ສ້າງຄວາມເຂັ້ມແຂງໃຫ້ອຳນວຍການໂຮງຮຽນໃນການພັດທະນາວິຊາຊີບຄູແບບຕໍ່ເນື່ອງ

ກະຊວງສຶກສາທິການ ແລະ ກິລາ(ສສກ) ຮ່ວມກັບ ລັດຖະບານອົສຕຣາລີ ໂດຍຜ່ານແຜນງານບີຄວາ ຈັດຝຶກອົບຮົມຜູ້ອຳນວຍການໂຮງຮຽນຊັ້ນປະຖົມສຶກສາ ບັນດາແຂວງເປົ້າໝາຍ ຈຳນວນ 2.700 ທ່ານ ເພື່ອເສີມສ້າງຄວາມເຂັ້ມແຂງໃຫ້ຜູ້ອຳນວຍການໂຮງຮຽນໃຫ້ກາຍເປັນຜູ້ນໍາທີ່ມີປະສິດທິພາບ ໃນການຊ່ວຍເຫຼືອດ້ານການພັດທະນາວິຊາຊີບຄູແບບຕໍ່ເນື່ອງ ໃຫ້ຄູໃນໂຮງຮຽນ ເພື່ອຍົກສູງຄຸນນະພາບການສິດສອນ ແລະ ຜົນການຮຽນຂອງນັກຮຽນ.
ການຝືກອົບຮົມຄັ້ງນີ້, ໄດ້ນຳສະເໜີຫົວຂໍ້ຕ່າງໆທີ່ມີຄວາມສຳຄັນ ເປັນຕົ້ນຄວາມເຂົ້າໃຈກ່ຽວກັບການພັດທະນາວິຊາຊີບຄູແບບຕໍ່ເນື່ອງ, ຫຼັກສູດຊັ້ນປະຖົມສຶກສາ, ພາລະບົດບາດຂອງຜູ້ອຳນວຍການ ແລະ ຄວາມຮັບຜິດຊອບຂອງຄູ ທີ່ກ່ຽວຂ້ອງກັບການພັດທະນາວິຊາຊີບຄູແບບຕໍ່ເນື່ອງ, ຍຸດທະສາດເພື່ອສ້າງສະພາບແວດລ້ອມທີ່ເອື້ອອຳນວຍຕໍ່ການພັດທະນາວິຊາຊີບຄູແບບຕໍ່ເນື່ອງ. ພ້ອມທັງ ເນັ້ນໃສ່ການສ້າງຄວາມເຂົ້າໃຈລະຫວ່າງຜູ້ອຳນວຍການ ແລະ ຄູສອນ, ຊຸກຍູ້ການເຮັດວຽກເປັນທີມໃຫ້ມີປະສິດທິຜົນ, ນຳໃຊ້ເຕັກນິກການຮຽນຮູ້ດ້ວຍການປະຕິບັດຕົວຈິງ ແລະ ຄົ້ນຄວ້າຍຸດທະສາດການປະເມີນຜົນ.
ຊຸດຝຶກອົບຮົມດັ່ງກ່າວ, ເປັນສ່ວນໜຶ່ງຂອງຍຸດທະສາດຂອງແຜນງານບີຄວາ ໄລຍະ 2 ທີ່ກະຊວງ ສສກ ໄດ້ຮັບຮອງເອົາ ແນໃສ່ການແບ່ງຂັ້ນຄຸ້ມຄອງການພັດທະນາວິຊາຊີບຄູແບບຕໍ່ເນື່ອງ ແລະ ສະໜອງໂອກາດໃຫ້ແກ່ການພັດທະນາວິຊາຊີບຄູແບບຕໍ່ເນື່ອງໃນຂັ້ນໂຮງຮຽນໃຫ້ຫຼາຍຂຶ້ນ ໂດຍຜ່ານການສ້າງຕັ້ງທີມງານຜູ້ເຮັດວຽກສຶກສານິເທດໃນແຕ່ລະເມືອງ, ທີມດັ່ງກ່າວປະກອບມີ: ຜູ້ອໍານວຍການ-ຮອງຜູ້ອໍານວຍການໂຮງຮຽນ ແລະ ຄູ ໂດຍຍຸດທະສາດຂອງແຜນງານບີຄວາ ໄລຍະ 2 ແມ່ນພະຍາຍາມເພື່ອຮັບປະກັນການວາງແຜນ ແລະ ການຈັດຕັ້ງປະຕິບັດກິດຈະກໍາ ການພັດທະນາວິຊາຊີບຄູແບບຕໍ່ເນື່ອງໃຫ້ມີປະສິດທິຜົນ. ພາຍຫລັງສຳເລັດການຝຶກອົບຮົມ, ຜູ້ອໍານວຍການຈະນໍາໃຊ້ຄວາມຮູ້ ແລະ ທັກສະທີ່ໄດ້ຮຽນຮູ້ໃໝ່ ເພື່ອສ້າງສະພາບແວດລ້ອມທີ່ເໝາະສົມສໍາລັບການພັດທະນາວິຊາຊີບຄູແບບຕໍ່ເນື່ອງຂອງຄູໃນໂຮງຮຽນຂອງເຂົາເຈົ້າ,ພ້ອມທັງສະໜັບສະໜູນຄູໃຫ້ປະຕິບັດການພັດທະ
ນາວິຊາຊີບຄູແບບຕໍ່ເນື່ອງ ໃຫ້ມີປະສິດທິຜົນ. 
