ສຳມະນາວິທະຍາສາດ ລາວ-ຫວຽດນາມ “ເສດຖະກິດເອກະລາດ ເປັນເຈົ້າຕົນເອງ”

ເປັນກຽດໃນກອງປະຊຸມຄັ້ງນີ້ ມີບັນດາຄະນະພັກ-ຄະນະນໍາຂອງ 4 ສະຖາບັນເຂົ້າຮ່ວມ ຊຶ່ງໃຫ້ກຽດເຂົ້າຮ່ວມ ໂດຍ ທ່ານ ດວນ ມິງ ຮວັນ ກໍາມະການກົມການເມືອງສູນກາງພັກກອມມູນິດຫວຽດນາມ ຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກປະຊາຊົນ ປະຕິວັດລາວ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ; ທ່ານ ລີເບີ ລີບົວປາວ ກໍາມະການສູນກາງພັກ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ), ທ່ານ ເລ ວັນ ເລີ້ຍ ກໍາມະການຄະນະບໍລິຫານງານສູນກາງພັກກອມມູນິດຫວຽດນາມ ປະທານສະຖາບັນບັນດິດວິທະຍາສາດສັງຄົມຫວຽດນາມ (VASS), ທ່ານເອກອັກຄະລັດຖະທູດ ສສ ຫວຽດນາມ ປະຈໍາ ສປປ ລາວ, ບັນດາການນຳຂອງກະຊວງ, ວິທະຍາກອນ ລາວ-ຫວຽດນາມ ແລະ ຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສອງຊາດເຂົ້າຮ່ວມຢ່າງພ້ອມພຽງ.

ຕະຫຼອດໄລຍະຜ່ານມາ, ພັກເຮົາໄດ້ວາງແນວທາງນະໂຍບາຍໃນການພັດທະນາຕາມທິດຍືນຍົງ ແລະ ສີຂຽວ ບົນພື້ນຖານການນໍາໃຊ້ກາລະໂອກາດ, ທ່າແຮງບົ່ມຊ້ອນເປັນກໍາລັງແຮງສັງລວມ ເພື່ອສ້າງບາດກ້າວບຸກທະລຸການເຕີບໂຕເສດຖະກິດໃຫ້ມີຄວາມໝັ້ນທ່ຽງ, ເຂັ້ມແຂງ ໂດຍກໍານົດເປັນນະໂຍບາຍວາງອອກຄື: ການສ້າງເສດຖະກິດເອກະລາດ ເປັນເຈົ້າຕົນເອງ. ການສ້າງເສດຖະກິດເອກະລາດ ແມ່ນການເສີມຂະຫຍາຍຫົວຄິດປະດິດສ້າງ, ຄວາມດຸໝັ່ນຂະຫຍັນພຽນ, ເປັນຜູ້ປະກອບການທີ່ເຂັ້ມແຂງ, ເປັນເຈົ້າຕົນເອງ ດ້ວຍການຍົກສູງສະມັດຖະພາບການຜະລິດ, ເສີມສ້າງສະຕິປັນຍາ, ຄວາມສາມາດຢືນ ແລະ ກ້າວເດີນດ້ວຍກໍາລັງແຮງຂອງຕົນຢ່າງເປັນເຈົ້າການ ເຮັດໃຫ້ການຍົກລະດັບວິຖີຊີວິດການດລົງຊີວິດແບບໃໝ່, ສ້າງຄ່ານິຍົມ ແລະ ສະຕິຊາດ, ຮູ້ນໍາໃຊ້ຊັບພະຍາກອນ ແລະ ປົກປັກຮັກສາໃຫ້ນໍາໃຊ້ໄດ້ຍາວນານ.

ກອງປະຊຸມຈະໄດ້ລົງເລິກນໍາສະເໜີດ້ານທິດສະດີ, ຜົນສໍາເລັດ ແລະ ບົດຮຽນອັນລ້ຳຄ່າ 40 ປີແຫ່ງການປ່ຽນແປງໃໝ່ ຂອງ ສປປ ລາວ ແລະ ສສ ຫວຽດນາມ ໃນການສ້າງເສດຖະກິດເອກະລາດເປັນເຈົ້າຕົນເອງ ໂດຍສະເພາະແມ່ນການແກ້ໄຂສາຍພົວພັນສັດຈະວິພາກ ລະຫວ່າງການເປັນເຈົ້າຕົນເອງ ແລະ ການເຊື່ອມໂຍງສາກົນ, ນັກວິທະຍາສາດຈາກສອງຊາດ ຍັງຈະໄດ້ຮ່ວມກັນສົນທະນາແລກປ່ຽນຄໍາຄິດຄໍາເຫັນຢ່າງກົງໄປກົງມາ ກ່ຽວກັບການພັດທະນາກໍາລັງການຜະລິດທັນສະໄໝ ບົນພື້ນຖານວິທະຍາ ສາດ-ເຕັກໂນໂລຊີ, ນະວັດຕະກໍາ ແລະ ການຫັນເປັນດີຈີຕອນ ເພື່ອເປັນບ່ອນອີງໃນການວາງນະໂຍ ບາຍ ແລະ ແຜນພັດທະນາເສດຖະກິດ-ສັງຄົມ ຂອງສອງປະເທດໃນຕໍ່ໜ້າ ໃຫ້ມີປະສິດທິພາບ ແລະ ປະສິດທິຜົນສູງ.

ຜົນສຳເລັດຂອງກອງປະຊຸມດັ່ງກ່າວ ຈະຖືກສັງລວມເປັນຂໍ້ມູນສະເໜີແນະທາງດ້ານນະໂຍບາຍ ເພື່ອລາຍງານຕໍ່ສອງພັກ ແລະ ລັດຖະບານ ໃຫ້ສາມາດຜັນຂະຫຍາຍເຂົ້າສູ່ພຶດຕິກຳຕົວຈິງ ແລະ ເປັນບ່ອນອີງອັນໜັກແໜ້ນທາງດ້ານທິດສະດີ ເພື່ອສ້າງພື້ນຖານເສດຖະກິດໃຫ້ມີຄວາມເຂັ້ມແຂງ, ສະໜັບສະໜູນການຈັດຕັ້ງປະຕິບັດເປົ້າໝາຍຂອງພັກ-ລັດຖະບານໃນການນຳພາປະເທດຊາດຫຼຸດພົ້ນອອກຈາກສະ ຖານະພາບປະເທດດ້ອຍພັດທະນາ (LDC) ຢ່າງມີຄຸນນະພາບໃນທ້າຍປີ 2026 ແລະ ສ້າງບາດກ້າວກະໂດດໄປສູ່ການເປັນປະເທດລາຍຮັບປານກາງສູງ ໃນປີ 2035 ຕາມວິໄສທັດທີ່ວາງໄວ້ຢ່າງສະຫງ່າງາມ.

(ຂ່າວ: ແສງຈັນ)