ສ້າງຄວາມເຂົ້າໃຈກ່ຽວກັບບັນຫາພູມສາດເສດຖະກິດ ແລະ ການຮັບມືໃນສະພາບປັດຈຸບັນ

ທ່ານ ສະຖາບັນດິດ ອິນສີຊຽງໃໝ່ ກ່າວວ່າ: ການຈັດກອງປະຊຸມຄັ້ງນີ້ ຖືເປັນຄັ້ງທີ 3 ທີ່ LASES ແລະ ສະຖານທູດອົສຕຣາລີ ໄດ້ຮ່ວມກັນຈັດຂຶ້ນ, ສໍາລັບຄັ້ງທີສາມແມ່ນໄດ້ກໍານົດຫົວຂໍ້ກ່ຽວກັບ “ການສ້າງຄວາມເຂັ້ມແຂງທາງດ້ານເສດຖະກິດທ່າມກາງການແບ່ງແຍກທາງພູມສາດເສດຖະກິດ ໂດຍມີນັກຄົ້ນຄວ້າຝ່າຍລາວຈາກ LASES ແລະ ສະຖາບັນຄົ້ນຄວ້າອຸດສາຫະກຳການຄ້າ ແລະ ພະລັງງານ, ກະຊວງອຸດສາຫະກຳການຄ້າ ແລະ ພະລັງງານ ແລະ ອາຈານ Prof. Peter Warr ຈາກມະຫາວິທະຍາໄລແຫ່ງຊາດອົສຕຣາລີ ທີ່ມີຄວາມຊ່ຽວຊານດ້ານເສດຖະກິດລະຫວ່າງປະເທດ, ການເຊື່ອມໂຍງດ້ານເສດຖະກິດ, ການຄ້າ ແລະ ການລົງທຶນ ແລະ ທ່ານ ແຊ໋ມ ເບັນລີ້ (Sam Bentley) ຊ່ຽວຊານຈາກກະຊວງການຕ່າງປະເທດ ແລະ ການຄ້າ ອົສຕຣາລີ ເພື່ອມາຮ່ວມສົນທະນາແລກປ່ຽນບົດຮຽນຕໍ່ກັບຜົນກະທົບຈາກຄວາມບໍ່ແນ່ນອນຂອງສາກົນ ໂດຍສະເພາະສະພາບຢູ່ເຂດຕາເວັນອອກກາງ ຊຶ່ງເປັນຫົວຂໍ້ທີ່ໜ້າສົນໃຈທີ່ກຳລັງເກີດຂຶ້ນໃນປັດຈຸບັນ ແລະ ມີຫຼາຍປະເທດກຳລັງຮັບມືກັບຜົນກະທົບດັ່ງກ່າວ ລວມທັງ ສປປ ລາວ ແລະ ປະເທດອົສຕຣາລີ. ໃນນັ້ນ, ການສໍາມະນາຮ່ວມກັນຄັ້ງນີ້ ເປັນອີກໜຶ່ງໃນຫຼາຍກິດຈະກໍາການຮ່ວມມື ລະຫວ່າງລາວ ແລະ ອົສຕາລີ ນັບແຕ່ມີການສ້າງຕັ້ງສະມາຄົມມິດຕະພາບລາວ-ອົສຕຣາລີ ແລະ ອົສຕຣາລີ-ລາວ ໃນຕົ້ນປີ 2024. ສະນັ້ນ, ກອງປະຊຸມ ຈະເປັນປະໂຫຍດແກ່ບັນດາທ່ານ ໂດຍສະເພາະການສ້າງຄວາມເຂົ້າໃຈເລິກເຊິ່ງຂຶ້ນກ່ຽວກັບບັນຫາພູມສາດເສດຖະກິດ, ການຮັບມືໃນສະພາບປັດຈຸບັນ ແລະ ບົດຮຽນຂອງປະເທດອົສຕຣາລີ.

ທ່ານ ນາງ ເມແກນ ຈອນ ກ່າວວ່າ: ຈາກຜົນສຳເລັດຂອງງານສຳມະນາກ່ຽວກັບພູມສາດເສດຖະກິດ (geoeconomics) ທັງສອງຄັ້ງໃນປີທີ່ຜ່ານມາ, ອົສະຕຣາລີ ມີຄວາມຍິນດີເປັນຢ່າງຍິ່ງທີ່ໄດ້ຮ່ວມມືກັບ LASES ອີກຄັ້ງໜຶ່ງ ເພື່ອສືບຕໍ່ການສົນທະນາທີ່ສຳຄັນ. ການຮ່ວມມືຢ່າງຕໍ່ເນື່ອງບໍ່ພຽງແຕ່ສະທ້ອນໃຫ້ເຫັນເຖິງຄວາມມຸ່ງໝັ້ນຮ່ວມກັນ ໃນການແກ້ໄຂບັນຫາສິ່ງທ້າທາຍທາງດ້ານເສດຖະກິດທີ່ສັບຊ້ອນເທົ່ານັ້ນ, ແຕ່ຍັງສະແດງເຖິງຄວາມໄວ້ເນື້ອເຊື່ອໃຈທີ່ມີຕໍ່ ອົສຕຣາລີ ໃນຖານະຄູ່ຮ່ວມງານໃນເສັ້ນທາງການພັດທະນາແຫ່ງຊາດຂອງ ສປປ ລາວ, ການຮ່ວມມືທາງດ້ານເສດຖະກິດ ລາວ-ອົສຕຣາລີ,ໂດຍຜ່ານການຄ້າ, ການລົງທຶນ, ແລະ ການແລກປ່ຽນແນວຄວາມຄິດ ຍັງສືບຕໍ່ມີບົດບາດສຳຄັນ. ພວກເຮົາພວມປະກອບສ່ວນຮ່ວມກັນ ເຂົ້າໃນເປົ້າໝາຍການພັດທະນາຂອງລາວ ແລະ ຊ່ວຍສ້າງອະນາຄົດທາງເສດຖະກິດທີ່ມີຄວາມເຂັ້ມແຂງ ແລະ ກວມລວມຫຼາຍຂຶ້ນ.

(ຂ່າວ-ພາບ: ສຳນານ)