ທ່ານ ໄຊຍະພອນ ຈັນດາວົງ ຄູຝຶກຂັ້ນແຂວງປະຈຳ ວິທະຍາໄລຄູຄັງໄຂ ແຂວງຊຽງຂວາງ ໄດ້ກ່າວວ່າ: ເມື່ອພວກເຮົາໄດ້ຝຶກໃຫ້ຄະນະຜູ້ອຳນວຍການໂຮງຮຽນ ມີຄວາມເຂົ້າໃຈດີຂຶ້ນກ່ຽວກັບລະບົບການພັດທະນາວິຊາຊີບຄູແບບຕໍ່ເນື່ອງ ແລະ ສະໜອງເຄື່ອງມືທີ່ຈໍາເປັນໃຫ້ເຂົາເຈົ້າ, ນັ້ນຖືວ່າພວກເຮົາໄດ້ສົ່ງເສີມ ແລະ ສ້າງຄວາມເຂັ້ມແຂງດ້ານການເປັນຜູ້ນຳໃຫ້ແກ່ເຂົາເຈົ້າ ເພື່ອສ້າງສະພາບແວດລ້ອມທີ່ຈະຊຸກຍູ້ການພັດທະນາວິຊາຊີບຄູແບບຕໍ່ເນື່ອງ ໃຫ້ເຕີບໃຫຍ່ຂະຫຍາຍຕົວໄປພ້ອມກັບທັກສະຂອງຄູຊຶ່ງປັດໄຈເຫຼົ້ານີ້ ຈະມີຜົນກະທົບໂດຍກົງຕໍ່ການພັດທະນາຄຸນນະພາບການສອນ ແລະ ຜົນການຮຽນຂອງນັກຮຽນ.
ທ່ານ ນາງ ປິ່ນຕາ ອ້ວນພິນຍາ ຜູ້ປະສານງານ ຫ້ອງການສຶກສາທິການ ແລະ ກິລາ ເມືອງອຸທຸມພອນ ແຂວງສະຫວັນນະເຂດ ໄດ້ກ່າວວ່າ: ພວກເຮົາເຊື່ອວ່າ ການສ້າງຄວາມເຂັ້ມແຂງໃຫ້ຄູເປັນຜູ້ນໍາໃນການຊ່ວຍເຫຼືອຄູດ້ານການພັດທະນາວິຊາຊີບຄູແບບຕໍ່ເນື່ອງ ແມ່ນມີຄວາມຈໍາເປັນສໍາລັບການຫັນປ່ຽນລະບົບການສຶກສາໃນລາວ ໂດຍການອຳນວຍຄວາມສະດວກໃຫ້ຜູ້ອໍານວຍການໂຮງຮຽນຜ່ານການຝຶກອົບຮົມ ແລະ ສະໜອງສື່ການຮຽນ-ການສອນທີ່ຈຳເປັນແກ່ພວກເຂົາ ແລະ ເຊື່ອໝັ້ນວ່າ ພວກເຂົາຈະກາຍເປັນຜູ້ນຳພາການປ່ຽນແປງ ທີ່ຈະນຳໄປສູ່ການປັບປຸງຄຸນນະພາບການສອນ ແລະ ຜົນການຮຽນຂອງນັກຮຽນໃຫ້ດີຂຶ້ນໃນອະນາຄົດ.
ຂ່າວ-ພາບ:ແຜນງານບີຄວາ