 |
ກອງປະຊຸມ, ໄດ້ຜ່ານຮ່າງບົດລາຍງານການເມືອງ ທີ່ສ່ອງແສງໃຫ້ເຫັນການຈັດຕັ້ງປະຕິບັດແນວ ທາງນະໂຍບາຍ ຂອງພັກ ແລະລັດຖະບານ, ຂອງຄະນະພັກ-ຄະນະຜູ້ວ່າການ ທຫລ, ຄະນະພັກຮາກຖານ ທນບ ຍາມໃດ ກໍໄດ້ຖືເອົາການສຶກສາອົບຮົມການເມືອງ, ນໍາພາແນວຄິດ ເປັນບັນຫາກົກ ແລະສອດຫ້ອຍ ເຂົ້າໃນທຸກວຽກງານ ດ້ວຍຫຼາຍຮູບການ ເຮັດໃຫ້ສະພາບແນວຄິດ ຂອງສະມາຊິກພັກ-ພະນັກງານ ມີຄວາມສະຫງົບ, ມີການຫັນປ່ຽນ ທີ່ດີຂຶ້ນ, ມີຄຸນທາດການເມືອງ, ມີສະຕິ ຕໍ່ການຈັດຕັ້ງ, ມີລະບຽບວິໄນ, ມີຄວາມຮັບຜິດຊອບສູງ ຕໍ່ໜ້າທີ່ການເມືອງ ທີ່ໄດ້ຮັບມອບໝາຍ ສາມາດສະໜອງສິນເຊື່ອຊຸກຍູ້ການຜະລິດ ແກ້ໄຂຄວາມທຸກຍາກ ຂອງປະ ຊາຊົນບັນດາເຜົ່າຂອບເຂດທົ່ວປະເທດ ໃນຕະຫຼອດໄລຍະ 5 ປີ (2020-2025) ຜ່ານມາ ໂດຍສະເພາະປະກອບສ່ວນເຂົ້າໃນການພັດທະນາ ແລະແກ້ໄຂຄວາມທຸກ ຍາກ ຢູ່ບັນດາເມືອງເປົ້າໝາຍທຸກ ຍາກ, ຈຸດສຸມພັດທະນາ ຂອງລັດຖະ ບານ-ຂອງທ້ອງຖິ່ນ ແລະບ້ານ 3 ສ້າງ ຢ່າງມີໝາກຜົນຕົວຈິງໃຫຍ່ຫຼວງ ໃນ ຫຼາຍດ້ານ ເຮັດໃຫ້ຊົນນະບົດ, ພູ ດອຍ, ເຂດທຸລະກັນດານ-ຫ່າງໄກ ສອກ ມີໂສມໜ້າໃໝ່ດີຂຶ້ນຢ່າງຈະແຈ້ງ.
 |
ຈາກນັ້ນ; ກອງປະຊຸມ ໄດ້ຜ່ານທິດທາງແຜນການ 5 ປີຕໍ່ໜ້າ ໂດຍຈະສືບຕໍ່ປະຕິບັດໜ້າທີ່ການເມືອງໃນໄລຍະໃໝ່ ປະກອບສ່ວນແກ້ໄຂຄວາມທຸກຍາກ ຂອງປະຊາຊົນ ໃຫ້ມີປະສິດທິຜົນກວ່າເກົ່າ, ສູ້ຊົນຫັນປ່ຽນຈາກທະນາຄານສະເພາະກິດ (ທະນາຄານນະໂຍບາຍ) ໄປເປັນ ທະນາຄານທຸລະກິດສະເພາະ (ທະນາຄານພັດທະນາຊົນນະບົດ ຫຼື ທພບ) ຕາມກົນໄກໄລ່ລຽງທຸລະກິດ ໃຫ້ມີປະສິດທິຜົນ ແລະ ປະສິດທິພາບ ພ້ອມກັນນັ້ນ ກໍສືບຕໍ່ເຮັດໜ້າທີ່ຮັບໃຊ້ແນວທາງນະໂຍບາຍ ຂອງພັກ ແລະ ລັດຖະບານວາງອອກແຕ່ລະໄລຍະ.
