ສຳເລັດການແຂ່ງຂັນກິລາມິດຕະພາບ ຈີນ, ລາວ, ມຽນມາ ແລະ ໄທ

ຕາມລໍາແມ່ນໍ້າຂອງຕອນເໜືອ ໄດ້ຈັດຂຶ້ນໃນວັນທີ 25 ກັນຍາຜ່ານມານີ້, ຢູ່ທີ່ ໂຮງຮຽນບ້ານແຊວວິທະຍາຄົມ, ເມືອງຊຽງແສນ, ຈັງຫວັດຊຽງຣາຍ, ໂດຍການເຂົ້າຮ່ວມເປັນປະທານຂອງທ່ານ ພັນຕຳຫຼວດເອກ ສິດທິໄຊ ໄກແສງ ຮອງຫົວໜ້າຜູ້ບັງຄັບການຕຳຫຼວດພູທອນ ຈັງຫວັດຊຽງຮາຍ ປະເທດໄທ, ສປ ຈີນນຳໂດຍ ທ່ານ ພົນໂທ ຢວນຢາພິງ ຫົວໜ້າກອງບັນຊາການຕຳຫຼວດລາດຕະເວນທາງນໍ້າ ແຂວງຢູນນານ, ສປປ ລາວນຳໂດຍ ທ່ານ ພັນໂທ ຄຳໄພ ທິບບົວວັນ ຮອງຫົວໜ້າຫ້ອງເຕັກນິກ ກອງບັນຊາການທະຫານແຂວງບໍ່ແກ້ວ, ສ ມຽນມານຳໂດຍ ທ່ານ ພັນຕີ ຕັນນ໋າຍອູ໋ ຫົວໜ້າເຮືອ 171 ຕໍາຫຼວດນໍ້າບ້ານປຸງ ເມືອງທ່າຂີ້ເຫຼັກ, ຕະຫຼອດຮອດ ພະນັກງານ-ນັກຮົບ 4 ປະເທດເຂົ້າຮ່ວມ.
ການແຂ່ງຂັນກິລາໃນຄັ້ງນີ້, ມີທີມນັກກິລາເຂົ້າຮ່ວມແຂ່ງຂັນທັງໝົດ 20 ທີມ ປະກອບມີ 5 ປະເພດກິລາຄື: ກິລາບານເຕະ, ກິລາກະເປຕັງ, ກິລາດອກປີກໄກ່ຄູ່, ກິລາຕີດອກປີກໄກ່ດ່ຽວ ແລະ ກິລາດຶງເຊືອກ. ຜ່ານການແຂ່ງຂັນ ສາມາດສະຫຼຸບຜົນການແຂ່ງຂັນໄດ້ດັ່ງນີ້: ກິລາບານເຕະ ມຽນມາສາມາດຍາດໄດ້ອັນດັບ 1, ອັນດັບ 2 ແມ່ນໄທ, ອັນດັບ 3 ຮ່ວມຈີນ, ລາວ. ກິລາເປຕັງ ສປປ ລາວ ຍາດໄດ້ອັນດັບ 1, ອັນດັບ 2 ສປ ຈີນ, ອັນດັບ 3 ຮ່ວມໄທ, ມຽນມາ. ກິລາດອກປີກໄກ່ຄູ່ ລາວ ໄດ້ອັນດັບ 1, ອັນດັບ 2 ຈີນ, ອັນດັບ 3 ຮ່ວມ ແມ່ນຝ່າຍມຽນມາ-ໄທ, ກິລາດອກປີກໄກ່ດ່ຽວ ລາວສາມາດຍາດໄດ້ ອັນດັບ 1, ອັນດັບ 2 ຈີນ, ທີ 3 ຮ່ວມຝ່າຍມຽນມາ, ໄທ, ກິລາດຶງເຊືອກ ຈີນ ສາມາດຍາດໄດ້ ອັນດັບ 1, ອັນດັບ 2 ຝລາວ ແລະ ທີ 3 ຮ່ວມ ມຽນມາ, ໄທ.
(ຂ່າວ: ວໍລະສິດ ພິດສະຫາຍ),