ສະຫຼຸບໂຄງການ ຕອບໂຕ້ການແຕ່ງດອງກ່ອນໄວອັນຄວນ

ວັນທີ 12 ທັນວາ ນີ້ ທີ່ຫ້ອງປະຊຸມພະແນກກະສິກຳ ແລະ ປ່າໄມ້ແຂວງຫຼວງພະບາງ, ສະຫະພັນແມ່ຍິງແຂວງ ຮ່ວມກັບ ອົງການຊ່ວຍເຫຼືອເດັກສາກົນ ປະຈຳແຂວງ ໄດ້ຈັດກອງປະຊຸມສະຫຼຸບລາຍງານການຈັດຕັ້ງປະຕິບັດ ກິດຈະກຳໂຄງການປ້ອງກັນ, ການຕອບໂຕ້ຕໍ່ການແຕ່ງດອງກ່ອນໄວອັນຄວນ ແລະ ບັງຄັບໃຫ້ແຕ່ງດອງ ໃນໄລຍະ 6 ເດືອນທ້າຍປີ 2023 ແລະວາງທິດທາງແຜນການ ປະຈໍາປີ 2024, ໂດຍເປັນປະທານຂອງ ທ່ານ ນາງ ສີຣິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີ ທ່ານ ນາງ ອິນທະວອນ ພົມມະຈັນ ປະທານສະຫະພັນແມ່ຍິງແຂວງ, ພ້ອມດ້ວຍ ພາກສ່ວນທີ່ກ່ຽວຂ້ອງຂັ້ນສູນກາງ-ຂັ້ນແຂວງ-ຂັ້ນເມືອງ 4 ເມືອງເປົ້າໝາຍ ເຂົ້າຮ່ວມ. 
ໂຄງການປ້ອງກັນ, ການຕອບໂຕ້ຕໍ່ການແຕ່ງດອງກ່ອນໄວອັນຄວນ ແລະບັງຄັບໃຫ້ແຕ່ງດອງ ໄດ້ເລີ່ມຈັດຕັ້ງປະຕິບັດນັບແຕ່ ວັນທີ 6 ກັນຍາ ປີ 2022 ຫາ 31 ທັນວາ 2024 ໂດຍໄດ້ຮັບການຊ່ວຍເຫຼືອຈາກອົງການຊ່ວຍເຫຼືອເດັກຮົງກົງ, ມາເຖິງປັດຈຸບັນໄດ້ສຳເລັດ 12 ກິດຈະກຳເຊັ່ນ: ການຝຶກອົບຮົມ ແລະນຳພາໄວໜຸ່ມຍິງ-ຊາຍ ເຮັດກິດຈະກຳວົງຈອນການເປັນເພື່ອນ ຫຼື ທັກສະຊີວິດ, ຝຶກອົບຮົມເຕັກນິກ ແລະວິທີການລ້ຽງສັດ, ຝຶກອົບຮົມວິທີການປຸງແຕ່ງ, ການຕັດຫຍິບໄລຍະສັ້ນ ແລະຝຶກອົບຮົມການຄຸ້ມຄອງເງິນຂັ້ນພື້ນຖານ ແລະມອບທຶນຂະໜາດນ້ອຍໃຫ້ແມ່ອາຍຸຍັງນ້ອຍ ແລະເດັກຍິງນອກໂຮງຮຽນ ຢູ່ 4 ເມືອງເປົ້າໝາຍມີ 20 ບ້ານ, ລວມມີ 143 ຄົນ ລວມເປັນທຶນທັງໝົດ 725.000.000 ກີບ ຫຼື 5.000.000 ກີບຕໍ່ຄົນ, ນອກນີ້ ໄດ້ລົງເຜີຍແຜ່ນິຕິກຳກົດໝາຍ, ຝຶກອົບຮົມຂະບວນການໄກ່ເກ່ຍຂໍ້ຂັດແຍ່ງຂັ້ນບ້ານ, ທົບທວນກົດປະເພນີນຳເຈົ້າກົກ ເຈົ້າເລົ່າ, ຈັດກິດຈະກຳສະເຫຼີມສະຫຼອງວັນເດັກນ້ອຍສາກົນ ຄຽງຄູ່ກັບການໃຫ້ຄວາມຮູ້ ກ່ຽວກັບຜົນກະທົບຂອງການແຕ່ງດອງກ່ອນໄວອັນຄວນ ແລະສະເຫຼີມສະຫຼອງ ວັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ, ສ່ວນທິດທາງແຜນການໃນປີ 2024 ຈະໄດ້ສືບຕໍ່ແລກປ່ຽນ ແລະຖອດຖອນບົດຮຽນກັບແຂວງອື່ນ ກ່ຽວກັບການທົບທວນກົດປະເພນີ ຫຼື ທຳນຽມປະຕິບັດ ທີ່ເຫັນວ່າຍັງບໍ່ທັນມີຄວາມສະເໝີພາບ, ລົງຕິດຕາມກຸ່ມເປົ້າໝາຍແມ່ອາຍຸຍັງນ້ອຍ ແລະເດັກຍິງນອກໂຮງຮຽນ ກ່ຽວກັບການສ້າງລາຍຮັບໃນຊຸມຊົນ, ແລກປ່ຽນບົດຮຽນລະຫວ່າງເມືອງ ກ່ຽວກັບຄອບຄົວຕົວແບບໃນການລ້ຽງລູກແບບສ້າງສັນ ແລະພັດທະນາທັກສະໃນການເປັນຜູ້ອຳນວຍຄວາມສະດວກ ໃຫ້ສະຫະພັນແມ່ຍິງເມືອງ ໃນການດຳເນີນກິດຈະກຳຕ່າງໆຢູ່ໃນຂັ້ນບ້ານ. 
ໂອກາດນີ້, ບັນດາຜູ້ເຂົ້າຮ່ວມກອງປະຊຸມ ໄດ້ປະກອບຄຳເຫັນ ເພື່ອເປັນການຖອດຖອນບົດຮຽນ ແລະເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າ ໄດ້ຮັບຜົນດີຂຶ້ນກວ່າເກົ່າ.
ຂ່າວ-ພາບ: ພຸດສະດີ ບານຸວົງ