ເພື່ອໃຫ້ການດໍາເນີນທຸລະກິດເປັນໄປ ຕາມແນວຄິດແຫ່ງຄວາມຍືນຍົງ, ທພບ ຈຶ່ງໄດ້ມີວິໃສທັດຮອດ ປີ 2035 ແລະ ຍຸດທະສາດຮອດ ປີ 2030 ຄືດັ່ງນີ້: ດ້ານວິໃສທັດຮອດປີ 2035 (10 ປີ 2026-2035): ສ້າງ ທພບ ເປັນທະນາຄານ ອັນດັບ 1 ທີ່ໃຫ້ການຊ່ວຍເຫຼືອທາງການເງິນ ແລະສະໜັບສະໜູນການ ພັດທະນາໃນຊົນນະບົດ ເຊິ່ງເປັນຮາກຖານ ໃນລະບົບເສດຖະກິດ ຂອງປະເທດ ໃຫ້ມີຄວາມຍືນຍົງ.
ດ້ານຍຸດທະສາດຮອດປີ 2030 (5 ປີ 2026-2030): ຮອດປີ 2030 ທພບ ຈະກາຍເປັນສູນກາງ ທາງການເງິນຄົບວົງຈອນ ແລະທັນສະໄໝແກ່ລູກຄ້າ ໃນຊົນນະບົດ; ສູ້ຊົນເຮັດໃຫ້ຕົວຊີ້ວັດປະສິດທິຜົນ ຫຼື ຜົນຕອບແທນດ້ານການລົງທຶນ ບັນລຸໄດ້ດັ່ງນີ້: 1. ຜົນຕອບແທນ ຕໍ່ທຶນ (ROE): ຕ້ອງບັນລຸຫຼາຍກວ່າ 10% ຂຶ້ນໄປ; 2. ຜົນຕອບແທນ ຕໍ່ຊັບສິນລວມ (ROA): ຕ້ອງບັນລຸ 1% ຂຶ້ນໄປ;
 |
ດ້ານພາລະກິດ: 1. ພັດທະນາຜະລິດຕະພັນ ແລະການບໍລິການການເງິນຄົບວົງຈອນ ແລະ ທັນສະໄໝ ເພື່ອໃຫ້ສາມາດແຂ່ງຂັນ ແລະ ເຕີບໂຕຢ່າງຍືນຍົງ; 2. ພັດທະນາຄວາມສາມາດ ຂອງອົງກອນ ແລະ ບຸກຄະລາກອນໃຫ້ມີປະສິດທິພາບ, ການດໍາເນີນງານ ດ້ວຍລະບົບເຕັກໂນໂລຊີ ທີ່ທັນສະໄໝ; 3. ພັດທະນາໂຄງສ້າງພື້ນຖານລະບົບເຕັກໂນໂລຊີຂໍ້ມູນຂ່າວສານ (MIS), ຖານຂໍ້ມູນ (Data Base) ແລະ ນະວັດຕະກໍາຕ່າງໆ (Innovations) ເພື່ອພັດທະນາຜະລິດຕະພັນທາງການເງິນທາງເອເລັກໂຕຣນິກ ອອກສູ່ສັງຄົມ (Platforms); 4. ປັບປ່ຽນວັດທະນະທໍາຂອງທະນາຄານພັດທະນາຊົນນະບົດ, ສ້າງຮູບ ແບບການດໍາເນີນວຽກງານຢ່າງປະດິດສ້າງ, ມີໂຄງສ້າງເປົ້າໝາຍຕົວຊີ້ວັດຂອງອົງກອນ ແລະ ບຸກຄົນ (KPI); 5. ປັບປຸງ ແລະ ເພີ່ມຜົນຕອບແທນໃຫ້ແກ່ພະນັກງານ ໃນທົ່ວລະບົບເປັນແຕ່ລະປີ ໂດຍຖືເອົາຜົນ ຂອງການດໍາເນີນທຸລະກິດ ແຕ່ລະປີເປັນຕົວຊີ້ວັດ; 6. ສ້າງ ແລະ ພັດທະນາລະບົບການບໍລິຫານແຫຼ່ງທຶນ ໃຫ້ພຽງພໍ ແລະ ມີຕົ້ນທຶນ ທີ່ເໝາະສົມ ຕໍ່ລູກຄ້າ ແລະ ການດໍາເນີນງານ; 7. ສ້າງຫຼັກການໃນການຄຸ້ມຄອງ ບໍລິຫານທຸລະກິດທີ່ດີ, ມີຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມ ເພື່ອຄວາມໝັ້ນຄົງ ແລະ ຍືນຍົງ.
ກອງປະຊຸມ ໄດ້ດຳເນີນການເລືອກຕັ້ງ ເອົາຄະນະພັກຮາກຖານຊຸດໃໝ່ ປະກອບດ້ວຍ 7 ສະຫາຍ ໂດຍສະຫາຍ ສຸພັກ ຖິ່ນໄຊພອນ ໄດ້ຮັບການເລືອກເປັນເລຂາຄະນະພັກຮາກຖານ; ສະຫາຍ ສຸພົດ ໂຊກປະຫວັດ ເປັນຮອງເລຂາ; ສະຫາຍ ນາງ ວິໄລເພັດ ຫຼວງອະໄພ ເປັນກຳມະການ ທັງເປັນປະທານ ກວດກາ ແລະ ກອງປະຊຸມ ໄດ້ເລືອກເອົາຜູ້ແທນເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກ ຄັ້ງທີ V ຂອງ ທຫລ ທີ່ຈະເປີດຂຶ້ນໃນຕໍ່ໜ້າ. ໃນນີ້, ມີຜູ້ແທນສົມບູນ 8 ສະຫາຍ ແລະ ສຳຮອງ 3 ສະຫາຍ.
|
ສະຫາຍ ຮັກສາການເລຂາຄະນະພັກ ທຫລ ໄດ້ຕີລາຄາສູງ ຕໍ່ການນໍາພາ-ຊີ້ນໍາ ຂອງຄະນະພັກ ຮາກຖານ ທນບ ຊຸດຜ່ານມາ ທີ່ສາມາດຍາດໄດ້ຜົນງານອັນເດັ່ນໃນຫຼາຍດ້ານ; ຮຽກຮ້ອງໃຫ້ຄະນະພັກຊຸດ ໃໝ່ ຈົ່ງສືບຕໍ່ເສີມຂະຫຍາຍຜົນງານທີ່ຕັ້ງໜ້າ, ແກ້ໄຂຂໍ້ຄົງຄ້າງ; ສຶກສາອົບຮົມການເມືອງແນວຄິດ; ເອົາໃຈໃສ່ກໍ່ສ້າງພັກ-ພະນັກງານ ແລະ ຂະຫຍາຍພັກ ໃຫ້ຖືກທິດ ພ້ອມທັງປັບປຸງກົງຈັກ ແລະ ສັບຊ້ອນ-ຈັດວາງ ແລະ ສ້າງພະນັກງານ ໃຫ້ມີຄວາມຮູ້-ຄວາມສາມາດ, ສ້າງໄດ້ຄົນດີ-ວຽກເດັ່ນ ແລະ ເຂັ້ມແຂງແທ້ໆ; ພ້ອມກັນນັ້ນ ຈົ່ງເອົາໃຈໃສ່ຜັນຂະຫຍາຍມະຕິ ສອຈ ຂອງພັກເຂົ້າໃນໜ້າທີ່; ຕອບຕ້ານທຸກ ກົນອຸບາຍຫັນປ່ຽນ ໂດຍສັນຕິ ຂອງຄົນບໍ່ດີ; ຕີຖອຍປະກົດການຫຍໍ້ທໍ້ໃນທຸກຮູບແບບ; ເຊີດຊູການນໍາພາ ດ້ານວິຊາສະເພາະໃຫ້ສູງ ເພື່ອຮັບປະກັນການຫັນທະນາຄານນະໂຍບາຍ ເປັນທະນາຄານພັດທະນາ ຊົນນະບົດ ໃຫ້ເປັນລະບົບຄົບຊຸດ ເປັນຕົ້ນ ການສ້າງແຜນທຸລະກິດ 5 ປີຕໍ່ໜ້າ, ແກ້ໄຂທຸກອຸປະສັກ; ການບໍລິການ; ດ້ານນິຕິກໍາ, ການຊໍາລະ ແລະອື່ນໆອີກ.
(ຂ່າວ: ຣັດສະໝີ ດວງສັດຈະ)
ຄໍາເຫັນ