ສາລະວັນ ຫາລືກຽມປະກາດແຂວງຢຸດຕິການຖ່າຍຊະຊາຍ

ແຂວງສາລະວັນ ປະກາດຈັດສັບປະດາອະນາໄມໃນຂອບເຂດ 8 ຕົວເມືອງ ເພື່ອຮອງຮັບໃຫ້ແກ່ການກະກຽມປະກາດແຂວງສາລະວັນ ເປັນແຂວງຢຸດຕິການຖ່າຍຊະຊາຍເປັນແຂວງທີ 7 ຂອງທົ່ວປະເທດ, ຊຶ່ງ ຈະຈັດຂຶ້ນໃນລະຫວ່າງວັນທີ 12-13 ມີນາທີ່ຈະມາເຖິງນີ້, ຄວາມເປັນລະບຽບຮຽບຮ້ອຍ, ຄວາມສະຫງົບ, ປອດໄພ, ຄວາມສະອາດ ແນໃສ່ເຮັດໃຫ້ການຈັດງານດັ່ງກ່າວ ຕິດພັນກັບການທ່ອງທ່ຽວ ເນື່ອງໃນໂອກາດປີທ່ອງທ່ຽວລາວ 2024.
    ໃນພິທີ, ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທໍາ-ສັງຄົມ ໄດ້ກ່າວວ່າ: ສັງຄົມທຸກພາກສ່ວນພາຍໃນແຂວງ ຕ້ອງເອົາໃຈໃສ່ຢ່າງເປັນເຈົ້າການ, ໃນການຮັກສາຄວາມສະອາດ, ການອະນາໄມຕາມສະຖານທີ່ຕ່າງໆໃນຂອບເຂດຄວາມຮັບຜິດຊອບຂອງຕົນ, ປະດັບປະດາເອ້ຍ້ອງໃຫ້ມີຫຼາຍສີສັນ. ຊຶ່ງເປັນຜົນສຳເລັດຂອງອົງການປົກຄອງແຂວງ, ຂະແໜງການຕ່າງໆທີ່ກ່ຽວຂ້ອງ ແລະ ພໍ່ແມ່ປະຊາຊົນຊາວແຂວງສາລະວັນ ທີ່ໄດ້ຍົກລະດັບຊີວິດການເປັນຢູ່ດີຂຶ້ນ, ສາມາດປ້ອງກັນການແຜ່ລະບາດພະຍາດຈາກການຖ່າຍຊະຊາຍ, ມີນ້ຳໃຊ້, ນ້ຳດື່ມທີ່ສະອາດ, ຖືກຕາມຫຼັກອະນາໄມ ແລະ ສາມາດປະກາດບ້ານ, ປະກາດ 8 ຕົວເມືອງ ຢຸດຕິການຖ່າຍຊະຊາຍ, ເປັນແບບຢ່າງດ້ານສາທາລະນະສຸກ.
    ຈາກນັ້ນ, ຜູ້ເຂົ້າຮ່ວມໄດ້ຄົ້ນຄວ້າ, ປະກອບຄຳຄິດເຫັນ ແລະ ເປັນເອກະພາບກັນມອບຄວາມຮັບຜິດຊອບໃຫ້ກັບອົງການປົກຄອງເມືອງ, ອຳນາດການປົກຄອງບ້ານ ແລະ ພະແນກການ, ອົງການທຽບເທົ່າຕ່າງໆອ້ອມຂ້າງແຂວງ ເອົາໃຈໃສ່ຢ່າງເປັນເຈົ້າການຮັກສາຄວາມສະອາດ ໂດຍສະເພາະຕາມຂອບເຂດເສັ້ນທາງຫຼວງແຫ່ງຊາດ, ເສັ້ນທາງເລກທີ 13 ໃຕ້, ເລກທີ 20 ແລະ ເສັ້ນທາງຫຼວງຂອງແຂວງ, ເມືອງ, ເຂດເຊື່ອມຕໍ່ຕ່າງໆ, ປະດັບປະດາຕິດທຸງຊາດ, ທຸງພັກ ຕາມສຳນັກງານ, ຫ້ອງການ, ບໍລິສັດ ຫ້າງຮ້ານ, ບ້ານເຮືອນປະຊາຊົນ, ຕິດປ້າຍຢາຍຄຳຂວັນ. ສໍາລັບເມືອງສາລະວັນ ໃຫ້ເອົາໃຈໃສ່ໃນການຮັກສາຄວາມເປັນລະບຽບຮຽບຮ້ອຍ, ຕົບແຕ່ງສວນສາທາລະນະໃນຈຸດຕ່າງໆ ນັບແຕ່ວັນທີ 4 ມີນາ 2024 ຈົນເຖີງມື້ຈັດງານປະກາດຢ່າງເປັນທາງການ. 
    ກອງປະຊຸມດັ່ງກ່າວໄດ້ຈັດຂຶ້ນໃນທ້າຍອາທິດຜ່ານມາ, ທີ່ສະໂມສອນຂອງແຂວງ, ໂດຍພາຍໃຕ້ການເປັນປະທານຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ, ມີບັນດາຫົວໜ້າພະແນກການ, ອົງການທຽບເທົ່າ, ເຈົ້າເມືອງ-ຮອງເຈົ້າເມືອງ 8 ຕົວເມືອງ, ຜູ້ຕາງໜ້າຈາກພາກສ່ວນກ່ຽວຂ້ອງອ້ອມຂ້າງແຂວງ, ເມືອງເຂົ້າຮ່ວມ.
(ຂ່າວ-ພາບ: ວິໄລວອນ ສິດທິໄຊ)