 |
ໂອກາດນີ້, ສະຫາຍ ວັນໄຊ ພອງສະຫວັນ ໄດ້ເຂົ້າຮ່ວມກອງປະຊຸມວຽກງານກວດກາທົ່ວແຂວງ ອັດຕະປື ໄລຍະ 5 ປີ (2021-2025) ແລະ ທິດທາງແຜນການ 5 ປີ (2026-2030) ທີ່ຈັດຂຶ້ນໃນວັນທີ 22-23 ກັນຍາ 2026ຊຶ່ງກອງປະຊຸມໄດ້ຕີລາຄາ ການຈັດຕັ້ງປະຕິບັດວຽກງານກວດກາທົ່ວແຂວງ ໃນໄລຍະ 5 ປີຜ່ານມາ ແລະ ໄດ້ພ້ອມກັນ ຄົ້ນຄວ້າ, ປະກອບຄໍາຄິດຄໍາເຫັນຢ່າງເລິກເຊິ່ງ ຕໍ່ການສະຫຼຸບວຽກງານດັ່ງກ່າວ ແລະ ຕໍ່ທິດທາງແຜນການ ໃນ 5 ປີ ຊຶ່ງໃນຕໍ່ໜ້າໄດ້ກຳນົດວຽກງານຈຸດສຸມເປັນຕົ້ນແມ່ນເພີ່ມທະວີວຽກງານຕິດຕາມ ແລະ ກວດກາພາຍໃນພັກ ໂດຍສຸມໃສ່ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ມະຕິ XII ຂອງອົງຄະນະພັກແຂວງ, ເພີ່ມທະວີການກວດກາການຄຸ້ມຄອງບໍລິຫານລັດ ໂດຍເນັ້ນໃສ່ໂຄງການລົງທຶນ, ການຄຸ້ມຄອງງົບປະມານ, ຊັບພະຍາກອນທຳມະຊາດ, ການແກ້ໄຂການລັກລອບຂຸດຄົ້ນແຮ່ຄຳຕົກຂ້ອນ ແລະ ເປີດຊ່ອງທາງໃຫ້ປະຊາຊົນມີສ່ວນຮ່ວມສະໜອງຂໍ້ມູນ, ສືບຕໍ່ຕ້ານ ແລະ ແກ້ໄຂການສໍ້ລາດບັງຫຼວງ ໂດຍດຳເນີນຄະດີຕາມລະບຽບ, ເພີ່ມທະວີການຂຶ້ນບັນຊີຊັບສິນຂອງພະນັກງານ ແລະ ສົ່ງເສີມການນຳເນື້ອໃນຕ້ານການສໍ້ລາດບັງຫຼວງເຂົ້າໃນການສຶກສາ, ຍົກລະດັບກົງຈັກ ແລະ ພະນັກງານກວດກາ ໃຫ້ມີຄວາມເປັນມືອາຊີບ, ມີຈັນຍາບັນ ແລະ ຮອງຮັບການຫັນເປັນທັນສະໄໝ ໂດຍພັດທະນາລະບົບຈັດເກັບຂໍ້ມູນແບບລວມສູນດ້ວຍເຕັກໂນໂລຊີ, ຍົກສູງຄວາມຮັບຜິດຊອບຂອງຄະນະພັກແຕ່ລະຂັ້ນ ໂດຍຖືເອົາວຽກງານກວດກາເປັນກົນໄກສຳຄັນໃນການບໍລິຫານ ແລະ ເປັນໜ້າທີ່ຮັບຜິດຊອບຂອງຜູ້ນຳແຕ່ລະຂັ້ນ.
 |
ໂອກາດທີ່ມີຄວາມໝາຍຄວາມສຳຄັນນີ້ ສະຫາຍ ວັນໄຊ ພອງສະຫວັນ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ຊຶ່ງສະຫາຍໄດ້ກ່າວວ່າ ໃຫ້ສ້າງການຫັນປ່ຽນໃນວຽກງານກວດກາເພື່ອເຮັດໃຫ້ວຽກງງານກວດກາເປັນກົນໄກໜຶ່ງໃນການນຳພາຂອງພັກ ແລະ ການຄຸ້ມຄອງບໍລິຫານລັດ, ຕ້ອງຮັບຮູ້ ແລະ ເຂົ້າໃຈໃຫ້ຖືກຕ້ອງກ່ຽວກັບວຽກງານກວດກາ, ການກວດກາແມ່ນໜຶ່ງໃນບົດບາດການນຳພາຂອງພັກ, ທຸການຈັດຕັ້ງຂອງພັກ-ລັດຈະຢູ່ໃນຕໍແໜ່ງໃດກໍຕ້ອງຢູ່ພາຍໃຕ້ການນຳພາ ພາຍໃຕ້ການກວດກາຂອງພັກ, ກວດກາໃຫ້ເຫັນຜົນສໍາເລັດດ້ານດີ ຂອງການຈັດຕັ້ງ, ບຸກຄົນ ເພື່ອເສີມຂະຫຍາຍ, ກວດກາຫາດ້ານອ່ອນຂໍ້ຄົງຄ້າງເພື່ອປັບປຸງແກ້ໄຂ, ຖ້າຫາກມີການກະທຳຜິດກໍຕ້ອງໄດ້ມີການດຳເນີນຕາມຂັ້ນຕອນໂດຍບໍ່ມີຂໍ້ຍົກເວັ້ນ; ຢາກໃຫ້ບັນດາສະຫາຍເຂົ້າໃຈວ່າວຽກງານກວດກາເເມ່ນເປັນວຽກງານຂອງຄະນະພັກໃນແຕ່ລະຂັ້ນ, ເປັນຄວາມຮັບຜິດຊອບໂດຍກົງຂອງຄະນະພັກ ໃນການກຳນົດສ້າງແຜນການໃນການກວດກາໃນແຕ່ລະໄລຍະເພື່ອດຳເນີນການກວດກາ, ຖືເອົາວຽກງານກວດກາເປັນການສະກັດກັ້ນເພື່ອບໍ່ໃຫ້ມີບັນຫາເກີດຂຶ້ນໃນອົງການຈັດຕັ້ງພັກ-ລັດ ທັງເປັນຜູ້ຕິດຕາມການຈັດຕັ້ງປະຕິບັດຂອງຄະນະກວດກາ; ການຕິດຕາມ, ກວດກາພັກແມ່ນການຕິດຕາມກວດກາການຈັດຕັ້ງປະຕິບັດກົດລະບຽບຂອງພັກ, ການຈັດຕັ້ງຜັນຂະຫຍາຍບັນດາມະຕິຄຳສັ່ງຂອງຂັ້ນເທິງໃນແຕ່ລະໄລຍະ; ວຽກງານກວດກາລັດ ແມ່ນການກວດກາການຈັດຕັ້ງປະຕິບັດພາລະບົດບາດ, ການຈັດຕັ້ງປະຕິບັດກົດໝາຍ ແລະ ລະບຽບການຕ່າງໆ; ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ເພີ່ມທະວີໃນການໂຄສະນາເຜີຍແຜ່ໃຫ້ພະນັກງານສະມາຊິກພັກຢ່າງເລິກເຊິ່ງເພື່ອເຮັດໃຫ້ເຂົາເຈົ້າມີຄວາມຮັບຮູ້ເຂົ້າໃຈ ໃນການປະຕິບັດວຽກງານ, ຖ້າມີພຶດຕິກຳສໍ້ລາດບັງຫຼວງກໍຕ້ອງໄດ້ປະຕິບັດຕາມມາດຕະການຢ່າງເດັດຂາດໂດຍບໍ່ມີຂໍ້ຍົກເວັ້ນ ເພື່ອເປັນຕົວຢ່າງໃຫ້ຜູ້ທີ່ຄິດຢາກເຮັດໃຫ້ມີສະຕິ; ສືບຕໍ່ເກັບກໍາຂໍ້ມູນເປົ້າໝາຍທີ່ຍັງບໍ່ທັນສໍາເລັດເພື່ອແກ້ໄຂໂດຍໄວ, ບໍ່ໃຫ້ແກ່ຍາວ; ເອົາໃຈໃສ່ໃນການເກັບກູ້ຊັບສິນຂອງລັດທີ່ຕົກເຮ່ຍເສຍຫາຍກັບຄືນໃຫ້ລັດ, ຄຸ້ມຄອງຊັບສິນທີ່ຢຶດໃນການດໍາເນີນຄະດີຕ່າງໆບໍ່ໃຫ້ຕົກເຮ່ຍເສຍຫາຍ; ການແກ້ໄຂຄຳຮ້ອງ-ຄຳສະເໜີຂອງພົນລະເມືອງ ເອົາໃຈໃສ່ຄົ້ນຄວ້າແກ້ໄຂເພື່ອສະເໜີໃຫ້ພາກສ່ວນກ່ຽວຂ້ອງແກ້ໄຂໃຫ້ຖືກຕ້ອງຕາມກົດໝາຍ ຕາມຂັ້ນຮັບຜິດຊອບຂອງຕົນ ບໍ່ໃຫ້ສະສົມບັນຫາ; ຕ້ອງພ້ອມກັນເພີ່ມທະວີຄວາມຮັບຜິດຊອບຂອງຜູ້ເຮັດວຽກງານກວດກາແຕ່ລະຂັ້ນໃນການຈັດຕັ້ງປະຕິບັດວຽກງານກວດກາ, ມີຈັນຍາບັນຈັນຍາທຳ, ມີກົນໄກ, ມີຄວາມກ້າຫານເດັດຂາດ, ນິ້ມນວນ ພາວະວິໄສ ຕ້ອງມີຈິດໃຈທີ່ສັດຊື່, ມີກົນໄກການປະສານສົມທົບຂອງອົງການກ່ຽວຂ້ອງຢ່າງລະອຽດຈະແຈ້ງ.
 |
ນອກນີ້ ຍັງໄດ້ມອບເງິນຈຳນວນ 100.000.000 ກີບ ໃຫ້ຄະນະກວດກາພັກແຂວງ ແລະ ມອບເງິນຈຳນວນ 100.000.000 ກີບ ໃຫ້ແຂວງເພື່ອນໍາໃຊ້ເຂົ້າໃນວຽກງານສະກັດກັ້ນ ແລະ ແກ້ໄຂໄພພິບັດ.
(ຂ່າວ: ຕູ່ນາ)
ຄໍາເຫັນ