ສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນພາຍໃນ ກວສຊ

 ການຈັດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ພະນັກງານລັດຖະກອນພາຍໃນກໍາມາທິການວັດທະນະທໍາ-ສັງຄົມ ແລະ ຊົນເຜົ່າສະພາແຫ່ງຊາດເພື່ອຍົກດັບຄວາມຮູ້ ແລະ ພັດທະນາຄວາມສາມາດຄວາມຊໍານານງານ ໃຫ້ເສນາທິການທີ່ຮັບຜິດຊອບທາງດ້ານເນື້ອໃນມີຄວາມເຂົ້າໃຈເປັນເອກະພາບໃນການຮ່າງບົດສັງລວມຄໍາເຫັນຂອງກອງປະຊຸມ, ການຮ່າງບົດປະກອບຄໍາເຫັນ ແລະ ການຮ່າງບົດລາຍງານຜົນສໍາເລັດກອງປະຊຸມ ລວມເຖິງການກໍານົດພາລະບົດບາດ, ສິດ, ໜ້າທີ່ເພື່ອເປັນບ່ອນອີງໃນການຈັດຕັ້ງ ແລະ ການເຄື່ອນໄຫວວຽກງານ ຂອງກໍາມາທິການ ແລະ ກົງຈັກເສນາທິການ.

ກອງປະຊຸມໄດ້ຮັບຟັງການສະເໜີບົດຮຽນການຮ່າງບົດສັງລວມຄຳເຫັນ ແລະ ບົດປະກອບຄຳເຫັນ, ການຮ່າງບົດລາຍງານຜົນສໍາເລັດກອງປະຊຸມ ຈາກວິທະຍາກອນ ກົມເລຂານຸການ ແລະ ບົດຮຽນການຮ່າງ ພາລະບົດບາດ, ໜ້າທີ່ ແລະ ສິດ ຈາກກົມຈັດຕັ້ງຫ້ອງວ່າການສະພາແຫ່ງຊາດ ຕິດພັນກັບການປັບປຸງ ມະຕິ ວ່າດ້ວຍການຈັດຕັ້ງປະຕິບັດ ແລະ ການເຄື່ອນໄຫວຂອງກຳມາທິການວັດທະນະທໍາ-ສັງຄົມ ແລະ ຊົນເຜົ່າ, ຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານ ຂອງ 3 ກົມ, ພ້ອມທັງຄົ້ນຄວ້າແລກປ່ຽນຄໍາຄິດເຫັນ ແລະ ຖອດຖອນບົດຮຽນ ຮ່ວມກັນ ກັບວິທະຍາກອນ ແລະ ພະນັກງານ-ລັດຖະກອນ ເພື່ອໃຫ້ເຂົ້າໃຈເລິກເຊິ່ງ ແລະ ສາມາດນຳເອົາ ຮ່າງນິຕິກໍາ ຂອງກໍາມາທິການ ແລະ ບັນດາກົມ ໄປຜັນຂະຫຍາຍເຂົ້າໃນວຽກງານຕົວຈິງໄດ້ຢ່າງມີປະສິດທິຜົນ.

ຜ່ານການຝຶກອົບຮົມສ້າງຄວາມເຂັ້ມແຂງໃຫ້ພະນັກງານ-ລັດຖະກອນພາຍໃນກໍາມາທິການວັດທະ ນະທໍາ-ສັງຄົມ ແລະ ຊົນເຜົ່າໃນຄັ້ງນີ້ເຫັນໄດ້ວ່າເນື້ອໃນມີຄວາມສໍາຄັນຫຼາຍເຖິງວ່າເວລາຈະຈໍາກັດແຕ່ຜູ້ເຂົ້າຮ່ວມກອງປະຊຸມກໍໃຫ້ຄວາມສົນໃຈ ແລະ ສຸມໃສ່ຄົ້ນຄວ້າປະກອບຄໍາເຫັນດ້ວຍຄວາມຮັບຜິດຊອບ ແລະ ເຮັດບົດທົດສອບຕົວຈິງຊຶ່ງເຮັດໃຫ້ກອງປະຊຸມມີຜົນໄດ້ຮັບເປັນຢ່າງດີ, ເພື່ອເປັນການຝຶກອົບຮົມສ້າງຄວາມເຂັ້ມແຂງໃຫ້ມີຄວາມໜັກແໜ້ນ ແລະ ຕໍ່ເນື່ອງສາມາດກໍ່ສ້າງພະນັກງານສືບທອດປ່ຽນແທນ ແລະ ຫັນເປັນມືອາຊີບໃນຕໍ່ໜ້າ ນອກນັ້ນ ຜູ້ເຂົ້າຮ່ວມກອງປະຊຸມສະເໜີໃຫ້ຄະນະຮັບຜິດຊອບກອງປະຊຸມ, ກົມເລຂານຸການ ແລະ ກົມຈັດຕັ້ງຫ້ອງວ່າການສະພາແຫ່ງຊາດກໍານົດແຜນບໍາລຸງສ້າງພະນັກງານໃນຫົວຂໍ້ແລະ ເນື້ອໃນທີ່ມີລັກສະນະດັ່ງກ່າວນີ້ ໃຫ້ເປັນລະບົບເພື່ອເຮັດໃຫ້ພະນັກງານ-ລັດຖະກອນມີຄຸນນະພາບ ແລະ ກາຍເປັນເສນາທິການໃຫ້ກໍາມາທິການກໍຄືຄະນະປະຈໍາສະພາແຫ່ງຊາດຢ່າງມີປະສິດທິຜົນ.

(ຂ່າວ: ສພຊ)