ສະຫາຍ ວັນໄຊ ພອງສະຫວັນ ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງຍອດອູ

ໂອກາດນີ້ໄດ້ຮັບຟັງການລາຍງານສະພາບລວມຂອງເມືອງໃນການຈັດຕັ້ງປະຕິບັດວຽກງານ 6 ເດືອນຕົ້ນປີຂອງເມືອງຈາກສະຫາຍ ສົມຫວັງ ສຸມວິໄລ ເລຂາພັກເມືອງຍອດອູ ຊຶ່ງສະຫາຍໃຫ້ຮູ້ວ່າເມືອງຍອດອູ ເປັນເມືອງທີ່ຕັ້ງຢູ່ເໜືອສຸດຂອງປະເທດລາວ ຫ່າງຈາກເທດສະບານແຂວງ 93 ກິໂລແມັດ ຊຶ່ງມີເນື້ອທີ່ທັງໝົດ 3,105.59 ກິໂລຕາແມັດ, ເນື້ອທີ່ 97% ເປັນພູດອຍ, ເນື້ອທີ່ປ່າໄມ້ປົກຫຸ້ມ 65%, ມີຊາຍແດນຕິດກັບເມືອງຫຼ້າ ແລະ ເມືອງຈ່ຽງເຊີນ ສປ ຈີນ ມີຄວາມຍາວ 151 ກິໂລແມັດ, ຕິດກັບ ເມືອງແຍ້ ສສ ຫວຽດນາມ 52.2 ກິໂລແມັດ, ມີດ່ານສາກົນ 1 ແຫ່ງ, ດ່ານປະເພນີ 2 ແຫ່ງ, ມີ 8 ກຸ່ມ 73 ບ້ານ, ມີພົນລະເມືອງ 34,596 ຄົນ ຍິງ 16,931 ຄົນ, ຄວາມໜາແໜ້ນຂອງພົນລະເມືອງ 10 ຄົນຕໍ່ກິໂລຕາແມັດ, ປະກອບມີ 10 ຊົນເຜົ່າເຊັ່ນ: ເຜົ່າລື້, ອີວມຽນ, ຫໍ້, ອາຄາ, ສີດາ, ໂລໂລໂພ, ໄທເໜືອ, ຢັ້ງ, ຮາຢີ ແລະ ພູນ້ອຍ; ຄະນະບໍລິຫານງານພັກເມືອງ ໄດ້ແບ່ງຄວາມຮັບຜິດຊອບພາຍໃນ, ກຳນົດແຜນດຳເນີນງານ ແລະ ລະບອບແບບແຜນວິທີເຮັດວຽກຢ່າງລະອຽດຈະແຈ້ງ ໂດຍໄດ້ກຳນົດ ແລະ ສຸມໃສຈັດຕັ້ງປະຕິບັດ 9 ບັນຫາ, 5 ທ່າແຮງ, 7 ແລວພັດທະນາ, 4 ທາງອອກ ແລະ 10 ແຜນງານ 36 ໂຄງການຕິດພັນກັບການຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນ ແລະ ຕິດພັນກັບການຈັດຕັ້ງປະຕິບັດວຽກງານ 3 ສ້າງ ໂດຍສຸມໃສ 18 ບ້ານເປົ້າໝາຍ ຂອງເມືອງ. ໃນ 6 ເດືອນຕົ້ນປີ 2026 ເສດຖະກິດຍັງສືບຕໍ່ຂະຫຍາຍຕົວໃນທາງທີ່ດີ ສະແດງອອກລວມຍອດມູນຄ່າຜົນຜະລິດພາຍໃນເມືອງ ສາມາດບັນລຸໄດ້ 707.88 ຕື້ກີບ, ທຽບໃສ່ແຜນການປະຕິບັດໄດ້ 73.09 %, ລາຍຮັບສະເລ່ຍຕໍ່ຫົວຄົນ ບັນລຸໄດ້ 20.47 ລ້ານກີບ. ສາມາດປະຕິບັດລາຍຮັບໄດ້ທັງໝົດ 5,926.19 ລ້ານກີບໃນນີ້: ລາຍຮັບທ້ອງຖິ່ນປະຕິບັດໄດ້ 3,176.76 ລ້ານກີບ, ທຽບໃສ່ໄລຍະດຽວປີຜ່ານ ມາເທົ່າກັບ 143.27%, ທຽບໃສ່ແຜນການປີປະຕິບັດໄດ້ 62.52%(ແຜນການ 5,081.06 ລ້ານກີບ) ແລະ ລາຍຮັບດຸ່ນດ່ຽງຈາກ ແຂວງ 2,749.42 ລ້ານກີບ, ສາມາດຈັດຕັ້ງປະຕິບັດໂຄງການລົງທຶນເອກະຊົນພາຍໃນ ແລະ ຕ່າງປະເທດໄດ້ທັງໝົດ 38 ໂຄງການ, ມູນຄ່າການລົງທຶນລວມ 3,190.98 ຕື້ກີບ, ໄດ້ລົງທຶນເຂົ້າແຕ່ລະຂະແໜງການລາຍລະອຽດຄື: ຂະແໜງກະສິກຳ ແລະ ປ່າໄມ້ມີ 27 ໂຄງການ, ມູນຄ່າການລົງທຶນ 63.34 ຕື້ກີບ, ຂະແໜງອຸດສາຫະກຳ ແລະ ການຄ້າມີ 11 ໂຄງການ, ມູນຄ່າການລົງທຶນ 3,127.64 ຕື້ກີບ, ທົ່ວເມືອງຈຳນວນບ້ານທີ່ມີເສັ້ນທາງເຂົ້າເຖິງມີ 73 ບ້ານ ກວມ ເອົາ 100%, ທາງທຽວໄດ້ 2 ລະດູມີ 50 ບ້ານ ກວມເອົາ 68.49% ຂອງບ້ານທົ່ວເມືອງ, ທາງທຽວໄດ້ລະດູດຽວມີ 23 ບ້ານ ກວມເອົາ 32%; ຂອງບ້ານທົ່ວເມືອງ, ວຽກງານນໍ້າປະປາ ຈໍານວນບ້ານທີ່ຊົມໃຊ້ນໍ້າ ປະປາມີ 7 ບ້ານ.

ພາຍຫຼັງໄດ້ຮັບຟັງການລາຍງານ ສະຫາຍ ວັນໄຊ ພອງສະຫວັນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳຂອງຄະນະພັກ-ຄະນະນຳຂອງເມືອງທີ່ໄດ້ມີຜົນສຳເລັດຫຼາຍດ້ານ ພ້ອມທັງມີຄຳເຫັນໂອ້ລົມຕໍ່ຄະນະພັກ, ຄະນະນໍາ ພ້ອມດ້ວຍພະນັກງານຫຼັກແຫຼ່ງຂອງເມືອງ ຊຶ່ງສະຫາຍໄດ້ເນັ້ນໃຫ້ຄະນະພັກ ຄະນະນຳຂອງເມືອງເອົາໃຈໃສ່ຫຼາຍດ້ານເປັນຕົ້ນແມ່ນພ້ອມກັນເອົາໃຈໃສ່ໃນການນຳພາ-ຊີ້ນຳການຈັດຕັ້ງຜັນຂະຫຍາຍມະຕິກອງປະຊຸມໃຫຍ່, ແຜນພັດທະນາເສດຖະກິດ-ສັງຄົມຂອງເມືອງຕິດພັນກັບຄາດໝາຍສູ້ຊົນຂອງແຂວງຂອງເມືອງ, ເພີ່ມທະວີໃນການສ້າງການຫັນປ່ຽນເພື່ອເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນກວ່າເກົ່າ; ເພີ່ມທະວີໃນການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບພາຍໃນເມືອງ, ແກ້ໄຂບັນຫາປະກົດການຫຍໍ້ທໍ້ໂດຍສະເພາະບັນຫາຢາເສບຕິດ; ສືບຕໍ່ເອົາໃຈໃສ່ໃນການພັດທະນາເສດຖະກິດ, ສົ່ງເສີມເສດຖະກິດພູມປັນຍາຂອງປະຊາຊົນ, ສົ່ງເສີມໃຫ້ປະປະຊາຊົນມີວຽກເຮັດງານທຳເພື່ອສ້າງລາຍຮັບເປັນຕົ້ນແມ່ນການປູກ, ການລ້ຽງ, ດຶງດູດການລົງທຶນຂອງພາຍໃນ, ຕ່າງປະເທດ, ສ້າງຖານລາຍຮັບໃໝ່ດ້ວຍການສົ່ງເສີມການລົງທຶນ, ເອົາໃສ່ໃສ່ຊຸກຍູ້ສົ່ງເສີມໃຫ້ລູກຫຼານໄດ້ຮັບການສຶກສາເພາະການສຶກສາກໍເປັນໜຶ່ງໃນເງື່ອນໄຂແກ້ໄຂຄວາມທຸກຍາກ; ຊຸກຍູ້ສົ່ງເສີມແຮງງານດິບໃຫ້ກາຍເປັນແຮງງານທີ່ມີຄວາມຮູ້ຄວາມສາມາດ; ການກໍ່ສ້າງພັກ-ພະນັກງານກໍຕ້ອງໄດ້ເອົາ ໃຈໃສ່ສ້າງພະນັກງານໃຫ້ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບຕໍ່ໜ້າທີ່ການເມືອງ, ສັບຊ້ອນໜ້າທີ່ວຽກງານໃຫ້ສອດຄ່ອງຕາມຄວາມຮູ້ຄວາມສາມາດ, ສຳລັບວຽກງານກວດກາ ຄະນະພັກ, ຄະນະນຳ ຕ້ອງເຂົ້າໃຈຢ່າງເລິກເຊິ່ງຕໍ່ວຽກງານກວດກາ, ເພາະວຽກງານກວດກາແມ່ນໜຶ່ງໃນວຽກງານການນຳພາຂອງພັກເປັນກົນໄກການບໍລິຫານໜຶ່ງຂອງການນຳພາຄຸ້ມຄອງບໍລະຫານລັດ, ແຜນການກວດກາຕ້ອງເປັນແຜນຂອງຄະນະປະຈຳພັກເມືອງບໍ່ແມ່ນຂອງຄະນະກວດກາ, ຄະນະກວດກາແມ່ນເຮັດໜ້າທີ່ຕິດຕາມ, ກວດກາຕາມແຜນຂອງຄະນະປະຈຳພັກເມືອງ ເພື່ອຊອກໃຫ້ເຫັນດ້ານດີ, ດ້ານຄົງຄ້າງ, ຜູ້ເຮັດວຽກງານກວດກາຕ້ອງມີສາຍຕາແຫຼມຄົມ, ຫູໄວ, ໃຈສັດຊື່, ມືສະອາດ.

ໂອກາດດຽວກັນນີ້, ສະຫາຍ ວັນໄຊ ພອງສະຫວັນ ກໍໄດ້ມອບເງິນຈຳນວນ 50,000,000 ກີບ, ຄອມພິວເຕີ ແລະ ປິນເຕີ້ ຈຳນວນ 6 ຊຸດ ໃຫ້ເມືອງ ເພື່ອນຳໄປໝູນໃຊ້ໃນວຽກງານຕ່າງໆຂອງເມືອງ ແລະ ໄປຢ້ຽມຊົມຫ້ອງການຕາແສງບຸນໃຕ້ອີກດ້ວຍ.

(ຂ່າວ: ຕູ່ນາ)