ່າງປົກກະຕິ; ດ້ານຄວາມຮັບຜິດ ຊອບຂອງຄະນະພັກ ບັນດາທິດທາງແຜນການວຽກງານທີ່ກຳນົດໄວ້ໃນແຜນພັດທະນາແມ່ນຄະນະພັກຕ້ອງເປັນຫົວຈັກສຳຄັນໃນການນຳພາ-ຊີ້ນຳເຄື່ອນໄຫວວຽກງານໃນແຕ່ລະດ້ານ, ພ້ອມນີ້ກໍຕ້ອງຮັກສາຄວາມສາມັກຄີພາຍໃນໃຫ້ເປັນປຶກແຜ່ນໃຫ້ມີຄວາມເປັນເອກະພາບສູງ, ຕົກລົງເປັນໝູ່ຄະນະ.
 |
ໂອກາດດຽວກັນນີ້, ສະຫາຍ ວັນໄຊ ພອງສະຫວັນ ກໍໄດ້ມອບເງິນຈຳນວນ 50,000,000 ກີບ, ຄອມພິວເຕີ ແລະ ປິ່ນເຕີຈຳນວນ 6 ຊຸດ ພ້ອມນີ້ ກຸ່ມນັກທຸລະກິດໜຸ່ມກໍໄດ້ປະກອບສ່ວນມອບເງິນຈຳນວນ 100,000,000 ກີບ ໃຫ້ເມືອງເພື່ອນໍາໄປໝູນໃຊ້ໃນວຽກງານຕ່າງໆຂອງເມືອງ ແລະ ໄດ້ໄປຢ້ຽມຢາມເບິ່ງຫ້ອງການຕາແສງກົກຊາ ອີກດ້ວຍ.
(ຂ່າວ: ຕູ່ນາ)
ຄໍາເຫັນ